ಮಾಗಡಿ | ಉರ್ದು ಶಾಲೆ: ಶಿಥಿಲ ಕೊಠಡಿಯಲ್ಲೇ 70 ಮಕ್ಕಳಿಗೆ ಪಾಠ

ಮಾಗಡಿ: ಶಿಥಿಲಾವಸ್ಥೆ ತಲಪಿರುವ ಏಕೈಕ ಕೊಠಡಿಯ ಚಾವಣಿಯಿಂದ ಜಿನುಗುವ ಮಳೆ ನೀರು. ಅದರಲ್ಲೇ 1ರಿಂದ 7ನೇ ತರಗತಿವರೆಗಿನ 70 ಮಕ್ಕಳನ್ನು ಗುಡ್ಡೆ ಹಾಕಿಕೊಂಡು ಪಾಠ ಮಾಡಬೇಕಾದ ಅನಿವಾರ್ಯತೆ ಶಾಲೆಯ ಶಿಕ್ಷಕರದು.

ಪಟ್ಟಣದ ಹಳೆ ಮಸೀದಿ ಮೊಹಲ್ಲಾದಲ್ಲಿರುವ ಸರ್ಕಾರಿ ಉರ್ದು ಜಿ.ಎನ್.ಟಿ.ಜಿ.ಎಂ.ಎಸ್ ಶಾಲೆಯ ದುಃಸ್ಥಿತಿ ಇದು.

ಶಿಥಿಲವಾಗಿವೆ ಎಂದು ಶಾಲೆಯ 6 ಕೊಠಡಿಗಳನ್ನು ಕೆಡವಿದ್ದ ಶಿಕ್ಷಣ ಇಲಾಖೆ ಅಧಿಕಾರಿಗಳು, ಹೊಸ ಕೊಠಡಿಗಳನ್ನು ವರ್ಷವಾದರೂ ನಿರ್ಮಿಸಿ ಕೊಡಲಿಲ್ಲ. ಇದರಿಂದಾಗಿ, ವಿದ್ಯಾರ್ಥಿಗಳು –ಶಿಕ್ಷಕರು ಇರುವ ಏಕೈಕ ಕೊಠಡಿಯಲ್ಲಿ ಆತಂಕದಿಂದ ದಿನ ಕಳೆಯಬೇಕಾಗಿದೆ.

ಬೇರೆಡೆಗೆ ವರ್ಗಾವಣೆ

‘2022-23ನೇ ಸಾಲಿಗೆ ರಾಜ್ಯ ವಲಯ ಮುಂದುವರಿದ ಯೋಜನೆಯಡಿ 2022ನೇ ಆಗಸ್ಟ್‌ನಲ್ಲಿ ಸರ್ಕಾರಿ ಪ್ರಾಥಮಿಕ ಮತ್ತು ಪ್ರೌಢಶಾಲಾ ಕೊಠಡಿಗಳ ನಿರ್ಮಾಣ ಕಾಮಗಾರಿಗಳ ಕ್ರಿಯಾ ಯೋಜನೆಗೆ ಜಿಲ್ಲಾ ಪಂಚಾಯಿತಿ ಸಿಇಒ ಆಡಳಿತಾತ್ಮಕ ಅನುಮೋದನೆ ನೀಡಿದ್ದರು’ ಎಂದು ಶಾಲಾಭಿವೃದ್ದಿ ಸಮಿತಿ ಅಧ್ಯಕ್ಷ ಜಾಬಿರ್ ಪಾಷಾ ಹೇಳಿದರು.

‘ಅದರಂತೆ, ಉರ್ದು ಶಾಲೆಗೆ ₹13.90 ಲಕ್ಷ ವೆಚ್ಚದಲ್ಲಿ ಕೊಠಡಿ ನಿರ್ಮಾಣಕ್ಕೆ ಆದೇಶವಾಗಿತ್ತು. ನಂತರ, ಶಿಥಿಲವಾಗಿದ್ದ 6 ಕೊಠಡಿಗಳನ್ನು ತೆರವುಗೊಳಿಸಲಾಗಿತ್ತು. ಕೊಠಡಿಗಳನ್ನು ಕೆಡವಿದ ನಂತರ, ಶಾಲೆಗೆ ಮಂಜೂರಾಗಿದ್ದ ಕೊಠಡಿಯನ್ನು ಬೇರೆಡೆಗೆ ವರ್ಗಾಯಿಸಿದರು’ ಎಂದು ತಿಳಿಸಿದರು.

‘ಖಾಸಗಿ ಕಂಪನಿಯೊಂದರ ತನ್ನ ಕಾರ್ಪೊರೇಟ್ ಸಾಮಾಜಿಕ ಹೊಣೆಗಾರಿಕೆ (ಸಿಆರ್‌ಎಸ್‌) ಯೋಜನೆಯಡಿ  ಮಂಜೂರಾಗಿದ್ದ ಕೊಠಡಿಯೂ ಬೇರೆ ಶಾಲೆಗೆ ವರ್ಗಾಯಿಸಿದರು. ಈ ಬಗ್ಗೆ ಸಂಬಂಧಪಟ್ಟ ಇಲಾಖೆಯ ಅಧಿಕಾರಿಗಳಿಗೆ ಪತ್ರ ಬರೆದರೂ ಪ್ರಯೋಜವಾಗಿಲ್ಲ. ಒಂದೇ ಕೊಠಡಿಯಲ್ಲಿ ಶಾಲೆ ನಡೆಸಲಾಗುತ್ತಿದೆ’ ಎಂದು ಶಿಕ್ಷಕರು ತಿಳಿಸಿದರು.

ಕುಸಿಯುವ ಆತಂಕ

ಸದ್ಯ ತರಗತಿ ನಡೆಯುತ್ತಿರುವ ಶಿಥಿಲ ಕೊಠಡಿ ಮಳೆಗಾಲದಲ್ಲಿ ಯಾವುದೇ ಕ್ಷಣದಲ್ಲಿ ಬೀಳುವ ಅಪಾಯವಿದೆ. ಅನಾಹುತ ಸಂಭವಿಸುವುದಕ್ಕೂ ಮುಂಚೆ ಶಿಕ್ಷಣ ಇಲಾಖೆ ಶಾಲೆಯತ್ತ ಗಮನ ಹರಿಸಿ, ಪರ್ಯಾಯ ವ್ಯವಸ್ಥೆ ಮಾಡಬೇಕು ಎಂದು ವಿದ್ಯಾರ್ಥಿಗಳ ಪೋಷಕರು ಆಗ್ರಹಿಸಿದರು. ಅವರ ಮಾತಿಗೆ ಶಿಕ್ಷಕರು ಸಹ ದನಿಗೂಡಿಸಿದರು.

ಕ್ರಮ ಕೈಗೊಳ್ಳಬೇಕು

‘ನಮ್ಮ ಉರ್ದು ಶಾಲೆಗೆ ನೂತನ ಕೊಠಡಿಗಳನ್ನು ತಕ್ಷಣ ನಿರ್ಮಿಸಿ ಕೊಡಬೇಕು. ಅಲ್ಲದೆ ಹಿಂದೆ ಮಂಜೂರಾಗಿದ್ದ ಕೊಠಡಿಯನ್ನು ಬೇರೆಡೆಗೆ ವರ್ಗಾಯಿದ ಅಧಿಕಾರಿಗಳ ವಿರುದ್ಧ ಕ್ರಮ ಕೈಗೊಳ್ಳಬೇಕು ಎಂದು ಸಂಬಂಧಪಟ್ಟ ಅಧಿಕಾರಿಗಳಿಗೆ ಮನವಿ ಮಾಡಿದ್ದೇವೆ. ಶಾಲೆಯ ಸ್ಥಿತಿ ನೋಡಿಯೂ ಕೊಠಡಿಯನ್ನು ಬೇರೆಡೆಗೆ ವರ್ಗಾಯಿಸಿದ್ದಾರೆಂದರೆ ಅವರ ಮನಸ್ಥಿತಿ ಇನ್ಯಾವ ಮಟ್ಟಿಗೆ ಇರಬಹುದು’ ಎಂದು ಶಾಲಾಭಿವೃದ್ಧಿ ಸಮಿತಿ ಅಧ್ಯಕ್ಷ ಜಾಬಿರ್ ಪಾಷಾ ಅಸಮಾಧಾನ ವ್ಯಕ್ತಪಡಿಸಿದರು.