ಮಧುಗಿರಿ | ವಾರದ ಸಂತೆ ಸ್ಥಳಾಂತರ: ಪರ, ವಿರೋಧ ಚರ್ಚೆ

ಹಲವು ವರ್ಷಗಳಿಂದ ಪ್ರತಿ ಬುಧವಾರ ಲಾಲ್ ಬಹಾದ್ದೂರ್ ಶಾಸ್ತ್ರಿ ಮೈದಾನದಲ್ಲಿ ಸಂತೆ ನಡೆಯುತ್ತಿತ್ತು. ಇದರಿಂದ ಪಟ್ಟಣದ ಬಹುತೇಕ ವಾರ್ಡ್‌ನ ನಿವಾಸಿಗಳು ಹಾಗೂ ಕಸಬಾ ವ್ಯಾಪ್ತಿಯ ಗ್ರಾಮಗಳಿಗೂ ಅನುಕೂಲವಾಗುತ್ತಿತ್ತು. ಎಲ್ಲ ಗ್ರಾಮಗಳಿಗೂ ತೆರಳಲು ಆಟೊ ಹಾಗೂ ಬಸ್‌ ವ್ಯವಸ್ಥೆ ಇತ್ತು. ಆದರೆ ವರ್ಷಗಳು ಕಳೆದಂತೆ ವಾಹನಗಳ ಸಂಖ್ಯೆ ಹೆಚ್ಚಾಗಿ ಸಂಚಾರ ದಟ್ಟಣೆ ಎದುರಾಗಿದೆ.

ಎಲ್ಲ ಭಾಗಗಳಿಗೆ ಸಂತೆ ಮುಂಭಾಗದ ತುಮಕೂರು ರಸ್ತೆ ಮೂಲಕವೇ ಪಾವಗಡ, ಶಿರಾ, ಗೌರಿಬಿದನೂರು, ಹಿಂದೂಪುರ ಹಾಗೂ ತುಮಕೂರು ಭಾಗಗಳಿಗೆ ತೆರಳಬೇಕಿರುವುದರಿಂದ ಬುಧವಾರ ಸಾಕಷ್ಟು ದಟ್ಟಣೆಯಾಗುತ್ತದೆ. ಹಾಗಾಗಿ ಸಂತೆಯನ್ನು ಬೇರೆಡೆ ಸ್ಥಳಾಂತರಿಸಬೇಕು ಎಂದು ಕೆಲವರು ಒತ್ತಾಯಿಸಿದ್ದಾರೆ.

ವಾರದ ಸಂತೆಯನ್ನು ಎಪಿಎಂಸಿ ಆವರಣಕ್ಕೆ ಸ್ಥಳಾಂತರಿಸಿದರೆ ಉತ್ತಮ ಸ್ಥಳ, ನೆರಳು ಹಾಗೂ ಮೂಲ ಸೌಕರ್ಯವಿದ್ದು, ಯಾವುದೇ ಸಂಚಾರ ದಟ್ಟಣೆಯ ಸಮಸ್ಯೆ ಎದುರಾಗುವುದಿಲ್ಲ. ಪಟ್ಟಣ ಮತ್ತಷ್ಟು ಅಭಿವೃದ್ಧಿಯಾಗುತ್ತದೆ. ವಾರದ ಸಂತೆ ಜೊತೆಗೆ ಹೂವಿನ ಮಾರುಕಟ್ಟೆಯೂ ಇಲ್ಲಿಯೇ ನಡೆದರೆ ಜನರಿಗೆ ಮತ್ತಷ್ಟು ಅನುಕೂಲವಾಗುತ್ತದೆ ಎನ್ನುತ್ತಾರೆ ಇಲ್ಲಿನ ನಿವಾಸಿಗಳು.

ಎಪಿಎಂಸಿ ಮಾರುಕಟ್ಟೆಯಲ್ಲಿ ಪ್ರತಿ ಶುಕ್ರವಾರ ಕುರಿ ಸಂತೆ ಮಾಡಬೇಕು ಎನ್ನುವುದು ಸಾರ್ವಜನಿಕರು ಮತ್ತು ಕುರಿ ಸಾಕಾಣಿಕೆಗಾರರ ಒತ್ತಾಯ. ಕುರಿ ಸಾಕಾಣಿಕೆಗಾರರ ಸಭೆ ಮಾಡಿ ಸಾಧಕ ಮತ್ತು ಬಾಧಕ ತುಲನೆ ಮಾಡಿದರೆ, ಕುರಿ ಸಂತೆಯೂ ಯಶಸ್ವಿಯಾಗುತ್ತದೆ. ಹಿಂದೂಪುರ, ಗೌರಿಬಿದನೂರು, ಬೆಂಗಳೂರು– ತುಮಕೂರು ಈ ಭಾಗದ ವ್ಯಾಪಾರಿಗಳಿಗೂ ಸಾಕಷ್ಟು ಅನುಕೂಲವಾಗುತ್ತದೆ ಎನ್ನುತ್ತಾರೆ ಸ್ಥಳೀಯರು.

ಚರ್ಚಿಸಿ ತೀರ್ಮಾನ

ಎಪಿಎಂಸಿ ಆವರಣದಲ್ಲಿ ಪ್ರತಿ ಶುಕ್ರವಾರ ಕುರಿ ಸಂತೆ ನಡೆಸಲು ತೀರ್ಮಾನಿಸಲಾಗಿದೆ. ಲಾಲ್ ಬಹಾದ್ದೂರ್ ಶಾಸ್ತ್ರಿ ಮೈದಾನದಲ್ಲಿ ನಡೆಯುತ್ತಿರುವ ಸಂತೆಯನ್ನು ಎಪಿಎಂಸಿ ಆವರಣಕ್ಕೆ ಸ್ಥಳಾಂತರ ಮಾಡಬಾರದು ಎಂದು ವ್ಯಾಪಾರಿಗಳು ಮನವಿ ಮಾಡಿದ್ದಾರೆ. ಅವರೊಂದಿಗೆ ಸಭೆ ನಡೆಸಿ ಸೂಕ್ತ ತೀರ್ಮಾನ ತೆಗೆದುಕೊಳ್ಳಲಾಗುವುದು. ಅಲ್ಲಿಯವರೆಗೂ ವಾರದ ಸಂತೆ ಲಾಲ್ ಬಹಾದ್ದೂರ್ ಶಾಸ್ತ್ರಿ ಮೈದಾನದಲ್ಲಿ ನಡೆಯುತ್ತದೆ. ಕೆ.ಎನ್.ರಾಜಣ್ಣ ಸಹಕಾರ ಸಚಿವ