ಶಿರಸಿ: ಹೊಸ ಆರ್ಥಿಕ ನೀತಿಯಿಂದ ಅಸಮಾನತೆ ಸೃಷ್ಟಿಯಾಗುತ್ತಿದೆ ಎಂಬ ದೂರನ್ನು ಗಮನದಲ್ಲಿಟ್ಟು, ಕೇಂದ್ರ ಬಜೆಟ್‌ನಲ್ಲಿ ಸಾಮಾಜಿಕ, ಆರ್ಥಿಕ ನ್ಯಾಯ ಒದಗಿಸುವ ಪ್ರಾಮಾಣಿಕ ಪ್ರಯತ್ನ ನಡೆದಿದೆ.
ಆದಾಯ ತೆರಿಗೆ ಮಿತಿ ಹೆಚ್ಚಳ ಪ್ರಶಂಸನೀಯ. ₹ 5 ಲಕ್ಷಕ್ಕೂ ಮೇಲಿನ ಆದಾಯಕ್ಕೆ ಸಲ್ಲಿಸುವ ತೆರಿಗೆಯ ಬಗ್ಗೆ ಸ್ಪಷ್ಟತೆಯಿಲ್ಲ. ₹ 2 ಕೋಟಿ ಮೇಲಿನ ಆದಾಯಕ್ಕೆ ಸ್ಲ್ಯಾಬ್ ಮಾಡಿ, ಅಸಮಾನತೆ ಸರಿದೂಗಿಸುವ ಪ್ರಯತ್ನ ಮಾಡಲಾಗಿದೆ.
₹ 400 ಕೋಟಿವರೆಗೆ ಆದಾಯ ಹೊಂದಿರುವ ಕಾರ್ಪೊರೆಟ್ ಕಂಪನಿಗಳ ತೆರಿಗೆಯನ್ನು ಶೇ 25ಕ್ಕೆ ಇಳಿಸಲಾಗಿದೆ. ಶೇ 99ರಷ್ಟು ಕಂಪನಿಗಳಿಗೆ ಲಾಭವಾಗುವುದರಿಂದ ಕಾರ್ಪೊರೆಟ್ ಬೆಳವಣಿಗೆಗೆ ಇದು ಸಹಕಾರಿಯಾಗಿದೆ. ನಗದು ವಹಿವಾಟಿಗೆ ₹ 1ಕೋಟಿ ಮಿತಿ ನಿಗದಿಪಡಿಸಿರುವುದು ಕಪ್ಪು ಹಣ ನಿಯಂತ್ರಣಕ್ಕೆ ಸಹಕಾರಿಯಾಗಿದೆ.
–ಪ್ರೊ. ಆರ್.ಎಲ್.ಕನಕ, ನಿವೃತ್ತ ಅರ್ಥಶಾಸ್ತ್ರ ಪ್ರಾಧ್ಯಾಪಕ, ಶಿರಸಿ
