ಸರಣಿ ಕಳ್ಳತನ: ₹ 8 ಲಕ್ಷ ಮೌಲ್ಯದ ಸಾಮಗ್ರಿ ದೋಚಿ ಪರಾರಿ

ಆಳಂದ: ತಾಲ್ಲೂಕಿನ ಮಾದನ ಹಿಪ್ಪರಗಾ ಗ್ರಾಮದಲ್ಲಿ ಬುಧವಾರ ರಾತ್ರಿ ಸರಣಿ ಕಳ್ಳತನ ನಡೆದಿದೆ. ಬೈಕ್‌ ಸೇರಿದಂತೆ ಅಂದಾಜು ₹ 8 ಲಕ್ಷ ಮೌಲ್ಯದ ಸಾಮಗ್ರಿಗಳನ್ನು ಕಳ್ಳತನ ಮಾಡಲಾಗಿದೆ.

ಗ್ರಾಮದ ಶ್ರೀಸೋಮೇಶ್ವರ ಹಣಕಾಸು ಸಂಸ್ಥೆಯ ಬಾಗಿಲು ಬೀಗ ಒಡೆದು ₹ 4.70 ಲಕ್ಷ ನಗದು ದೋಚಲಾಗಿದೆ. ಚಂದ್ರಕಲಾ ನಿಂಗಪ್ಪ ಗಡ್ಡದ ಅವರ ಮನೆಗೆ ನುಗ್ಗಿ ಮನೆಯ ಅಲ್ಮೇರಾ ಒಡೆದು ₹ 1.5 ಲಕ್ಷ ನಗದು, 30 ಗ್ರಾಂ ಚಿನ್ನ ಕಳವು ಮಾಡಲಾಗಿದೆ. ಸಮೀಪದಲ್ಲಿನ ಶಬ್ಬಿರ್‌ ಶೇಖ್ ಹಾರಕೂಡ ಅವರು ಮನೆಯ ಮುಂದೆ ನಿಲ್ಲಿಸಿದ್ದ ₹ 1.70 ಲಕ್ಷ ಮೌಲ್ಯದ ಬೈಕ್‌ ಕದಿಯಲಾಗಿದೆ.

ಸ್ಥಳಕ್ಕೆ ಡಿವೈಎಸ್‌ಪಿ ಮಲ್ಲಿಕಾರ್ಜುನ ಸಾಲಿ, ಸಿಪಿಐ ಮಂಜುನಾಥ, ಮಾದನ ಹಿಪ್ಪರಗಾ ಪಿಎಸ್ಐ ಮಲ್ಲಣ್ಣಾ ಯಲಗೋಡ ಭೇಟಿ ನೀಡಿ ಪರಿಶೀಲಿಸಿದರು. ಶ್ವಾನದಳ ಹಾಗೂ ಬೆರಳಚ್ಚು ತಜ್ಞರು ಭೇಟಿ ನೀಡಿ ಶೋಧ ಮಾಡಲಾಗಿದೆ.

ಸರಣಿ ಕಳ್ಳತನ ಪ್ರಕರಣ ಗಡಿಗ್ರಾಮದ ಜನರಲ್ಲಿ ಆತಂಕವನ್ನುಂಟು ಮಾಡಿದ್ದು ಮಾದನ ಹಿಪ್ಪರಗಾ ಪೊಲೀಸ್‌ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.