ಬುಧವಾರ, ಆಗಸ್ಟ್ 4, 2021
27 °C
ಬದನೆ, ಸೋರೆ, ಎಲೆಕೋಸು, ಸಿಹಿಗುಂಬಳದ ಧಾರಣೆ ಇಳಿಮುಖ

ಟೊಮೆಟೊ, ಹಸಿಮೆಣಸಿನಕಾಯಿ ದುಬಾರಿ

ಪ್ರಜಾವಾಣಿ ವಾರ್ತೆ Updated:

ಅಕ್ಷರ ಗಾತ್ರ : | |

Prajavani

ಮೈಸೂರು: ನಗರದ ಎಪಿಎಂಸಿ ಮಾರುಕಟ್ಟೆಯಲ್ಲಿ ಟೊಮೆಟೊ ಬೆಲೆ ಈ ವಾರ ಮತ್ತೆ ಏರಿಕೆ ಹಾದಿಗೆ ಹೊರಳಿದೆ. ಕಳೆದ ವಾರ ಸಗಟು ಧಾರಣೆ ದರ 1 ಕೆ.ಜಿ.ಗೆ ₹ 23 ಇದ್ದದ್ದು, ಸೋಮವಾರ ₹ 28ಕ್ಕೆ ಏರಿಕೆಯಾಗಿದೆ.

ಮಾರುಕಟ್ಟೆಗೆ ಟೊಮೆಟೊ ಆವಕ ಹೆಚ್ಚುತ್ತಲೇ ಇದೆ. ಭಾನುವಾರ 1,350 ಕ್ವಿಂಟಲ್‌ ಬಂದಿದ್ದರೆ, ಸೋಮವಾರ 790 ಕ್ವಿಂಟಲ್‌ ಆವಕವಾಗಿದೆ. ಉಳಿದ ತರಕಾರಿಗಿಂತಲೂ ಹೆಚ್ಚಿಗೆ ಬಂದಿದ್ದರೂ, ಕೇರಳ ವರ್ತಕರಿಂದ ಬೇಡಿಕೆ ಹೆಚ್ಚುತ್ತಿರುವುದರಿಂದ ಬೆಲೆಯೂ ಹೆಚ್ಚುತ್ತಿದೆ ಎಂದು ತರಕಾರಿ ವ್ಯಾಪಾರಿ ಕೃಷ್ಣ ತಿಳಿಸಿದರು.

ಹಸಿಮೆಣಸಿನಕಾಯಿ ದರವೂ ಹೆಚ್ಚುತ್ತಿದೆ. ತಿಂಗಳ ಆರಂಭದಲ್ಲಿ ಕೆ.ಜಿ.ಗೆ ₹ 20 ಇತ್ತು. ಈಗ ₹ 27 ಆಗಿದೆ. 13 ದಿನದಲ್ಲಿ ₹ 7 ದುಬಾರಿಯಾಗಿದೆ. ಇದು ಗ್ರಾಹಕರ ಜೇಬಿಗೆ ಹೊರೆಯಾದರೆ, ಬೆಳೆಗಾರರಿಗೆ ಖುಷಿಯ ವಿಷಯವಾಗಿದೆ.

ದಪ್ಪ ಮೆಣಸಿನಕಾಯಿಯ ದರವೂ ದುಬಾರಿಯಾಗುತ್ತಿದೆ. ಹಿಂದಿನ ವಾರ ಸಗಟು ಧಾರಣೆ ಕೆ.ಜಿ.ಗೆ ₹ 53 ಇದ್ದದ್ದು, ಸೋಮವಾರ ₹ 67ಕ್ಕೆ ತಲುಪಿದೆ. ಒಂದೇ ವಾರಕ್ಕೆ ₹ 14 ಹೆಚ್ಚಾಗಿದೆ. ‘ಹಾಪ್‌ಕಾಮ್ಸ್‌’ನಲ್ಲಿ ₹ 84 ಇದೆ.

ಚೇತರಿಕೆಯಿಲ್ಲ: ಬದನೆ, ಸೋರೆಕಾಯಿ, ಸಿಹಿಗುಂಬಳ, ಎಲೆಕೋಸಿನ ದರಗಳು ಈ ವಾರವೂ ಚೇತರಿಕೆ ಕಂಡಿಲ್ಲ. 1 ಕೆ.ಜಿ.ಗೆ ಗರಿಷ್ಠ ಧಾರಣೆ ₹ 5–6ರಲ್ಲೇ ಮುಂದುವರೆದಿದೆ. ₹ 15 ಇದ್ದ ಬೀನ್ಸ್ ಸಗಟು ಬೆಲೆ ₹ 18ಕ್ಕೆ ಏರಿಕೆಯಾಗಿದೆ.

ಬಾಳೆಹಣ್ಣಿನ ದರ ಕೆ.ಜಿ.ಗೆ ₹ 50ರ ಆಸುಪಾಸಿನಲ್ಲೇ ಇದೆ. ಪಚ್ಚಬಾಳೆ ₹ 20. ಮಾವಿನ ಸೀಝನ್‌ ಮುಗಿದಿದ್ದು ಆವಕವೂ ಕ್ಷೀಣಿಸುತ್ತಿದೆ. ನೀಲಂ, ಮಲಗೋವಾ, ತೋತಾಪುರಿ ಮಾತ್ರವೇ ಸಿಗುತ್ತಿದೆ. ರಸಪೂರಿ, ಬಾದಾಮಿ ಮಾವಿನಹಣ್ಣುಗಳ ಆವಕ ತೀರಾ ಕಡಿಮೆಯಾಗಿದೆ.

ತಾಜಾ ಮಾಹಿತಿ ಪಡೆಯಲು ಪ್ರಜಾವಾಣಿ ಟೆಲಿಗ್ರಾಂ ಚಾನೆಲ್ ಸೇರಿಕೊಳ್ಳಿ

ತಾಜಾ ಸುದ್ದಿಗಳಿಗಾಗಿ ಪ್ರಜಾವಾಣಿ ಆ್ಯಪ್ ಡೌನ್‌ಲೋಡ್ ಮಾಡಿಕೊಳ್ಳಿ: ಆಂಡ್ರಾಯ್ಡ್ ಆ್ಯಪ್ | ಐಒಎಸ್ ಆ್ಯಪ್

ಪ್ರಜಾವಾಣಿ ಫೇಸ್‌ಬುಕ್ ಪುಟವನ್ನುಫಾಲೋ ಮಾಡಿ.

ಈ ವಿಭಾಗದಿಂದ ಇನ್ನಷ್ಟು