ಬಾಲಕನ ತೊಡೆ ಹೊಕ್ಕ ಗಿಡದ ಕೊಂಬೆ

ಸವಣೂರ: ತಾಲ್ಲೂಕಿನ ಕಳಸೂರ ಗ್ರಾಮದಲ್ಲಿ ಶುಕ್ರವಾರ ಸ್ನೇಹಿತರೊಂದಿಗೆ ಕ್ರಿಕೆಟ್ ಆಡುತ್ತಿದ್ದ ವೇಳೆ ಚಂಡನ್ನು ತರಲು ಕಾಂಪೌಂಡ್‌ನಿಂದ ಜಿಗಿದ ಬಾಲಕ ಆಯತಪ್ಪಿ ಗಿಡದ ಕೊಂಬೆಯ ಮೇಲೆ ಬಿದ್ದ ಪರಿಣಾಮ ಕೊಂಬೆ ಬಾಲಕನ ತೊಡೆಯನ್ನು  ಹೊಕ್ಕಿ ಹೊರಬಂದಿದೆ. 

ಗ್ರಾಮದ ನಿವಾಸಿ ತರುಣ್‌ ವಿರೂಪಾಕ್ಷಪ್ಪ ಪೂಜಾರ (10) ಗಾಯಗೊಂಡ ಬಾಲಕ. ಬಾಲಕನಿಗೆ ತಕ್ಷಣ ಕಳಸೂರ ಪ್ರಾಥಮಿಕ ಆರೋಗ್ಯ ಕೇಂದ್ರದಲ್ಲಿ ಪ್ರಥಮ ಚಿಕಿತ್ಸೆ ನೀಡಿ, ತೊಡೆಯಲ್ಲಿ ಸೇರಿಕೊಂಡಿದ್ದ ಕೊಂಬೆಯನ್ನು ಹೊರ ತೆಗೆಯಲಾಗಿದೆ. ನಂತರ, ಹಾವೇರಿ ಜಿಲ್ಲಾ ಆಸ್ಪತ್ರೆಯಲ್ಲಿ ಹೆಚ್ಚಿನ ಚಿಕಿತ್ಸೆಗೆ ದಾಖಲಿಸಿ, ಶನಿವಾರ ಬೆಳಿಗ್ಗೆ ಹುಬ್ಬಳ್ಳಿ ಕಿಮ್ಸ್‌ಗೆ ಕರೆದೊಯ್ಯಲಾಗಿದೆ.