ಏಷ್ಯಾಕಪ್‌ ಟಿ20 ಕ್ರಿಕೆಟ್‌ ಟೂರ್ನಿ: ಸೆಮಿಫೈನಲ್‌ಗೆ ಭಾರತ ಮಹಿಳಾ ಎ ತಂಡ

ಬ್ಯಾಂಕಾಕ್ : ಸ್ಪಿನ್ನರ್ಗಳಾದ ತನುಜಾ ಕನ್ವರ್ (12ಕ್ಕೆ4) ಹಾಗೂ ಮಿನು ಮಣಿ (8ಕ್ಕೆ3) ಅವರ ಬೌಲಿಂಗ್ ದಾಳಿ ಎದುರು ನೇಪಾಳ ಮಹಿಳಾ ಎ ತಂಡವು 78 ರನ್ಗಳ ಅಲ್ಪಮೊತ್ತಕ್ಕೆ ಕುಸಿಯಿತು. ಕೇವಲ 7.5 ಓವರ್ಗಳಲ್ಲಿ ಗುರಿ ತಲುಪಿದ ಭಾರತ ಮಹಿಳಾ ಎ ತಂಡವು ರೈಸಿಂಗ್ ಸ್ಟಾರ್ಸ್ ಮಹಿಳಾ ಏಷ್ಯಾಕಪ್ ಟಿ20 ಕ್ರಿಕೆಟ್ ಟೂರ್ನಿಯ ಸೆಮಿಫೈನಲ್ ಪ್ರವೇಶಿಸಿತು.

. ಮಂಗಳವಾರ ನಡೆದ ಎ ಗುಂಪಿನ ಪಂದ್ಯದಲ್ಲಿ ಟಾಸ್ ಗೆದ್ದ ಭಾರತ ಮಹಿಳಾ ಎ ತಂಡದ ನಾಯಕಿ ರಾಧಾ ಯಾದವ್ ಬೌಲಿಂಗ್ ಆಯ್ದುಕೊಂಡರು. ಎಡಗೈ ಸ್ಪಿನ್ನರ್ ತನುಜಾ ಹಾಗೂ ಬಲಗೈ ಸ್ಪಿನ್ನರ್ ಮಿನು ಕೈಚಳಕ ಮೆರೆದರು. ನೇಪಾಳದ ಆರಂಭ ಆಟಗಾರ್ತಿ ಸಂಝಾನಾ ಖಡ್ಕಾ (22; 16ಎ) ಹೊರತುಪಡಿಸಿದರೆ ಉಳಿದ ಬ್ಯಾಟರ್ಗಳು ಬಂದ ವೇಗದಲ್ಲಿಯೇ ಪೆವಿಲಿಯನ್ಗೆ ಮರಳಿದರು. ನಾಯಕಿ ರಾಧಾ ಎರಡು ವಿಕೆಟ್ ಪಡೆದು ಎದುರಾಳಿ ತಂಡವು ಬೇಗನೆ ಕುಸಿಯುವಂತೆ ಮಾಡಿದರು. ನೇಪಾಳ ತಂಡವು 18 ಓವರ್ಗಳಲ್ಲಿ ತನ್ನೆಲ್ಲ ವಿಕೆಟ್ ಕಳೆದುಕೊಂಡಿತು.

. ಕನ್ನಡತಿ ವೃಂದಾ ದಿನೇಶ್ ಬ್ಯಾಟಿಂಗ್ನಲ್ಲಿ ಮತ್ತೆ ಮಿಂಚಿದರು. ಅವರು 18 ಎಸೆತಗಳಲ್ಲಿ 9 ಬೌಂಡರಿ ಸಹಿತ ಅಜೇಯ 39 ರನ್ ಗಳಿಸಿದರು. ಭಾರತ ಮಹಿಳಾ ಎ ತಂಡವು ಇನ್ನೂ 73 ಎಸೆತ ಉಳಿದಿರುವಂತೆಯೇ 3 ವಿಕೆಟ್ ಕಳೆದುಕೊಂಡು ನಿರಾಯಾಸವಾಗಿ ಗುರಿ ತಲುಪಿತು.

. ಎ ಗುಂಪಿನ ಇನ್ನೊಂದು ಪಂದ್ಯದಲ್ಲಿ 9 ವಿಕೆಟ್ಗಳಿಂದ ಯುಎಇ ತಂಡವನ್ನು ಮಣಿಸಿದ ಪಾಕಿಸ್ತಾನ ತಂಡವೂ ನಾಲ್ಕರ ಘಟ್ಟಕ್ಕೆ ಅರ್ಹತೆ ಪಡೆದುಕೊಂಡಿತು.

. ಸಂಕ್ಷಿಪ್ತ ಸ್ಕೋರು: ನೇಪಾಳ ಮಹಿಳಾ ಎ ತಂಡ: 18 ಓವರ್ಗಳಲ್ಲಿ 78 (ಸಂಝಾನಾ ಖಡ್ಕಾ 22, ಕವಿತಾ ಜೋಶಿ ಔಟಾಗದೇ 12; ತನುಜಾ ಕನ್ವರ್ 12ಕ್ಕೆ4, ಮಿನು ಮಣಿ 8ಕ್ಕೆ3, ರಾಧಾ ಯಾದವ್ 17ಕ್ಕೆ2). ಭಾರತ ಮಹಿಳಾ ಎ ತಂಡ: 7.5 ಓವರ್ಗಳಲ್ಲಿ 3 ವಿಕೆಟ್ಗೆ 82 (ದಿನೇಶ್ ವೃಂದಾ ಔಟಾಗದೇ 39, ತೇಜಲ್ ಹಸಬ್ನಿಸ್ 18; ಸೀತಾ ರಾಣಾ ಮಗರ್ 9ಕ್ಕೆ1). ಪಂದ್ಯದ ಆಟಗಾರ್ತಿ: ತನುಜಾ ಕನ್ವರ್.

. ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ವಾಟ್ಸ್ಆ್ಯಪ್ , ಎಕ್ಸ್ , ಫೇಸ್ಬುಕ್ ಮತ್ತು ಇನ್ಸ್ಟಾಗ್ರಾಂ ನಲ್ಲಿ ಪ್ರಜಾವಾಣಿ ಫಾಲೋ ಮಾಡಿ.

ಏಷ್ಯಾಕಪ್‌ ಟಿ20 ಕ್ರಿಕೆಟ್‌ ಟೂರ್ನಿ: ಸೆಮಿಫೈನಲ್‌ಗೆ ಭಾರತ ಮಹಿಳಾ ಎ ತಂಡ

ಚಿನಕುರುಳಿ: ಮಂಗಳವಾರ, 17 ಫೆಬ್ರುವರಿ 2026

ಗುಂಡಣ್ಣ: ಮಂಗಳವಾರ, 17 ಫೆಬ್ರುವರಿ 2026

ಚುರುಮುರಿ: ಪೊಲಿಟಿಕಲ್‌ ಜಿಪಿಟಿ

ದಿನ ಭವಿಷ್ಯ: ಈ ರಾಶಿಯ ವ್ಯಾಪಾರಿಗಳಿಗೆ ಅಧಿಕ ಲಾಭ