ಬರಗಾಲದಲ್ಲಿ ಅದ್ಧೂರಿ ದಸರಾ ಬೇಕೇ, ಬೇಡವೇ?

ಸರಳವಾಗಿ ನಡೆಸುವುದು ಸೂಕ್ತ ಮುಂಗಾರು ಕೈ ಕೊಟ್ಟಿರುವ ಈ ಸಂದರ್ಭದಲ್ಲಿ ದಸರೆಯನ್ನು ವಿಜೃಂಭಣೆಯಿಂದ ಆಚರಿಸಿದರೆ ಅದು ಹೊಟ್ಟೆಗೆ ಹಿಟ್ಟಿಲ್ಲವೆಂದರೂ ಜುಟ್ಟಿಗೆ ಮಲ್ಲಿಗೆ ಹೂ ಎಂಬಂತೆ ಆಗುತ್ತದೆ. ರೈತಾಪಿ ವರ್ಗ ಸಂಕಷ್ಟದಲ್ಲಿ ಇರುವಾಗ ವೈಭವಪೂರ್ವವಾಗಿ ದಸರೆ ಆಚರಿಸುವುದನ್ನು ನಾಡದೇವಿ ಸಹ ಒಪ್ಪಲಾರಳು. ಹೀಗಾಗಿ, ಈ ಬಾರಿಯ ದಸರಾ ಸರಳವಾಗಿ ನಡೆಸುವುದೇ ಸೂಕ್ತ.

ಸರಳ, ಸಾಂಪ್ರದಾಯಿಕವಾಗಿರಲಿ: ಈ ವರ್ಷದ ನಾಡಹಬ್ಬ ದಸರೆಯನ್ನು ತುಂಬಾ ಅದ್ಧೂರಿಯಾಗಿ ಆಚರಿಸಲು ಸರ್ಕಾರ ನಿರ್ಧರಿಸಿದೆ. ಈ ಬಾರಿ ಮಳೆ ಇಲ್ಲದೇ ಬರ ಉಂಟಾಗಿ ರೈತರ ಸ್ಥಿತಿ ಚಿಂತಾಜನಕವಾಗಿರುವುದು ಗೊತ್ತಿರುವ ವಿಷಯ. ಈ ನಿಟ್ಟಿನಲ್ಲಿ ಆಡಂಬರದ ದಸರೆಗೆ ಸ್ವಲ್ಪ ಕಡಿವಾಣ ಹಾಕಿ ಸಾಂಪ್ರದಾಯಿಕವಾಗಿ ಉತ್ಸವವನ್ನು ನಡೆಸಲಿ. ರೈತರ ಸಂಕಷ್ಟಕ್ಕೆ ಸರ್ಕಾರ ನಿಲ್ಲಬೇಕಾಗಿದೆ.

ಸರಳ ಆಚರಣೆ ಸೂಕ್ತ: ರಾಜ್ಯದಲ್ಲಿ ಬರಗಾಲವಿದೆ. ಕೆಆರ್‌ಎಸ್‌ ತುಂಬಿಲ್ಲ. ಹೀಗಿರುವಾಗ ರಾಜ್ಯ ಸರ್ಕಾರ ಅದ್ಧೂರಿಯಾಗಿ ದಸರ ಆಚರಣೆ ಮಾಡುತ್ತಿರುವುದು, ಹಸಿದವರ ಕಣ್ಣು ಮುಂದೆ ಕುಳಿತು ಅವರಿಗೆ ಕೊಡದೇ ಮೃಷ್ಟಾನ್ನ ಭೋಜನ ಉಂಡಂತೆ ಆಗುತ್ತದೆ. ಆದ್ದರಿಂದ ಸರಳ ಆಚರಣೆ ಸೂಕ್ತ. ಜನರ ಆಗುಹೋಗು, ಕಷ್ಟ ಕಾರ್ಪಣ್ಯಗಳನ್ನು ಮತ್ತು ಬೇಕು ಬೇಡಗಳನ್ನು ಆಲಿಸುವ ಸಲುವಾಗಿಯೇ ರಾಜ್ಯ ಸರ್ಕಾರ ಇರುವುದು. ಆದಷ್ಟು ಕಡಿಮೆ ವೆಚ್ಚದಲ್ಲಿ ನಾಡಹಬ್ಬ ನಡೆಸಲಿ. ಬರ ಪೀಡಿತ ತಾಲ್ಲೂಕುಗಳಿಗೆ ಬರ ಪರಿಹಾರ ನೀಡಲಿ.

ಸಾಂಪ್ರದಾಯಿಕ ಆಚರಣೆಗೆ ಸೀಮಿತಗೊಳಿಸಿ: ರಾಜ್ಯದಲ್ಲಿ ಭೀಕರ ಬರಗಾಲದ ಪರಿಸ್ಥಿತಿ ಇದೆ. ಮೈಸೂರು ಜಿಲ್ಲೆಯೂ ಬರಪೀಡಿತವಾಗಿದೆ. ಜಿಲ್ಲೆ ಹಾಗೂ ತಾಲ್ಲೂಕಿನ ರೈತರು ಬವಣೆ ಪಡುತ್ತಿದ್ದಾರೆ. ಕಾವೇರಿ, ಕಬಿನಿಯಿಂದ ನೀರನ್ನು ನಂಬಿರುವ ರೈತರಿಗೆ ವ್ಯವಸಾಯಕ್ಕೆ ನೀರು ದೊರಕದೆ ಕೃಷಿ ಚಟುವಟಿಕೆಗೆ ಹಿನ್ನಡೆಯಾಗಿದೆ. ಆದ್ದರಿಂದ ದಸರಾ ಮಹೋತ್ಸವವನ್ನು ಸಾಂಪ್ರದಾಯಿಕ, ಸರಳ ಪೂಜೆಗೆ ಸೀಮಿತಗೊಳಿಸಬೇಕು. ಅದಕ್ಕೆಂದು ಬಳಸಲು ಇಟ್ಟಿರುವ ಹಣವನ್ನು ಬರ ಪರಿಹಾರಕ್ಕೆ ವಿನಿಯೋಗಿಸಬೇಕು.

ನೆರವಿಗೆ ಬಳಸಲಿ: ಈ ಬಾರಿ ರಾಜ್ಯದಲ್ಲಿ ಬರ ಪರಿಸ್ಥಿತಿ, ಮಳೆಯ ಕೊರತೆ ಇದೆ. ನೀರಿಲ್ಲದೇ ಫಸಲು ತೆಗೆಯಲು ರೈತರಿಗೆ ಕಷ್ಟವಾದ್ದರಿಂದ ದಿನಬಳಕೆ ಪದಾರ್ಥಗಳ ಬೆಲೆ ಹೆಚ್ಚಾಗುವ ಸಾಧ್ಯತೆಯೂ ಇದೆ. ಇದು ಜನರಿಗೆ ಹೊರೆಯಾಗಲಿದೆ. ಆದ್ದರಿಂದ ಈ ವರ್ಷ ಸರ್ಕಾರ ದಸರೆಗೆ ಹೆಚ್ಚಿನ ಅನುದಾನ‌ ಬಳಸದೇ ಸರಳವಾಗಿ ಆಚರಿಸಿ ಆ ಹಣವನ್ನು ರೈತರಿಗೆ ನೆರವು ನೀಡಲು ಬಳಸುವುದು ಸೂಕ್ತ. ಸರ್ಕಾರವು ಪ್ರತಿಷ್ಠೆಗಾಗಿ ಸಾರ್ವಜನಿಕ ಹಣವನ್ನು ಬರಗಾಲದಲ್ಲಿ ವ್ಯಯ ಮಾಡುವ ಅಗತ್ಯವಿಲ್ಲ.

ರೈತರ ಬೆಂಬಲಕ್ಕೆ ನಿಲ್ಲಲಿ: ರೈತ ಈ ದೇಶದ ಬೆನ್ನೆಲುಬು. ರಾಜ್ಯದಲ್ಲಿ ಮುಂಗಾರು ಮಳೆ ಕೈಕೊಟ್ಟಿದ್ದು ಬರದ ಆವರಿಸಿದೆ. ಇಂತಹ ಸಂದರ್ಭದಲ್ಲಿ ಅದ್ಧೂರಿ ಅಥವಾ ವಿಜೃಂಭಣೆಯಿಂದ ದಸರಾ ಆಚರಿಸುವುದು ಬೇಡ. ಬರಪೀಡಿತ ತಾಲ್ಲೂಕುಗಳ ಪಟ್ಟಿಯನ್ನು ಸರ್ಕಾರವೇ ಪ್ರಕಟಿಸಿರುವುದರಿಂದ ಅನ್ನದಾತರ ಬೆನ್ನಿಗೆ ನಿಲ್ಲಬೇಕಾಗಿರುವುದು ಸರ್ಕಾರದ ಆದ್ಯ ಕರ್ತವ್ಯವೂ ಹೌದು.

ಸಂಪ್ರದಾಯ ಮುರಿಯುವುದು ಬೇಡ: ಅದ್ಧೂರಿ ಅಥವಾ ಸರಳ ದಸರಾ ಚರ್ಚೆಯಲ್ಲಿ ನಾನಿಲ್ಲ. ಸಾಂಪ್ರದಾಯಿಕವಾಗಿ ನಡೆಸಲಿ. ದಸರಾ ಮಾಡುವಾಗ ಒಂದಷ್ಟು ಹಣ ಖರ್ಚಾಗುತ್ತದೆ. ಅಂದ ಮಾತ್ರಕ್ಕೆ ಹಿಂದಿನಿಂದ ನಡೆದುಕೊಂಡು ಬಂದ ಸಂಪ್ರದಾಯ ಮುರಿಯುವುದು ಬೇಡ. ಜಂಬೂಸವಾರಿ, ದೀಪಾಲಂಕಾರ, ಕ್ರೀಡೆ, ಕವಿಗೋಷ್ಠಿ ಇರುತ್ತದೆ. ಇದಕ್ಕೆಲ್ಲ ಖರ್ಚು ಆಗೇ ಆಗುತ್ತದೆ. ಬರ ಎಂದು ಸಂಪ್ರದಾಯ ಮುರಿಯುವುದು ಬೇಡ.

ಹಸಿವನ್ನು ಮುಚ್ಚಿಟ್ಟು ಇಸ್ತ್ರಿ ಬಟ್ಟೆ ತೊಟ್ಟಂತೆ: ರಾಜ್ಯದ 195 ತಾಲ್ಲೂಕುಗಳು ಬರದ ಹಸಿವಿನಲ್ಲಿ ಬಳಲುತ್ತಿರುವಾಗ ಅಧಿಕ ಹಣ ಬೇಡುವ ಅದ್ಧೂರಿ ಆಚರಣೆಯು ಹೊಟ್ಟೆಯೊಳಗಿನ ಹಸಿವನ್ನು ಮುಚ್ಚಿಟ್ಟು ಇಸ್ತ್ರಿ ಬಟ್ಟೆ ತೊಟ್ಟಂತೆ ಭಾಸವಾಗುತ್ತದೆ. ಹಿಂದಿಗಿಂತ ನಮ್ಮ ಸರ್ಕಾರದಲ್ಲಿ ಆಚರಣೆಯು ಅದ್ಧೂರಿಯಾಗಿರಬೇಕು ಎಂಬ ಮೇಲಾಟ ಸರಿಯಲ್ಲ. ಬರದಿಂದ ತತ್ತರಿಸಿ ರೈತರು ಮತ್ತು ಜನಸಾಮಾನ್ಯರು ಸಮಸ್ಯೆ ಅನುಭವಿಸುತ್ತಿರುವಾಗ ಅದ್ಧೂರಿ ಆಚರಣೆಯ ಅಗತ್ಯವಿಲ್ಲ.