ಮುನ್ನೊಳ್ಳಿ: ಗಂಗಮ್ಮನ ಕೆರೆ ಜೀರ್ಣೋದ್ಧಾರ

ಆಳಂದ: ತಾಲ್ಲೂಕಿನ ಮುನ್ನೊಳ್ಳಿ ಗ್ರಾಮದಲ್ಲಿ ಹಾಳುಬಿದ್ದಿದ್ದ ಗಂಗಮ್ಮನ ಕೆರೆ ಜೀರ್ಣೋದ್ಧಾವಾಗಿದ್ದು, ಕೆರೆಗೆ ಹೊಸ ಕಳೆ ಬಂದಿದೆ.

ಧರ್ಮಸ್ಥಳ ಗ್ರಾಮಾಭಿವೃದ್ಧಿ ಸಂಸ್ಥೆ ಹಾಗೂ ನರೇಗಾ ಯೋಜನೆ ನೆರವಿನಿಂದ ಕೆರೆಯ ಕಾಯಕಲ್ಪ ಮಾಡಲಾಗಿದ್ದು, ಮಳೆಗಾಲಕ್ಕಾಗಿ ಕಾಯುತ್ತಿದೆ.

ಗ್ರಾಮಕ್ಕೆ ಹೊಂದಿಕೊಂಡಿದ್ದು, 7 ಎಕರೆ ಪ್ರದೇಶದಲ್ಲಿರುವ ಕೆರೆಯನ್ನು 1972 ರ ಬರಗಾಲ ಕಾಮಗಾರಿ ಅಡಿಯಲ್ಲಿ ಹೊಸದಾಗಿ ನಿರ್ಮಿಸಲಾಗಿತ್ತು. ಈ ಕೆರೆಯು ಮುನ್ನೊಳ್ಳಿ ಗ್ರಾಮದ ಕುಡಿಯುವ ನೀರಿನ ಮೂಲವಾಗಿತ್ತು. ಕಳೆದ 10 ವರ್ಷದಿಂದ ಕೆರೆಯಲ್ಲಿ ಹೂಳು ತುಂಬಿ ನೀರಿನ ಸಂಗ್ರಹ ಕಡಿಮೆಯಾಗಿತ್ತು. ಇದರಿಂದ ಜನ ಜಾನುವಾರಿಗೆ ನೀರಿನ ಸಂಕಷ್ಟ ಎದುರಾಗಿತ್ತು.

ಪ್ರಸಕ್ತ ವರ್ಷ ಬೇಸಿಗೆ ಆರಂಭದಲ್ಲಿ ನೀರಿನ ಸಮಸ್ಯೆ ಪರಿಹಾರಕ್ಕೆ ಇಲ್ಲಿಯ ಗ್ರಾ.ಪಂ ಅಧ್ಯಕ್ಷ ರಾಜಕುಮಾರ ಚವ್ಹಾಣ ನೇತೃತ್ವದಲ್ಲಿ ಧರ್ಮಸ್ಥಳ ಗ್ರಾಮೀಣಾಭಿವೃದ್ಧಿ ಯೋಜನೆಯ ಸಹಕಾರದೊಂದಿಗೆ ಕೆರೆ ಜೀರ್ಣೊದ್ಧಾರ ಕಾಮಗಾರಿಗೆ ಯೋಜನೆ ರೂಪಿಸಲಾಯಿತು. ಧರ್ಮಸ್ಥಳ ಸಂಸ್ಥೆಯು ₹ 18 ಲಕ್ಷ ಅನುದಾನದ ಕ್ರಿಯಾಯೋಜನೆ ಸಿದ್ಧಪಡಿಸಿದರೆ, ಮುನ್ನೊಳ್ಳಿ ಗ್ರಾ.ಪಂ ನರೇಗಾ ಯೋಜನೆಯಡಿ ₹ 10 ಲಕ್ಷದ ಅನುದಾನದ ಕ್ರಿಯಾಯೋಜನೆ ರೂಪಿಸಿ, ಕಾಮಗಾರಿ ಆರಂಭಿಸಿದರು.

ನರೇಗಾ ಯೋಜನೆಯಡಿ ಗ್ರಾಮದ 200 ಕೂಲಿಕಾರ್ಮಿಕರು, ಟ್ರ್ಯಾಕ್ಟರ್‌, ಟಿಪ್ಪರ್‌ ವ್ಯವಸ್ಥೆ ಕೈಗೊಳ್ಳಲಾಯಿತು. ಧರ್ಮಸ್ಥಳ ಯೋಜನೆಯಡಿ ಹಿಟಾಚಿ ಮಷಿನ್‌ ಸೇರಿದಂತೆ ಅಗತ್ಯ ಹೂಳೆತ್ತುವ ಯಂತ್ರ ಸಾಮಗ್ರಿ ನೆರವು ಒದಗಿಸಲಾಯಿತು.

ಕಳೆದ 20 ದಿನಗಳಿಂದ ಆರಂಭಗೊಂಡ ಕೆರೆ ಹೂಳೆತ್ತುವ ಕಾಮಗಾರಿ ಹಾಗೂ ಕೆರೆಗೆ ಸುತ್ತಲು ಕಲ್ಲಿನ ತಡೆಗೋಡೆ ನಿರ್ಮಾಣವು ಭರದಿಂದ ಸಾಗಿದೆ. ಶೇ 70ರಷ್ಟು ಕಾಮಗಾರಿಯು ಈಗ ಪೂರ್ಣಗೊಂಡಿದೆ. ಅಂದಾಜು 8 ಅಡಿ ಆಳದ ಹೂಳೆತ್ತುವ ಕಾರ್ಯ ಕೈಗೊಂಡ ಪರಿಣಾಮ ಈ ಹಿಂದಿಗಿಂತ 3 ಪಟ್ಟು ಹೆಚ್ಚು ನೀರು ಸಂಗ್ರಹವಾಗಲಿದೆ ಎಂದು ಗ್ರಾ.ಪಂ ಅಧ್ಯಕ್ಷ ರಾಜಕುಮಾರ ಚವ್ಹಾಣ ತಿಳಿಸಿದರು.

ಕೆರೆ ಜೀರ್ಣೋದ್ಧಾರ ಕಾಮಗಾರಿಯಷ್ಟೇ ಕೈಗೊಳ್ಳದೆ ಕೆರೆಗೆ ನೀರು ಹರಿದು ಬರಲಿರುವ ಮಾರ್ಗದ ಸಣ್ಣ ನಾಲಾ, ಚೆಕ್‌ಡ್ಯಾಮ್‌ಗಳಲ್ಲಿನ ಹೂಳು ಸಹ ಎತ್ತಲಾಗಿದೆ. ಹೀಗಾಗಿ ಈ ಬಾರಿ ಕೆರೆಯಲ್ಲಿ ಹೆಚ್ಚಿನ ಪ್ರಮಾಣದಲ್ಲಿ ನೀರು ಸಂಗ್ರಹಗೊಳ್ಳಲಿದೆ. ಸುತ್ತಲೂ ಅಂತರ್ಜಲದ ಪ್ರಮಾಣವು ಅಧಿಕಗೊಳ್ಳಲಿದೆ. ಮಳೆಗಾಲ ಆರಂಭವಾಗುವ ಮುನ್ನ ಕಾಮಗಾರಿಯು ಸಂಪೂರ್ಣಗೊಳಿಸುವ ಉದ್ದೇಶದಿಂದ ಗ್ರಾ.ಪಂ ಅಧ್ಯಕ್ಷ, ಸದಸ್ಯರು ಮತ್ತು ಧರ್ಮಸ್ಥಳ ಸಂಸ್ಥೆಯ ಅಧಿಕಾರಿಗಳು ಹೆಚ್ಚಿನ ಮುತುವರ್ಜಿವಹಿಸಿ ಕೆರೆ ಕಾಮಗಾರಿ ಮೇಲೆ ನಿಗಾವಹಿಸಿದ್ದಾರೆ.

ಬೇಸಿಗೆಯಲ್ಲಿ ಗ್ರಾಮದ ಕೂಲಿಕಾರ್ಮಿಕರಿಗೂ ನರೇಗಾ ಉದ್ಯೋಗ ನೀಡಿದ್ದು, ವಿಶೇಷವಾಗಿ ನರೇಗಾ ಯೋಜನೆಯು ಸದ್ಬಳಕೆ ಆಗಿರುವುದು ಗ್ರಾಮಸ್ಥರಿಗೆ ಹೆಚ್ಚು ಖುಷಿ ತಂದಿದೆ. ವರುಣನ ಆಗಮನಕ್ಕೆ ಗಂಗಮ್ಮನ ಕೆರೆಯು ನವವಧುವಿನಂತೆ ಸಿಂಗಾರಗೊಂಡು ಕಾಯುತ್ತಿದೆ.