ಅಧಿಕಾರಿಗಳ ಆಲಸ್ಯ: ಸಿಇಒ ಅಸಮಾಧಾನ

ಕೋಲಾರ: ಉದ್ಯೋಗಖಾತ್ರಿ ಯೋಜನೆ ಜಾರಿಯಲ್ಲಿ ಅವ್ಯವಹಾರ, ಅಕ್ರಮ­ವಾಗಿ ಯಂತ್ರಗಳ ಬಳಕೆ, ಕೆಲಸ ನೀಡದಿರು­ವುದು ಸೇರಿದಂತೆ ಹಲವು ದೂರುಗಳ ಪರಿಶೀಲನೆಯಲ್ಲಿ ಅಧಿಕಾರಿ­ಗಳು ಆಲಸ್ಯ, ವಿಳಂಬ ಧೋರಣೆ ತೋರುವುದು ಸರಿ­ಯಲ್ಲ ಎಂದು ಜಿಲ್ಲಾ ಪಂಚಾಯತಿ ಮುಖ್ಯ ಕಾರ್ಯನಿರ್ವ­ಹಣಾಧಿಕಾರಿ ಆರ್‌.ವಿನೋತ್‌ ಪ್ರಿಯಾ ಹೇಳಿದರು.

ನಗರದ ಜಿಲ್ಲಾ ಪಂಚಾಯತಿಯ ಮಿನಿ ಸಭಾಂಗಣದಲ್ಲಿ ಶುಕ್ರವಾರ ಉದ್ಯೋಗ­­ಖಾತ್ರಿ ದೂರುಗಳ ಪರಿ­ಶೀಲನಾ ಸಭೆಯಲ್ಲಿ ಮಾತನಾಡಿದ ಅವರು, ಸ್ಥಳ ಭೇಟಿ ಮಾಡುವುದು, ಸರ್ಕಾರದಿಂದ ಕಡತಗಳನ್ನು ವಾಪಸು ತರುವುದು ಸೇರಿದಂತೆ ಹಲವು ಜವಾ­ಬ್ದಾರಿಗಳ ನಿರ್ವಹಣೆಯಲ್ಲಿ ಅಧಿಕಾರಿ­ಗಳು ಚುರುಕಾಗಿಲ್ಲ ಎಂದು ಅಸಮಾ­ಧಾನ ವ್ಯಕ್ತಪಡಿಸಿದರು.

ಬಂಗಾರಪೇಟೆ ತಾಲ್ಲೂಕಿನ ಐನೋರ­ಹೊಸಳ್ಳಿ ಗ್ರಾಮ ಪಂಚಾಯತಿಯಿಂದ ಖಾತ್ರಿ ಯೋಜನೆಯ ಕಡತಗಳನ್ನು ಪಡೆ­ದಿದ್ದ ಖಾತ್ರಿ ಯೋಜನೆ ನಿರ್ದೇಶಕರು, ಕಡತಗಳನ್ನು ವಾಪಸು ಪಡೆಯುವಂತೆ ಸೂಚಿಸಿ ಒಂದು ತಿಂಗಳಾದರೂ ತಾಲ್ಲೂಕು ಪಂಚಾಯತಿ ಸಹಾಯಕ ನಿರ್ದೇಶಕ ಮಹದೇವಪ್ಪ ಅವರಾಗಲೀ ಪಂಚಾಯತಿ ಅಭಿವೃದ್ಧಿ ಅಧಿಕಾರಿ­ಯಾಗಲೀ ವಾಪಸು ಪಡೆಯದೇ ಇರು­ವುದು ಸಭೆಯಲ್ಲಿ ಬೆಳಕಿಗೆ ಬಂತು.

ಮೂರು ದಿನದೊಳಗೆ ಕಡತಗಳನ್ನು ತರುವುದಾಗಿ ಮಹದೇವಪ್ಪ ತಿಳಿಸಿದಾಗ, ನಾಳೆಯೇ ಹೋಗಿ ಕಡತಗಳನ್ನು ತನ್ನಿ ಎಂದು ವಿನೋತ್ ಪ್ರಿಯಾ ಸೂಚಿ­ಸಿದರು.

ಹಣ ಕೊಡಬೇಡಿ: ಮುಳಬಾಗಲು ತಾಲ್ಲೂಕಿನ ಗುಡಿಪಲ್ಲಿ ಸೇರಿದಂತೆ ಜಿಲ್ಲೆಯ ಐದು ಗ್ರಾಮ ಪಂಚಾಯತಿ­ಗಳಲ್ಲಿ ಅವ್ಯವಹಾರ ನಡೆದ ದೂರುಗಳ ಹಿನ್ನೆಲೆಯಲ್ಲಿ ಕಾಮಗಾರಿ­ಗಳ ಹಣ ಬಿಡು­ಗಡೆ ಮಾಡಬಾರದು ಎಂದು ಅವರು ಸೂಚಿಸಿ­ದರು.

ವಿಳಂಬ: ದೂರು ನೀಡಿ ಎರಡು–ಮೂರು ತಿಂಗಳಾದರೂ ಕ್ರಮ ಕೈಗೊಳ್ಳ­ದಿರುವುದು ಕೂಡ ಸಭೆಯಲ್ಲಿ ಬೆಳಕಿಗೆ ಬಂತು.
ಕೋಲಾರ ತಾಲ್ಲೂಕಿನ ಮದ್ದೇರಿ­ಯಲ್ಲಿ ರಸ್ತೆ ಸಂಪರ್ಕ ಕಲ್ಪಿಸಬೇಕು ಎಂದು ಕೋರಿ ಫೆಬ್ರುವರಿಯಲ್ಲಿಯೇ ದೂರು ಸಲ್ಲಿಸಿದರೂ ಕ್ರಮ ಕೈಗೊಂಡಿಲ್ಲ. ಕೊಂಡರಾಜನಹಳ್ಳಿಯ ದಲಿತರ ಕಾಲೊನಿಯಲ್ಲಿ ನಿರ್ಮಿಸಿದ್ದ ಚರಂಡಿ­ಯನ್ನು ದುಷ್ಕರ್ಮಿಗಳು ಧ್ವಂಸ ಮಾಡಿ­ದ್ದಾರೆ ಎಂದು ಮಾರ್ಚ್‌ನಲ್ಲಿ ಸಲ್ಲಿಸಿದ ದೂರಿಗೂ ಕ್ರಮ ಕೈಗೊಂಡಿಲ್ಲ ಎಂದು ಮುಖ್ಯ ಕಾರ್ಯನಿರ್ವಹಣಾಧಿ­ಕಾರಿ­ಗಳು ಕೋಲಾರ ತಾಲ್ಲೂಕು ಪಂಚಾ­­­ಯತಿ ಸಹಾಯಕ ನಿರ್ದೇಶಕ ರಾಜಣ್ಣ ಅವರ ಕಡೆಗೆ ಅಸಮಾಧಾನದ ನೋಟ ಬೀರಿದರು.

ನೋಟಿಸ್‌ ಕ್ರಮವಲ್ಲ: ಈ ಎರಡೂ ದೂರುಗಳ ಸಂಬಂಧ ಗ್ರಾಮ ಪಂಚಾ­ಯತಿಗಳಿಗೆ ನೋಟಿಸ್‌ ನೀಡಲಾಗಿದೆ ಎಂದು ಸ್ಪಷ್ಟನೆ ನೀಡಿದ ರಾಜಣ್ಣ ಅವರ ಮಾತನ್ನು ಒಪ್ಪದ ಮುಖ್ಯ ಕಾರ್ಯ­ನಿರ್ವಹಣಾಧಿಕಾರಿಗಳು, ನೋಟಿಸ್‌ ನೀಡುವುದು ಕ್ರಮವಲ್ಲ. ನೋಟಿಸ್‌ ನೀಡಿದ ಬಳಿಕ ಯಾವ ಕ್ರಮ ಕೈಗೊಳ್ಳ­ಲಾಗಿದೆ ಎಂಬುದು ಮುಖ್ಯ. ಆ ಬಗ್ಗೆ ಮುಂದಿನ ಸಭೆಯಲ್ಲಿ ಮಾಹಿತಿ ನೀಡಿ ಎಂದು ಸೂಚಿಸಿದರು.
ತನಿಖೆ ಮಾಡಿ: ಫಾರಂ 6 ನೀಡಿದ್ದರೂ ಯೋಜನೆ ಅಡಿ ಕೆಲಸ ನೀಡಿಲ್ಲ ಎಂದು ತೊಟ್ಲಿ ಗ್ರಾಮದ ಟಿ.ಮುನಿರಾಜು ಎಂಬು­­­­­ವವರು ಸಲ್ಲಿಸಿದ ದೂರಿನ ಹಿನ್ನೆ­ಲೆ­ಯಲ್ಲಿ ತನಿಖೆಗೆ ಸೂಚಿ­ಸಿದರು.

‘ನರೇಗಾ’ ಅಂತರ್ಜಾಲ ತಾಣದಲ್ಲಿ ದೂರು­ದಾರರ ಜಾಬ್‌ ಕಾರ್ಡ್ ಪರಿಶೀಲಿಸಿ, ಅವರಿಗೆ ಕೆಲಸ ನೀಡಿರುವ ಕುರಿತು ದಾಖಲಾಗಿದೆಯೇ ಇಲ್ಲವೇ ಎಂಬುದನ್ನು ಪತ್ತೆ ಹಚ್ಚಿ, ಕ್ರಮ ಕೈಗೊಳ್ಳಿ ಎಂದರು.

ಚುನಾವಣೆ ಹೊಣೆ: ತೊಟ್ಲಿ, ಶಾಪೂರಿ­ನಿಂದ ಸಲ್ಲಿಸಲಾಗಿದ್ದ ದೂರುಗಳ ತನಿಖೆ ನಡೆದಿಲ್ಲ. ಜಿಲ್ಲಾ ಪಂಚಾಯತಿ ಯೋಜನಾ ನಿರ್ದೇಶಕ ಚೆಲುವರಾಜ್‌ ಅವರು ಲೋಕಸಭಾ ಚುನಾವಣೆಯ ಸಹಾಯಕ ಚುನಾವಣಾಧಿಕಾರಿ­ಯಾಗಿ­ದ್ದರಿಂದ, ಮುಂದಿನ ದಿನಗಳಲ್ಲಿ ತನಿಖೆ ನಡೆಸಲಾಗುವುದು ಎಂದು ಜಿಲ್ಲಾ ಪಂಚಾಯತಿ ಸಹಾಯಕ  ಯೋಜನಾಧಿ­ಕಾರಿ ಮೋಹನ್ ಕುಮಾರ್‌ ತಿಳಿಸಿದರು.

ಉದ್ಯೋಗಖಾತ್ರಿ ಯೋಜನೆಯ ಒಂಬುಡ್ಸ್‌ಮನ್ ಗೋವಿಂದಪ್ಪ, ಮುಳ­ಬಾಗಲು ತಾಲ್ಲೂಕು ಪಂಚಾಯತಿ ಕಾರ್ಯನಿರ್ವಹಣಾಧಿಕಾರಿ ಟಿ.ವಿ.­ಅರುಣ್‌­ಕುಮಾರ್‌, ಮಾಲೂರು ತಾಲ್ಲೂಕು ಪಂಚಾಯತಿ ಕಾರ್ಯ­ನಿರ್ವ­ಹಣಾಧಿಕಾರಿ ಸಂಜೀವಪ್ಪ ಉಪ­ಸ್ಥಿತ­ರಿದ್ದರು.

ಗುಡಿಪಲ್ಲಿ ಅವ್ಯವಹಾರ ತನಿಖೆಗೆ ತಂಡ
ಮುಳಬಾಗಲು ತಾಲ್ಲೂಕಿನ ಗುಡಿಪಲ್ಲಿಯಲ್ಲಿ ಯೋಜನೆಯ ಕಾಮಗಾರಿ­ಗಳಲ್ಲಿ ಅವ್ಯವಹಾರ ನಡೆದಿರುವ ಹಿನ್ನೆಲೆಯಲ್ಲಿ ತನಿಖೆ ನಡೆಸಲು ತಂಡವನ್ನು ರಚಿಸಬೇಕು ಎಂದು ತಾಲ್ಲೂಕು ಪಂಚಾಯತಿ ಕಾರ್ಯನಿರ್ವಹಣಾಧಿಕಾರಿ ಟಿ.ವಿಅರುಣ್‌ಕುಮಾರ್‌ ಮನವಿ ಮಾಡಿದರು.