ಕೊಪ್ಪಳ: ಆಡಳಿತ ಬಲವರ್ಧನೆಗೆ ತಂತ್ರಜ್ಞಾನದ ಕಣ್ಗಾವಲು

ಕೊಪ್ಪಳ: ಜಿಲ್ಲೆಯ 153 ಗ್ರಾಮ ಪಂಚಾಯಿತಿಗಳಲ್ಲಿರುವ ಅಭಿವೃದ್ಧಿ ಅಧಿಕಾರಿಗಳು (ಪಿಡಿಒ) ಮತ್ತು ಇತರ ಸಿಬ್ಬಂದಿಯ ಆಡಳಿತ ವೈಖರಿ ಮೇಲೆ ಕಣ್ಗಾವಲು ಇರಿಸಲು ಕೊಪ್ಪಳ ಜಿಲ್ಲಾ ಪಂಚಾಯಿತಿ ತಂತ್ರಜ್ಞಾನದ ಮೊರೆ ಹೋಗಿದೆ.

ಜಿಲ್ಲೆಯ ಎಲ್ಲ ಗ್ರಾ.ಪಂ.ಗಳಲ್ಲಿ ಸಿಸಿಟಿವಿ ಕ್ಯಾಮೆರಾಗಳನ್ನು ಅಳವಡಿಸುವ ಪ್ರಕ್ರಿಯೆ ಆರಂಭವಾಗಿದ್ದು ಆಯಾ ಪಂಚಾಯಿತಿಗಳಲ್ಲಿ ನಡೆಯುವ ಕಾರ್ಯಚಟುವಟಿಕೆಗಳು, ಇರುವ ಸಿಬ್ಬಂದಿ, ಅವರು ಮಾಡುವ ಕೆಲಸ ಆ ಕ್ಯಾಮೆರಾಗಳಲ್ಲಿ ದಾಖಲಾಗಿದೆ. ಇದರ ನೇರ ಸಂಪರ್ಕ ಜಿಲ್ಲಾ ಪಂಚಾಯಿತಿಯಲ್ಲಿ ಇರುತ್ತದೆ. ಸಿಇಒ ತಮ್ಮ ಚೇಂಬರ್‌ನಲ್ಲಿದ್ದುಕೊಂಡೇ ಪಂಚಾಯಿತಿಗಳ ಕಾರ್ಯವೈಖರಿ ಮೇಲೆ ಕಣ್ಗಾವಲು ಇರಿಸಲು ಈ ವ್ಯವಸ್ಥೆ ನೆರವಾಗಲಿದೆ.   

ಗ್ರಾಮ ಪಂಚಾಯಿತಿಗಳು ಮತ್ತು ಆ ವ್ಯಾಪ್ತಿಯ ಹಳ್ಳಿಗಳ ಜನ ಪಿಡಿಒ ನಮ್ಮ ಕೈಗೆ ಸಿಗುವುದೇ ಇಲ್ಲ, ಕಚೇರಿಗೆ ಬರುವುದಿಲ್ಲ. ಒಂದು ಸಣ್ಣ ಕೆಲಸಕ್ಕಾಗಿ ತಿಂಗಳಾನುಗಟ್ಟಲೆ ಅಲೆದಾಡಬೇಕಾದ ಪರಿಸ್ಥಿತಿಯಿದೆ ಎಂದು ದೂರುವುದು ಜನರಿಂದ ಸಾಮಾನ್ಯವಾಗಿದೆ. ಹಲವು ಪಿಡಿಒಗಳು ’ಸಭೆ ಇದೆ’ ಎನ್ನುವ ನೆಪ ಹೇಳಿ ಕಚೇರಿಗೆ ಹೋಗುತ್ತಿಲ್ಲ. ತಿಂಗಳಾದರೂ ಜನರ ಕೈಗೆ ಸಿಗುವುದಿಲ್ಲ ಎನ್ನುವ ದೂರುಗಳು ಕೂಡ ವ್ಯಾಪಕವಾಗಿದ್ದವು. ಆದ್ದರಿಂದ ಈಗ ಜಿಲ್ಲಾ ಪಂಚಾಯಿತಿಯೇ ಪಿಡಿಒಗಳಿಗೆ ಸಿಮ್‌ಗಳನ್ನು ನೀಡಿದೆ.

ಕೆಲವು ಪಿಡಿಒಗಳು ತಿಂಗಳಿನ ಅಂತರದಲ್ಲಿಯೇ ವರ್ಗಾವಣೆಯಾಗುತ್ತಿದ್ದಾರೆ. ವರ್ಗಾವಣೆಯಾದ ಜಾಗಕ್ಕೆ ಹೊಸ ಪಿಡಿಒ ಬಂದಾಗ ಅವರ ಮೊಬೈಲ್‌ ನಂಬರ್ ಪಡೆಯಲು ಜನ ಪರದಾಡುವ ಸ್ಥಿತಿಯಿದೆ. ಇನ್ನೂ ಕೆಲವರು ತಿಂಗಳಾನುಗಟ್ಟಲೆ ರಜೆಯ ಮೇಲೆ ಹೋದರೆ ಜನರ ದೈನಂದಿನ ಕಚೇರಿಯ ಚಟುವಟಿಕೆಗೆ ಅಡ್ಡಿಯಾಗುತ್ತದೆ. ಆದ್ದರಿಂದ ಸರ್ಕಾರದ ವತಿಯಿಂದಲೇ ಈಗ ಸಿಮ್‌ ನೀಡಲಾಗಿದೆ. 153 ಗ್ರಾ.ಪಂ.ಗಳ ಪೈಕಿ ಈಗಾಗಲೇ 12ಕ್ಕೆ ಜಿ.ಪಂ. ಮತ್ತು ಗ್ರಾ.ಪಂ. ನಡುವಿನ ತಂತ್ರಜ್ಞಾನದ ಸಂಪರ್ಕ ಕಲ್ಪಿಸಲಾಗಿದೆ. ಇನ್ನೊಂದು ವಾರದಲ್ಲಿ ಒಟ್ಟು 22 ಗ್ರಾ.ಪಂ.ಗಳಿಗೆ ಇದು ವಿಸ್ತರಣೆಯಾಗಲಿದೆ. ಎಲ್ಲ ಗ್ರಾ.ಪಂ.ಗಳಿಗೆ ಇದರ ಸೌಲಭ್ಯ ಅಳವಡಿಸಬೇಕಾದರೆ ಕನಿಷ್ಢ ಎಂಟು ತಿಂಗಳಾದರೂ ಬೇಕಾಗುತ್ತದೆ.