ಕೋಲಾರ | ವರ್ಷಾಂತ್ಯಕ್ಕೆ 272 ಕೆರೆಗಳಿಗೆ ನೀರು

‘ಕೆ.ಸಿ.ವ್ಯಾಲಿ ಯೋಜನೆ ಬಗ್ಗೆ ಜೆಡಿಎಸ್‌ ಪಕ್ಷದವರು ಸೇರಿದಂತೆ ಹಲವರು ಅಪಪ್ರಚಾರ ಮಾಡುತ್ತಿದ್ದಾರೆ. ಜೆಡಿಎಸ್‌ನ ಮುಖಂಡರೊಬ್ಬರು ನ್ಯಾಯಾಲಯಕ್ಕೂ ಹೋಗಿದ್ದಾರೆ. ಅದರೆ, ಕೆ.ಸಿ.ವ್ಯಾಲಿಯಿಂದ ಯಾವುದೇ ಸತ್ಯಾಂಶವಿಲ್ಲ ಎಂಬುವುದು ಈಗಾಗಲೇ ಸಾಬೀತಾಗಿದೆ. ಬೆಳೆಗಳಿಗೆ, ದನಕರುಗಳಿಗೆ, ಪಕ್ಷಿಗಳಿಗೆ ಯಾವುದೇ ತೊಂದರೆ ಇಲ್ಲ ಎಂದು ನಿರೂಪಿತವಾಗಿದೆ’ ಎಂದು ಸಿದ್ದರಾಮಯ್ಯ ಹೇಳಿದರು. ‘ಕೋಲಾರ ಜಿಲ್ಲೆಯಲ್ಲಿ ಈ ಮೊದಲು 1,300 ಅಡಿ ಕೊರೆದರೂ ನೀರು ಬರುತ್ತಿರಲಿಲ್ಲ. ಈಗ ಅಂತರ್ಜಲ ಮಟ್ಟ ಹೆಚ್ಚಿದೆ’ ಎಂದರು.

ಕೆ.ಸಿ.ವ್ಯಾಲಿ ಸಂಸ್ಕರಣಾ ಘಟಕ ಗಳಿಂದ 440 ಎಂಎಲ್‌ಡಿ ನೀರು ಹರಿಸಬೇಕು. ಈಗ ಸರಾಸರಿ 290 ಎಂಎಲ್‌ಡಿ ನೀರು ಲಭ್ಯವಾಗು ತ್ತಿದೆ. ಇನ್ನುಳಿದ 150 ಎಂಎಲ್‌ಡಿ ನೀರು ಬೇಗ ಹರಿಸಿ ಎಂದು ಸಿ.ಎಂ, ಇಲಾಖೆ ಅಧಿಕಾರಿಗಳಿಗೆ ಸೂಚನೆ ನೀಡಿದರು.

ಕೋಲಾರ ಹಾಗೂ ಚಿಕ್ಕ ಬಳ್ಳಾಪುರ ಭಾಗದ ಕಾಂಗ್ರೆಸ್‌ ಶಾಸಕರು ಕೆ.ಸಿ.ವ್ಯಾಲಿ ವ್ಯಾಪ್ತಿಯ ಕೆರೆ ಬಳಿ ಹೋಗಿ‌ ಜನರನ್ನು ಸೇರಿಸಿ ಕಾರ್ಯಕ್ರಮ ಮಾಡಿ ಜಾಗೃತಿ ಮೂಡಿಸಬೇಕು. ಎಲ್ಲಾ ತಾಲ್ಲೂಕುಗಳಲ್ಲಿ ಕಾರ್ಯಕ್ರಮ ಹಮ್ಮಿಕೊಂಡು ಯೋಜನೆಯ ಅನುಕೂಲಗಳನ್ನು ತಿಳಿಸಬೇಕು ಎಂದು ಡಿ.ಕೆ.ಶಿವಕುಮಾರ್‌ ಸೂಚನೆ ನೀಡಿದರು.

ಕೆ.ಸಿ.ವ್ಯಾಲಿ ಎರಡನೇ ಹಂತದ ಯೋಜನೆಯ ಐದನೇ ಪಂಪಿಂಗ್‌ ಕೇಂದ್ರವಾದ ಲಕ್ಷ್ಮಿಸಾಗರದ ಪಂಪ್‌ಹೌಸ್‌ನಿಂದ 5.28 ದಶ ಲಕ್ಷ ಲೀಟರ್‌ (ಎಂಎಲ್‌ಡಿ) ನೀರನ್ನು ಪಂಪ್‌ ಮಾಡಿ 11 ಕೆರೆ ತುಂಬಿಸುವುದು, 1 ಎಂಎಲ್‌ಡಿ ನೀರನ್ನು ಏರು ಕೊಳವೆ ಮಾರ್ಗದ ಮೂಲಕ ಹರಿಸಿ 4 ಕೆರೆ ತುಂಬಿಸುವುದು, 4.95 ಎಂಎಲ್‌ಡಿ ನೀರನ್ನು ಗುರುತ್ವಾಕರ್ಷಣೆಯ ಮೂಲಕ ಹರಿಸಿ 15 ಕೆರೆ ತುಂಬಿಸಲಾಗುತ್ತದೆ. ಒಟ್ಟು 30 ಕೆರೆಗಳಿಗೆ 11.23 ಎಂಎಲ್‌ಡಿ ನೀರು ಹರಿಸಲಾಗುತ್ತದೆ.

ಮಲ್ಲಸಂದ್ರ, ರಾಮಸಂದ್ರ, ಚಾಕರಸನಹಳ್ಳಿ, ಬೆಳಮಾರನಹಳ್ಳಿ, ಗುಟ್ಟಹಳ್ಳಿ, ಕೊರಟಿಮಲ್ಲಂಡಹಳ್ಳಿ–1 ಕೊರಟಿಮಲ್ಲಂಡ ಹಳ್ಳಿ–2, ಮರಿಯಪ್ಪನಹಳ್ಳಿ, ಕಾಮದೇನಹಳ್ಳಿ, ಮಂಚಾಂಡಹಳ್ಳಿ, ವಿಶ್ವನಾಥಪುರ ಕೆರೆ, ಖಾಜಿಕಲ್ಲಹಳ್ಳಿ, ನಾಗಾಲ, ಅಚ್ಚಟನ ಹಳ್ಳಿ–1, ಅಚ್ಚಟನಹಳ್ಳಿ–2, ಮಂಜಲಿ ಕೆರೆ–1, ಮಂಜಲಿ ಕೆರೆ–2, ಕಲ್ಯಾ, ಚೊಕ್ಕಾಪುರ–1, ಚೊಕ್ಕಾಪುರ–2, ಚೊಕ್ಕಾಪುರ–3, ಚನ್ನಪ್ಪನಹಳ್ಳಿ, ಪುರಹಳ್ಳಿ ಕೆರೆ–1, ಪುರಹಳ್ಳಿ ಕೆರೆ–2, ಮೇಡಿಹಳ್ಳಿ ಕೆರೆ–1, ಮೇಡಿಹಳ್ಳ ಕೆರೆ–2, ನಾಗನಲ್ಲ, ಬೂಸನಹಳ್ಳಿ, ಉರುಗಿಲಿ ದಿನ್ನಹಳ್ಳಿ ಕೆರೆ.