ಹಲ್ಲೆ: ಅಪರಾಧಿಗೆ 6 ತಿಂಗಳು ಶಿಕ್ಷೆ

ಫರಹತಾಬಾದ್‌ ಪೊಲೀಸ್ ಠಾಣೆ ವ್ಯಾಪ್ತಿಯ ಜೋಗೂರು ಗ್ರಾಮದ ನಿವಾಸಿ ಯೂಸೂಫ್ ಹುಸೇನಿ ಶಿಕ್ಷೆಗೆ ಒಳಗಾದವರು.

ಯೂಸೂಫ್ ಅವರು ಟ್ರ್ಯಾಕ್ಟರ್ ಖರೀದಿಗೆ ಇದೇ ಗ್ರಾಮದ ನಿವಾಸಿ ಜಗದೇವಿ ಅವರ ಬಳಿ ₹3 ಲಕ್ಷ ಸಾಲ ಪಡೆದು, 5 ರಿಂದ 6 ತಿಂಗಳಲ್ಲಿ ವಾಪಸ್ ನೀಡುವುದಾಗಿ ಭರವಸೆ ನೀಡಿದ್ದರು. ಎರಡು ವರ್ಷ ಕಳೆದರೂ ಸಾಲದ ಹಣ ಮರುಪಾವತಿಸಿರಲಿಲ್ಲ. ಹೀಗಾಗಿ, 2015ರ ಏಪ್ರಿಲ್ 28ರಂದು ಸಾಲ ಹಣದ ಬದಲಿಗೆ ಟ್ರ್ಯಾಕ್ಟರ್‌ ತೆಗೆದುಕೊಂಡು ಹೋಗುತ್ತಿದ್ದ ಶರಣು ದೇವೀಂದ್ರಪ್ಪ ಮತ್ತು ದೇವಿಂದ್ರಪ್ಪ ಭಾಸಗಿ ಅವರ ಮೇಲೆ ಯೂಸೂಫ್ ಚಾಕುವಿನಿಂದ ಹಲ್ಲೆ ಮಾಡಿ, ಅವಾಚ್ಯ ಪದಗಳಿಂದ ನಿಂದಿಸಿ ಕೊಲೆಗೆ ಯತ್ನಿಸಿದ್ದ. ಈ ಗಲಾಟೆಯಲ್ಲಿ ಶರಣು ಮತ್ತು ದೇವೀಂದ್ರಪ್ಪ ಅವರಿಗೆ ಗಾಯಗಳಾಗಿದ್ದವು. ಈ ಸಂಬಂಧ ಫರಹತಾಬಾದ್ ಪೊಲೀಸ್ ಠಾಣೆಯ ಅಧಿಕರಿಗಳು ಯೂಸೂಫ್ ವಿರುದ್ಧ ಪ್ರಕರಣ ದಾಖಲಿಸಿ ತನಿಖೆ ನಡೆಸಿ ದೋಷಾರೋಪಣೆ ಪಟ್ಟಿಯನ್ನು ನ್ಯಾಯಾಲಯಕ್ಕೆ ಸಲ್ಲಿಸಿದ್ದರು.

3ನೇ ಹೆಚ್ಚುವರಿ ಜಿಲ್ಲಾ ಮತ್ತು ಸೆಷೆನ್ಸ್ ನ್ಯಾಯಾಲಯದ ನ್ಯಾಯಾಧೀಶ ಚಂದ್ರಶೇಖರ ಕರೋಶಿ ಅವರು ಯೂಸೂಫ್‌ ವಿರುದ್ಧ ವಿವಿಧ ಕಾಯ್ದೆಗಳ ಅಡಿ ಅಪರಾಧಕ್ಕೆ 6 ತಿಂಗಳು ಜೈಲು ಶಿಕ್ಷೆ, ₹21 ಸಾವಿರ ದಂಡ ವಿಧಿಸಿದ್ದಾರೆ. ದಂಡದಲ್ಲಿ ₹20 ಸಾವಿರ ಗಾಯಾಳು ದೇವಿಂದ್ರಪ್ಪ ಅವರಿಗೆ ನೀಡಬೇಕು ಎಂದು ಆದೇಶಿಸಿದ್ದಾರೆ. ಸರ್ಕಾರದ ಪರವಾಗಿ 3ನೇ ಹೆಚ್ಚುವರಿ ಸರ್ಕಾರಿ ಅಭಿಯೋಜಕ ಗುರುಲಿಂಗಪ್ಪ ಶ್ರೀಮಂತ ತೇಲಿ ಅವರು ವಾದ ಮಂಡಿಸಿದರು.