ರಾಮನಗರ | ಪತ್ರಿಕಾ ವಿತರಕರ ದಿನ: ಕೇಕ್ ಕತ್ತರಿಸಿ ಸಂಭ್ರಮಾಚರಣೆ

ರಾಮನಗರ: ಬಾನಲ್ಲಿ ಸೂರ್ಯ ಉದಯಿಸುವುದಕ್ಕೆ ಮುಂಚೆಯೇ ಜಗತ್ತಿನ ಸುದ್ದಿಯನ್ನು ಹೊತ್ತ ದಿನಪತ್ರಿಕೆಯನ್ನು ಬೆಳ್ಳಂಬೆಳಿಗ್ಗೆ ಮನೆ ಬಾಗಿಲಿಗೆ ತಲುಪಿಸುವ ‘ಪತ್ರಿಕಾ ವಿತರಕರ ದಿನ’ವನ್ನು ಬುಧವಾರ ನಗರದಲ್ಲಿ ಸಂಭ್ರಮದಿಂದ ಆಚರಿಸಲಾಯಿತು. ‘ಪ್ರಜಾವಾಣಿ’ ಏಜೆಂಟರು ಹಾಗೂ ದಿನಪತ್ರಿಕೆಗಳನ್ನು ಹಾಕುವ ಹುಡುಗರು ಕೇಕ್ ಕತ್ತರಿಸುವ ಮೂಲಕ, ವಿತರಕರ ದಿನದ ಸಡಗರವನ್ನು ಹಂಚಿಕೊಂಡರು.

ಜಿಲ್ಲಾ ಕೇಂದ್ರವಾದ ರಾಮನಗರ, ತಾಲ್ಲೂಕು ಕೇಂದ್ರಗಳಾದ ಚನ್ನಪಟ್ಟಣ, ಮಾಗಡಿ, ಕನಕಪುರ, ಹಾರೋಹಳ್ಳಿ, ಹೋಬಳಿ ಕೇಂದ್ರಗಳಾದ ಬಿಡದಿ ಹಾಗೂ ಕುದೂರಿನಲ್ಲಿ ಅರ್ಥಪೂರ್ಣವಾಗಿ ಆಚರಿಸಲಾಯಿತು. ಏಜೆಂಟರ ಕಾಯಕ ಸ್ಥಳವಾದ ಬಸ್ ನಿಲ್ದಾಣ, ತಂಗುದಾಣ ಹಾಗೂ ಅಂಗಡಿಗಳ ಆವರಣದಲ್ಲಿ ನಡೆದ ಸಂಭ್ರಮಾಚರಣೆಯು ಹಿರಿಯರು ಮತ್ತು ಕಿರಿಯರ ಅನುಭವದ ಮೆಲುಕಿಗೂ ಸಾಕ್ಷಿಯಾಯಿತು.

ದಿನಪತ್ರಿಕೆಯನ್ನು ಮನೆ ಮನೆಗೆ ಹಾಕುವ ತಮ್ಮ ಬಳಗದ ಹುಡುಗರಿಗೆ ಏಜೆಂಟರು ಸಿಹಿ ಹಂಚಿ, ಅವರ ಕಾರ್ಯೋತ್ಸಹಕ್ಕೆ ಬೆನ್ನು ತಟ್ಟಿದರು. ತಾವು ಈ ವೃತ್ತಿಗೆ ಇಳಿದ ದಿನಗಳ ಮೆಲುಕು ಹಾಕುತ್ತಲೇ, ಅಂದಿಗೂ–ಇಂದಿಗೂ ದಿನಪತ್ರಿಕೆ ವಿತರಣೆಯಲ್ಲಾಗಿರುವ ಬದಲಾವಣೆಯನ್ನು ಹಂಚಿಕೊಂಡರು. ಪತ್ರಿಕೆ ಜೊತೆಗೆ ತಾವೂ ಬೆಳೆದಿರುವುದನ್ನು ಸ್ಮರಿಸಿದರು.