ನಾಗಮಂಗಲ | ಅಂತರ್ಜಲ ಕುಸಿತ; ಜಲಕ್ಷಾಮದ ಭೀತಿ

‘ಬರಪೀಡಿತ ತಾಲ್ಲೂಕು’ ಎಂದು ಘೋಷಣೆಯಾಗಿದ್ದು, ಈ ಬಾರಿ ಮಳೆಗಾಲದಲ್ಲಿ ಸಮರ್ಪಕವಾಗಿ ಮಳೆಯಾಗಿಲ್ಲ. ಬೇಸಿಗೆಗೂ ಮುನ್ನವೇ ಕೆರೆಕಟ್ಟೆ ಸೇರಿದಂತೆ ಜಲಮೂಲಗಳು ಬತ್ತುತ್ತಿದ್ದವು. ಅಲ್ಲದೇ ಮಳೆಯ ಕೊರತೆಯಾದ ಹಿನ್ನೆಲೆಯಲ್ಲಿ ರೈತರು ಬೆಳೆಯನ್ನು ಉಳಿಸಿಕೊಳ್ಳಲು ಕೊಳವೆ ಬಾವಿಗಳನ್ನು ಆಶ್ರಯಿಸಿದ್ದರು. ಆದರೆ ಈಗ ಅಂತರ್ಜಲ ಮಟ್ಟ ತೀವ್ರವಾಗಿ ಕುಸಿದಿದೆ. ಕೆರೆಕಟ್ಟೆಗಳಲ್ಲೂ ನೀರು ಬತ್ತಿರುವುದರಿಂದ ಜನಜಾನುವಾರುಗಳ ಬಳಕೆಗೆ ಮುಂದಿನ ದಿನಗಳಲ್ಲಿ ಮತ್ತಷ್ಟು ನೀರಿನ ಸಮಸ್ಯೆ ಎದುರಾಗಲಿದೆ.

ಬತ್ತಿದ್ದ ಲೋಕಪಾವನಿ, ವೀರವೈಷ್ಣವಿ: ಪ್ರತಿ ವರ್ಷವೂ ವಾಡಿಕೆಯಷ್ಟು ಮಳೆಯಾದಾಗ ವೀರವೈಷ್ಣವಿ ಮತ್ತು ಲೋಕಪಾವನಿ ನದಿ ಮೂಲಗಳ ಹಳ್ಳಕೊಳ್ಳಗಳಲ್ಲಿ ನೀರು ಸಂಗ್ರಹವಾಗಿ ಬೇಸಿಗೆ ನಿರ್ವಹಣೆಗೆ ರೈತರಿಗೆ ಸಹಕಾರಿಯಾಗುತ್ತಿದ್ದು, ಅಂತರ್ಜಲ ಮಟ್ಟವೂ ಸುಧಾರಿಸುತ್ತಿತ್ತು. ಆದರೆ ಈ ಬಾರಿ ವಾಡಿಕೆಗಿಂತಲೂ ಅತ್ಯಂತ ಕನಿಷ್ಠ ಮಳೆಯಾಗಿದ್ದು, ನದಿ ಮೂಲಗಳಲ್ಲಿ ನೀರಿನ ಕೊರತೆ ಕಾಣಿಸಿಕೊಂಡಿತ್ತು.

ಜೊತೆಗೆ ಈಗ ತೀವ್ರ ಬೇಸಿಗೆ ಪ್ರಾರಂಭವಾದ ನಂತರ ಉಳಿದಿದ್ದ ನೀರು ಬತ್ತಿಹೋಗಿ, ಆವಿಯಾಗಿ ಬರಿದಾಗಿದೆ.

ಮತ್ತಷ್ಟು ಗಂಭೀರ: ಈಗಾಗಲೇ ಬೇಸಿಗೆಯಲ್ಲಿ ಪ್ರತಿವರ್ಷಕ್ಕಿಂತ ಅಧಿಕ ತಾಪಮಾನ ಏರಿಕೆಯಾಗಿದ್ದು, ಕೆರೆಕಟ್ಟೆಗಳಲ್ಲಿ ನೀರು ಬರಿದಾಗಿದೆ. ಮುಂದಿನ ಎರಡು ತಿಂಗಳಲ್ಲಿ ಸಮಸ್ಯೆಯು ಮತ್ತಷ್ಟು ಗಂಭೀರತೆ ಪಡೆಯಲಿದೆ. 700-800 ಅಡಿ ಕೊರೆದರೆ ನೀರು ಬರದಂತಾಗಿದ್ದು, ರೈತರಲ್ಲಿ ಆತಂಕ ಮೂಡಿಸಿದೆ. ಹೀಗೆಯೇ ಮುಂದುವರಿದರೆ ಏಪ್ರಿಲ್ ಮತ್ತು ಮೇ ತಿಂಗಳಲ್ಲಿ ಜಾನುವಾರುಗಳ ನಿರ್ವಹಣೆ ಮಾಡುವುದು ಸಹ ಕಷ್ಟವಾಗುತ್ತದೆ ಎಂದು ಮೂಡಲಕೊಪ್ಪಲು ಗ್ರಾಮದ ಯುವ ರೈತ ಪುಟ್ಟರಾಜು ಹೇಳಿದರು.