ಕಲಬುರಗಿ: ಶೇ 32ರಷ್ಟು ಎಚ್ಎಸ್‌ಆರ್‌ಪಿ ಅಳವಡಿಕೆ

ಆನ್‌ಲೈನ್‌ನಲ್ಲಿ ಅರ್ಜಿ ಹಾಕುವಾಗಲೇ ಫಲಕದ ತಯಾರಿಕೆ ಸಾರಿಗೆ ಸಂಸ್ಕರಣೆ ಸರ್ವೀಸ್ ಜೋಡಣೆ ಸೇರಿದಂತೆ ತೆರಿಗೆ ಶುಲ್ಕವೂ ಕಡಿತವಾಗುತ್ತದೆ. ಆದರೆ ಕೆಲವು ಶೋರೂಂಗಳು ಹೊಸ ಫಲಕದ ಅಪ್‌ಗ್ರೇಡ್‌ ಮತ್ತು ಜೋಡಣೆಯ ನೆಪ ಹೇಳಿ ₹50 ಹೆಚ್ಚುವರಿಯಾಗಿ ವಸೂಲಿ ಮಾಡುತ್ತಿವೆ. ಇದಕ್ಕೆ ಯಾವುದೇ ರಸೀದಿ ಸಹ ನೀಡುತ್ತಿಲ್ಲ ಎಂಬ ದೂರುಗಳು ಕೇಳಿಬರುತ್ತಿವೆ. ‘ಆನ್‌ಲೈನ್‌ನಲ್ಲಿ ನಮೂದಿಸಿದ್ದ ಶೋರೂಂಗೆ ತೆರಳಿ ನನ್ನ ಬೈಕ್‌ಗೆ ಹೊಸ ಫಲಕ ಜೋಡಣೆ ಮಾಡಿಸಿದ್ದೆ. ಫೋಟೋ ತೆಗೆದು ಕಳುಹಿಸಬೇಕಿದೆ ಎಂದು ಹೇಳಿ ₹50 ಪಡೆದರೂ ರಸೀದಿ ಕೊಡಲಿಲ್ಲ’ ಎಂದು ಪ್ರಕಾಶ ‘ಪ್ರಜಾವಾಣಿ’ಗೆ ತಿಳಿಸಿದರು. ‘ಕೆಲವು ವೆಬ್‌ಸೈಟ್‌ಗಳಲ್ಲಿ ನೇರವಾಗಿ ಮನೆಗೆ ಕಳುಹಿಸುವ ಆಯ್ಕೆ ಇಲ್ಲ. ಶೋರೂಂಗೆ ಮಾತ್ರವೇ ಕಳುಹಿಸುತ್ತಿವೆ. ಅವುಗಳ ನಡುವೆ ಎಂತಹ ಒಪ‍್ಪಂದ ಆಗಿದೆಯೋ ಗೊತ್ತಿಲ್ಲ’ ಎಂದು ಪ್ರಾದೇಶಿಕ ಸಾರಿಗೆ ಕಚೇರಿಯ ಅಧಿಕಾರಿಯೊಬ್ಬರು ಹೇಳಿದರು.