ಗುರುವಾರ , ಏಪ್ರಿಲ್ 9, 2020
19 °C

Video | ಕಾರವಾರದಲ್ಲಿ ಕಡಲ ಕುತೂಹಲ: ಅರಬ್ಬಿ ಸಮುದ್ರದ ನೀರಿನಲ್ಲಿ ನೀಲಿ ಬೆಳಕು

ಪ್ರಜಾವಾಣಿ ವಾರ್ತೆ Updated:

ಅಕ್ಷರ ಗಾತ್ರ : | |

ಮಾಜಾಳಿಯಲ್ಲಿ ನೀಲಿಯಾಗಿ ಹೊಳೆಯುತ್ತಿರುವ ಸಮುದ್ರದ ಅಲೆಗಳು –ಚಿತ್ರ ಕೃಪೆ: ಡಾ.ಶಿವಕುಮಾರ ಹರಗಿ

ಕಾರವಾರ: ತಾಲ್ಲೂಕಿನ ಮಾಜಾಳಿಯಲ್ಲಿ ಸಮುದ್ರದ ನೀರು ಮಿಂಚುಹುಳದ ಬೆಳಕಿನ ಮಾದರಿಯಲ್ಲಿ ಎರಡು ದಿನಗಳಿಂದ ರಾತ್ರಿ ವೇಳೆ ಹೊಳೆಯುತ್ತಿದೆ. ಇದು ಕುತೂಹಲಕ್ಕೆ ಕಾರಣವಾಗಿದೆ. 

ಅಲೆಗಳು ಬಂದು ದಡಕ್ಕೆ ಅಪ್ಪಳಿಸಿದಾಗ ನೀಲಿ ಬಣ್ಣದ ಬೆಳಕು ಮೂಡುತ್ತಿದೆ. ನಂತರ ಮಾಯವಾಗುತ್ತಿದೆ. ರಾತ್ರಿಯಿಡೀ ಈ ಪ್ರಕ್ರಿಯೆ ನಡೆಯುತ್ತಿದೆ.

ಈ ಬಗ್ಗೆ 'ಪ್ರಜಾವಾಣಿ'ಗೆ ಮಾಹಿತಿ ನೀಡಿದ ಕಡಲಜೀವ ವಿಜ್ಞಾನ ಅಧ್ಯಯನ ಕೇಂದ್ರದ ಸಹಾಯಕ ಪ್ರಾಧ್ಯಾಪಕ ಡಾ.ಶಿವಕುಮಾರ ಹರಗಿ, 'ಪಾಚಿ (ಆಲ್ಗೆ) ಪ್ರಭೇದದ ಸಮುದ್ರ ಜೀವಿಗಳು ಹೇರಳವಾಗಿ ದಡಕ್ಕೆ ಬಂದಿವೆ. ಅವುಗಳು ಸ್ರವಿಸುವ ರಾಸಾಯನಿಕದಿಂದ ಮಿಂಚುಹುಳದ ಮಾದರಿಯಲ್ಲೇ ಇವುಗಳಲ್ಲೂ ಬೆಳಕು ಹೊರಸೂಸುತ್ತಿದೆ' ಎಂದರು.

ಇವುಗಳನ್ನು ವೈಜ್ಞಾನಿಕವಾಗಿ 'ಡೈನೋಫ್ಲಾಗೆಲೆಟ್ ನಾಕ್ಟಿಲುಕ ಸಿಂಟಿಲನ್ಸ್' (Dinoflagellate Noctiluca scintillans) ಎಂದು ಕರೆಯಲಾಗುತ್ತದೆ. ಒಂದೇ ಜೀವಕೋಶ ಹೊಂದಿರುವ ಇವು, ಸಮುದ್ರದ ಮೇಲ್ಮೈಯಲ್ಲಿರುತ್ತವೆ. ಈ ಜೀವಿಗಳು ತನ್ನಿಂತಾನೇ ಸಂಚರಿಸಲಾರವು. ಅಲೆಗಳಲ್ಲಿ ತೇಲಿಕೊಂಡು ದಡಕ್ಕೆ ಬಂದಿರಬಹುದು. 

 

ಸಮುದ್ರದಲ್ಲಿ ಇವುಗಳ ಬೆಳವಣಿಗೆಗೆ ಪೂರಕವಾದ ವಾತಾವರಣ ಕಂಡುಬಂದಾಗ ಹೆಚ್ಚಾಗಿ ಕಾಣಿಸಿಕೊಳ್ಳುತ್ತವೆ. ಇವುಗಳ ಸಂಖ್ಯೆ ಹೆಚ್ಚಾದಾಗ ಸಮುದ್ರದ ನೀರು ಹಸಿರಾಗಿ ಗೋಚರಿಸುತ್ತದೆ. 2017ರಿಂದ ಪ್ರತಿವರ್ಷ ಇವು ಕಾರವಾರದ ಕಡಲತೀರದಲ್ಲಿ ಕಂಡುಬರುತ್ತಿರುವುದು ಅಧ್ಯಯನದ ಅಂಶವಾಗಿದೆ. ಈ ನಿಟ್ಟಿನಲ್ಲಿ ಮಾದರಿಗಳನ್ನು ಸಂಗ್ರಹಿಸಲಾಗಿದೆ ಎಂದು ಮಾಹಿತಿ ನೀಡಿದರು.

ಕಳೆದ ವರ್ಷ ಚೆನ್ನೈ ಸಮುದ್ರ ತೀರದಲ್ಲಿ ಇಂಥದ್ದೇ ನೀಲಿ ಬೆಳಕು ಕಂಡುಬಂದಿತ್ತು. ಬೆಳಕಿನ ರೇಖೆಗಳ ಚಿತ್ರಗಳು ಮತ್ತು ವಿಡಿಯೊ ತುಣುಕುಗಳು ಸಾಮಾಜಿಕ ಜಾಲತಾಣಗಳಲ್ಲಿ ಭಾರಿ ಸದ್ದು ಮಾಡಿದ್ದವು. 


ಸೂಕ್ಷ್ಮದರ್ಶಕದಲ್ಲಿ ಪಾಚಿ (ಆಲ್ಗೆ) ಪ್ರಭೇದದ ಸಮುದ್ರ ಜೀವಿಗಳು 

ಪ್ರಜಾವಾಣಿ ಫೇಸ್‌ಬುಕ್ ಪುಟವನ್ನು ಲೈಕ್ ಮಾಡಿ, ಪ್ರಮುಖ ಸುದ್ದಿಗಳ ಅಪ್‌ಡೇಟ್ಸ್ ಪಡೆಯಿರಿ.

ಪ್ರಜಾವಾಣಿಯನ್ನು ಟ್ವಿಟರ್‌ನಲ್ಲಿ ಇಲ್ಲಿ ಫಾಲೋ ಮಾಡಿ.

ಟೆಲಿಗ್ರಾಂ ಮೂಲಕ ನಮ್ಮ ಸುದ್ದಿಗಳ ಅಪ್‌ಡೇಟ್ಸ್ ಪಡೆಯಲು ಇಲ್ಲಿ ಕ್ಲಿಕ್ ಮಾಡಿ.

ಪ್ರತಿಕ್ರಿಯಿಸಿ (+)

ಈ ವಿಭಾಗದಿಂದ ಇನ್ನಷ್ಟು