ಮಂಡ್ಯ: ದಶಕದ ನಂತರ ‘ಮೈಷುಗರ್‌’ ಸಭೆ: ಷೇರುದಾರರನ್ನೇ ತಡೆದ ಕಾರ್ಖಾನೆ ಸಿಬ್ಬಂದಿ

ವಾರ್ಷಿಕ ಸಭೆ ಆರಂಭವಾಗುತ್ತಿದ್ದಂತೆ ರೈತರು ಹಾಗೂ ಷೇರುದಾರರನ್ನು ಸಭೆಗೆ ಒಳಗೆ ಬಿಡಲು ಕಾರ್ಖಾನೆ ಸಿಬ್ಬಂದಿಯು ಬಾಗಿಲಲ್ಲೇ ತಡೆದರು. ಇದಕ್ಕೆ ಪೊಲೀಸರು ಸಾಥ್‌ ನೀಡಿದರು. ಇದರಿಂದ ಕುಪಿತಗೊಂಡ ರೈತರು ಷೇರುದಾರರು ಆಡಳಿತ ಮಂಡಳಿ ವಿರುದ್ಧ ಧಿಕ್ಕಾರ ಕೂಗಿ ಆಕ್ರೋಶ ವ್ಯಕ್ತಪಡಿಸಿದರು. ನಂತರ ಸಿಬ್ಬಂದಿ ಮತ್ತು ಪೊಲೀಸರನ್ನೇ ತಳ್ಳಿಕೊಂಡು ಒಳನುಗ್ಗಿದರು. ನಂತರ ಪರಿಸ್ಥಿತಿ ಅರಿತ ಅಧ್ಯಕ್ಷ ಸಿ.ಡಿ.ಗಂಗಾಧರ್‌ ಅವರು ರೈತರು ಹಾಗೂ ಷೇರುದಾರರನ್ನು ಒಳಗೆ ಬಿಡಿ ಎಂದು ಪೊಲೀಸರಿಗೆ ತಿಳಿಸಿದರು.

ಮೈಷುಗರ್‌ ಅಧ್ಯಕ್ಷ ಸಿ.ಡಿ. ಗಂಗಾಧರ್‌ ಅವರು ‘2025–26ನೇ ಸಾಲಿನಲ್ಲಿ ಕಾರ್ಖಾನೆಗೆ ಸರ್ಕಾರ ₹10 ಕೋಟಿ ಅನುದಾನ ನೀಡಿದೆ. ಅದರಲ್ಲಿ ಕಾರ್ಖಾನೆಯ ಹತ್ತು ವರ್ಷಗಳ ಕಾರ್ಮಿಕರ ಬಾಕಿ ವೇತನ ದುರಸ್ತಿಗಾಗಿ ₹8.78 ಕೋಟಿ ಖರ್ಚು ಮಾಡಲಾಗಿದೆ. 1.19 ಮೆಟ್ರಿಕ್ ಟನ್ ಕಬ್ಬು ನುರಿಸಿ 77570 ಕ್ವಿಂಟಲ್ ಸಕ್ಕರೆ 6700 ಮೆಟ್ರಿಕ್ ಟನ್ ಕಾಕಂಬಿ ಹಾಗೂ 3150 ಮೆಟ್ರಿಕ್ ಟನ್ ಪ್ರಸ್‌ಮಡ್ಡಿ ಉತ್ಪಾದಿಸಲಾಗಿದೆ. ಎಲ್ಲ ಉತ್ಪನ್ನಗಳ ಮಾರಾಟದಿಂದ ಬಂದ ಹಣದಿಂದ ರೈತರಿಗೆ ₹39.23 ಕೋಟಿ ಹಣ ಪಾವತಿಸಲಾಗಿದೆ’ ಎಂದರು. ಮುಂದಿನ 2026-27ನೇ ಸಾಲಿನಲ್ಲಿ 5.80 ಲಕ್ಷ ಟನ್ ಕಬ್ಬು ಅರೆಯಲು ರೈತರಿಂದ ಒಪ್ಪಿಗೆ ಪಡೆಯಲಾಗಿದೆ. ಈ ಹಿಂದೆ ನೀಡಿದ್ದ ಗುರಿಯನ್ನು ಮುಟ್ಟಲು ಸಾಧ್ಯವಾಗಲಿಲ್ಲ. ಆ ತಪ್ಪನ್ನು ಸರಿಪಡಿಸಿಕೊಳ್ಳುತ್ತೇವೆ ಎಂದು ಸಭೆಯಲ್ಲಿ ಕ್ಷಮೆ ಕೇಳಿದರು.