ಬುಧವಾರ, ಮೇ 25, 2022
30 °C

‘ಬ್ಲೂ ಫ್ಲ್ಯಾಗ್’ ಮಾದರಿಯಲ್ಲೇ ಅಭಿವೃದ್ಧಿ: ಜಿಲ್ಲಾಧಿಕಾರಿ

ಪ್ರಜಾವಾಣಿ ವಾರ್ತೆ Updated:

ಅಕ್ಷರ ಗಾತ್ರ : | |

Prajavani

ಕಾರವಾರ: ‘ಜಿಲ್ಲೆಯ ಕಡಲತೀರಗಳ ಸಮಗ್ರ ಅಭಿವೃದ್ಧಿಗೆ ಚಿಂತನೆ ನಡೆಸಲಾಗಿದೆ. ಹೊನ್ನಾವರದ ಇಕೊ ಬೀಚ್‌ಗೆ ‘ಬ್ಲೂ ಫ್ಲ್ಯಾಗ್’ ಕೆಲಸ ಶುರು ಮಾಡಲು ಆದೇಶಿಸಲಾಗಿದೆ. ಕಾಮಗಾರಿಗಾಗಿ ಕಡಲತೀರವನ್ನು ಗುತ್ತಿಗೆದಾರರಿಗೆ ಹಸ್ತಾಂತರಿಸಲಾಗಿದೆ. ಅದೇ ಮಾದರಿಯಲ್ಲಿ ಇತರೆಡೆಯೂ ಅಭಿವೃದ್ಧಿಗೆ ಆದ್ಯತೆ ನೀಡಲಾಗುವುದು’ ಎಂದು ಜಿಲ್ಲಾಧಿಕಾರಿ ಡಾ.ಕೆ.ಹರೀಶಕುಮಾರ್ ತಿಳಿಸಿದರು.

‘ಅಂತರರಾಷ್ಟ್ರೀಯ ಮಾನದಂಡಗಳ ಪ್ರಕಾರ ಮಾನದಂಡಗಳನ್ನು ಅನುಸರಿಸಿ ಗುಣಮಟ್ಟ ಕಾಯ್ದುಕೊಳ್ಳಬೇಕು. ಇಕೊ ಬೀಚ್ ಎರಡು ವರ್ಷಗಳಲ್ಲಿ ಅಭಿವೃದ್ಧಿಯಾಗುತ್ತದೆ. ನೀರಿನ ಗುಣಮಟ್ಟ, ಕುಡಿಯುವ ನೀರು, ಶೌಚಾಲಯ, ಸುರಕ್ಷತೆಯ ವ್ಯವಸ್ಥೆ ಮಾಡುವುದು ಅತಿ ಮುಖ್ಯವಾಗುತ್ತದೆ. ಈ ನಿಟ್ಟಿನಲ್ಲಿ ಒಂದೊಂದೇ ಹೆಜ್ಜೆ ಮುಂದೆ ಹೋದರೆ ಜಿಲ್ಲೆಯ ಎಲ್ಲ ಕಡಲತೀರಗಳನ್ನೂ ಅಭಿವೃದ್ಧಿ ಮಾಡಬಹುದು’ ಎಂದು ವಿವರಿಸಿದರು.

ಕಡಲತೀರ ಸ್ವಚ್ಛತೆಗೆ ಮತ್ತೆರಡು ಯಂತ್ರ: ಜಿಲ್ಲೆಯ ಕಡಲತೀರಗಳನ್ನು ಸ್ವಚ್ಛಗೊಳಿಸಲು ಇನ್ನೆರಡು ಯಂತ್ರಗಳು ಜಿಲ್ಲಾಡಳಿತಕ್ಕೆ ಮಂಜೂರಾಗುವ ಹಂತದಲ್ಲಿದೆ. ಅವುಗಳನ್ನು ಕಾರವಾರ ಹೊರತಾಗಿ ತಾಲ್ಲೂಕು ವ್ಯಾಪ್ತಿಯ ಮುಖ್ಯ ಬೀಚ್‌ಗಳಿಗೆ ಕೊಡಬಹುದು. ಕಾರವಾರದಲ್ಲಿ ಸಮಿತಿ ರಚಿಸಿ ಅಭಿವೃದ್ಧಿಪಡಿಸಿದ ರೀತಿಯಲ್ಲೇ ಇತರೆಡೆ ಉಪ ವಿಭಾಗಾಧಿಕಾರಿಗಳ ನೇತೃತ್ವದಲ್ಲಿ ಕಾರ್ಯ ನಿರ್ವಹಿಸಬಹುದು. ಇದರ ನೇತೃತ್ವದಲ್ಲಿ 15 ದಿನಕ್ಕೊಮ್ಮೆ ಶುಚಿತ್ವದ ಪರಿಶೀಲನೆ ಮಾಡಬಹುದು ಎಂದರು.

‘ಗೋವಾದ ಕಡಲತೀರ ಯುವಕರಿಗೆ, ಮೋಜು ಮಸ್ತಿಗೆ ಎಂಬ ಭಾವನೆ ಸಾಮಾನ್ಯವಾಗಿದೆ. ಆದರೆ, ನಮ್ಮಲ್ಲಿ ಇಡೀ ಕುಟುಂಬ ಜೊತೆಯಾಗಿ ಕಾಲ ಕಳೆಯುವ ರೀತಿಯ ವಾತಾವರಣ ಮೂಡಿಸುವ ಉದ್ದೇಶವಿದೆ. ಗೋವಾದಲ್ಲಿ ಸಾರ್ವಜನಿಕರ ಸಹಕಾರದಿಂದ ಪ್ರವಾಸಿಗರಿಗೆ ಸುರಕ್ಷತೆಯ ಭಾವನೆಯಿದೆ. ಅಂಥದ್ದೇ ಭಾವನೆ ಇಲ್ಲೂ ಇನ್ನಷ್ಟು ಬೆಳೆಯಬೇಕು. ಇದಕ್ಕೆ ಜನರ ಸಹಕಾರ ಅಗತ್ಯ’ ಎಂದು ಅಭಿಪ್ರಾಯಪಟ್ಟರು.

‘ಖಾಸಗಿಯವರಿಗೂ ಅವಕಾಶ’

‘ಅಂಕೋಲಾ ಮತ್ತು ಕುಮಟಾದ ಕಡಲತೀರಗಳನ್ನೂ ಕಾರವಾರದ ಮಾದರಿಯಲ್ಲೇ ಮಾಡಬೇಕು ಎಂಬ ಚಿಂತನೆಯಿದೆ. ಒಂದುವೇಳೆ ಖಾಸಗಿಯವರು, ಮೀನುಗಾರರ ಸಮುದಾಯದವರು ಬಂಡವಾಳ ಹೂಡಿ ಅಭಿವೃದ್ಧಿ ಪಡಿಸುವುದಾದರೆ ಅವಕಾಶ ಕೊಡುವ ಚಿಂತನೆಯೂ ಇದೆ. ಮಂಗಳೂರಿನ ಕಡಲತೀರಗಳಲ್ಲಿ ಹೀಗೇ ಮಾಡಲಾಗಿದೆ. ಗೋವಾ ಗಡಿಯಲ್ಲಿರುವ ಕಡಲತೀರವನ್ನೂ ಈ ರೀತಿ ಅಭಿವೃದ್ಧಿ ಮಾಡುವ ಚಿಂತನೆಯಿದೆ. ಸಿಆರ್‌ಝೆಡ್ ನಿಯಮದಲ್ಲಿ ಏನೆಲ್ಲ ಅವಕಾಶವಿದೆಯೋ ಅದನ್ನು ಮಾಡಲು ಸಿದ್ಧರಿದ್ದೇವೆ’ ಎಂದು ಹೇಳಿದರು.

ತಾಜಾ ಮಾಹಿತಿ ಪಡೆಯಲು ಪ್ರಜಾವಾಣಿ ಟೆಲಿಗ್ರಾಂ ಚಾನೆಲ್ ಸೇರಿಕೊಳ್ಳಿ

ತಾಜಾ ಸುದ್ದಿಗಳಿಗಾಗಿ ಪ್ರಜಾವಾಣಿ ಆ್ಯಪ್ ಡೌನ್‌ಲೋಡ್ ಮಾಡಿಕೊಳ್ಳಿ: ಆಂಡ್ರಾಯ್ಡ್ ಆ್ಯಪ್ | ಐಒಎಸ್ ಆ್ಯಪ್

ಪ್ರಜಾವಾಣಿ ಫೇಸ್‌ಬುಕ್ ಪುಟವನ್ನುಫಾಲೋ ಮಾಡಿ.

ಈ ವಿಭಾಗದಿಂದ ಇನ್ನಷ್ಟು