ಚರ್ಮ ರಕ್ಷಣೆಗಾಗಿ ಅಲೋವೆರಾ, ಸೌತೆಕಾಯಿ ಜೆಲ್; ಸಿಯುಕೆಯಿಂದ ಅಭಿವೃದ್ಧಿ

ಜೆಲ್‌ನ ವೈಜ್ಞಾನಿಕ ವಿವರಗಳು, ಅದರ ಪ್ರಯೋಜನಗಳು, ಸುರಕ್ಷತೆ ಮತ್ತು ಅಡ್ಡ ಪರಿಣಾಮಗಳ ಕುರಿತು ಮಾಹಿತಿ ನೀಡಿದ ‍ಪ್ರಾಧ್ಯಾಪಕ ಕೊಂಕಲ್ಲು ಹನುಮೇಗೌಡ, ‘ಎನ್–ಅಸೆಟೈಲ್ಸಿಸ್ಟೈನ್ ಮತ್ತು ಗ್ಲುಟಾಥಿಯೋನ್ ಅವೊಬೆನ್‌ಜೋನ್‌ಗೆ ಶೇ 96ರಷ್ಟು ಫೋಟೊಪ್ರೊಟೆಕ್ಷನ್ ನೀಡುತ್ತವೆ. ಇದರಿಂದಾಗಿ ಸೂರ್ಯನ ಬೆಳಕಿನ ಗರಿಷ್ಠ ಪ್ರಮಾಣದ ವಿಕಿರಣವನ್ನು ಚರ್ಮಕ್ಕೆ ತಲುಪದಂತೆ ಮಾಡುತ್ತದೆ. ಚರ್ಮದ ಹಾನಿ, ಸನ್‌ಬರ್ನ್‌ಗೆ ಕಾರಣವಾಗುವ ಫಿಲ್ಟರ್ ಮಾಡದ ವಿಕಿರಣವನ್ನು ಜೆಲ್‌ನಲ್ಲಿರುವ ಎನ್–ಅಸಿಟೈಲ್‌ಸಿಸ್ಟೈನ್‌ನಿಂದ ತಕ್ಷಣವೇ ಚಿಕಿತ್ಸೆ ನೀಡಬಹುದಾಗಿದೆ. ಜೆಲ್‌ನಲ್ಲಿರುವ ಚರ್ಮದ ಹೊಳಪು, ಬಿಳುಪುಗೊಳಿಸುವ ಏಜೆಂಟ್ ಗ್ಲುಟಾಥಿಯೋನ್ ಸನ್‌ಬರ್ನ್‌ನಿಂದ ಸಂಗ್ರಹವಾಗುವ ಗಾಯದ ರಚನೆಯನ್ನು ಕಡಿಮೆ ಮಾಡಲು ಸಹಾಯ ಮಾಡುತ್ತದೆ’ ಎಂದರು.

‘ಸೂರ್ಯನ ಬೆಳಕಿಗೆ ನಿರಂತರವಾಗಿ ಒಡ್ಡಿಕೊಳ್ಳುವುದರಿಂದ ಚರ್ಮದ ಮೇಲೆ ಕಪ್ಪು ತೇಪೆಗಳ ರಚನೆಯನ್ನು ಕಡಿಮೆ ಮಾಡುತ್ತದೆ. ಹೀಗಾಗಿ, ಹೊಸದಾಗಿ ತಯಾರಾದ ಅಲೋವೆರಾ–ಸೌತೆಕಾಯಿ ಜೆಲ್, ಸೂರ್ಯನ ವಿಕಿರಣವನ್ನು ಫಿಲ್ಟರ್ ಮಾಡಲಿದೆ. ಬಿಸಿಲಿನ ಬೇಗೆಯ ಚಿಕಿತ್ಸೆ ಮತ್ತು ಸನ್‌ಬರ್ನ್‌ನಿಂದ ಚರ್ಮದ ಮೇಲೆ ಕಪ್ಪು ಕಲೆಗಳ ರಚನೆಯನ್ನು ಕಡಿಮೆ ಮಾಡುವ ಮೂರು ಆಯಾಮಗಳಲ್ಲಿ ಕಾರ್ಯನಿರ್ವಹಿಸುವ ಮೂಲಕ ಚರ್ಮಕ್ಕೆ ಸಮಗ್ರ ರಕ್ಷಣೆ ನೀಡುತ್ತದೆ’ ಎಂದು ಹೇಳಿದರು.

‘ಪಿಎಚ್‌.ಡಿ ವಿದ್ಯಾರ್ಥಿ ದೀಪಕ್ ಕುಮಾರ್ ಸಾಹೂ ಮತ್ತು ಎಂಎಸ್ಸಿ ವಿದ್ಯಾರ್ಥಿನಿ ಪೂಜಾ ನನ್ನ ಮಾರ್ಗದರ್ಶನದಲ್ಲಿ ಕೆಲಸ ಮಾಡಿದ್ದಾರೆ. ಇದನ್ನು ಪ್ರತಿಷ್ಠಿತ ಜರ್ನಲ್ ಜೆ. ಫೋಟೊಕೆಮ್‌ನಲ್ಲಿ ಪ್ರಕಟಿಸಲಾಗಿದೆ. ಈ ಸಂಶೋಧನೆ ಭಾರತ ಸರ್ಕಾರದ ಆಯುಷ್ ಯೋಜನೆಯ ಆಶಯದಂತಿದೆ’ ಎಂದರು.