ಕಾರವಾರ | ವರವಾದ ನರೇಗಾ ಯೋಜನೆ: ಶಾಲೆ ಅಂಗಳದಲ್ಲರಳಿದ ಬ್ಯಾಸ್ಕೆಟ್ ಬಾಲ್ ಅಂಕಣ

ನರೇಗಾ ಯೋಜನೆ ಅಡಿ ಗ್ರಾಮೀಣ ಭಾಗದ ಶಾಲೆ, ಪ್ರೌಢಶಾಲೆಗಳ ಅಂಗಳದಲ್ಲಿ ಆಟದ ಮೈದಾನ ಅಥವಾ ಆಟದ ಅಂಕಣ ನಿರ್ಮಿಸುವ ಯೋಜನೆ ಜಿಲ್ಲೆಯಲ್ಲಿಯೂ ಸಾಕಾರಗೊಳ್ಳುತ್ತಿದೆ. ಜಿಲ್ಲೆಯ ಸುಮಾರು 60ಕ್ಕೂ ಹೆಚ್ಚು ಕಡೆಗಳಲ್ಲಿ ವಿವಿಧ ಆಟದ ಅಂಕಣಗಳು ನಿರ್ಮಾಣ ಹಂತದಲ್ಲಿವೆ.

ಅದರಲ್ಲಿಯೂ ಗ್ರಾಮೀಣ ಭಾಗದ ವಿದ್ಯಾರ್ಥಿಗಳಿಗೆ ಅಪರಿಚಿತವಾಗಿದ್ದ ಬ್ಯಾಸ್ಕೆಟ್ ಬಾಲ್ ಕ್ರೀಡೆಯ ಅಂಕಣ ನಿರ್ಮಿಸುತ್ತಿರುವುದು ಗಮನಸೆಳೆಯುತ್ತಿದೆ. ಕಳೆದ ಎರಡು ವರ್ಷಗಳಲ್ಲಿ ನರೇಗಾ ಅಡಿ ಜಿಲ್ಲೆಯ 15 ಕಡೆಗಳಲ್ಲಿ ಬ್ಯಾಸ್ಕೆಟ್ ಬಾಲ್ ಅಂಕಣ ನಿರ್ಮಿಸಲು ಉದ್ದೇಶಿಸಲಾಗಿತ್ತು. ಈ ಪೈಕಿ ಏಳು ಕಡೆಗಳಲ್ಲಿ ಕೆಲಸ ಪೂರ್ಣಗೊಂಡಿದೆ. ಇನ್ನು ಎಂಟು ಕಡೆಗಳಲ್ಲಿ ಅಂಕಣ ನಿರ್ಮಾಣ ಹಂತದಲ್ಲಿದೆ.

‘ಮುಂಡಗೋಡ ತಾಲ್ಲೂಕಿನ ಮಳಗಿ, ಸಿದ್ದಾಪುರದ ಕಾನಗೋಡ, ಅಂಕೋಲಾದ ಅಗಸೂರು, ಹಳಿಯಾಳದ ಅರ್ಲವಾಡಾ, ಹೊನ್ನಾವರದ ಚಂದಾವರ, ಜೊಯಿಡಾದ ರಾಮನಗರದಲ್ಲಿ ಸುಸಜ್ಜಿತ ಬ್ಯಾಸ್ಕೆಟ್ ಬಾಲ್ ಅಂಕಣ ನಿರ್ಮಾಣಗೊಂಡಿದೆ. ನರೇಗಾ ನಿಯಮದಂತೆ ಪ್ರತಿ ಅಂಕಣಕ್ಕೆ ಸರಾಸರಿ ₹5.50 ಲಕ್ಷ ವೆಚ್ಚ ಮಾಡಲಾಗುತ್ತಿದೆ’ ಎಂದು ನರೇಗಾ ಯೋಜನೆ ವಿಭಾಗದ ಅಧಿಕಾರಿಯೊಬ್ಬರು ಮಾಹಿತಿ ನೀಡಿದರು.

‘ನರೇಗಾ ಅಡಿ ಗ್ರಾಮ ಪಂಚಾಯ್ತಿಗಳು ಸ್ಥಳೀಯ ಬೇಡಿಕೆ ಆಧರಿಸಿ ಬೇರೆ ಬೇರೆ ಆಟದ ಅಂಕಣ ಅಭಿವೃದ್ಧಿಪಡಿಸಲು ಅವಕಾಶವಿದೆ. ₹2.80 ಲಕ್ಷ ವೆಚ್ಚದಲ್ಲಿ ಕಬಡ್ಡಿ ಅಂಕಣ, ₹5,67 ಲಕ್ಷದಲ್ಲಿ ಓಟದ ಪಥ, ₹3.60 ಲಕ್ಷ ವೆಚ್ಚದಲ್ಲಿ ಕೊಕ್ಕೊ ಅಂಕಣ, ₹5.40 ಲಕ್ಷ ವೆಚ್ಚದಲ್ಲಿ ವಾಲಿಬಾಲ್ ಅಂಕಣ ನಿರ್ಮಿಸಲು ಅವಕಾಶವಿದೆ. ಆದರೆ ಶೇ40ರಷ್ಟು ಸಾಮಗ್ರಿ ಮತ್ತು ಶೇ60ರಷ್ಟು ಕಾರ್ಮಿಕ ಕೆಲಸ ಕಡ್ಡಾಯವಾಗಿರುತ್ತದೆ’ ಎಂದು ವಿವರಿಸಿದರು.

‘ನರೇಗಾ ಯೋಜನೆಯಲ್ಲಿ ಬ್ಯಾಸ್ಕೆಟ್ ಬಾಲ್ ಅಂಕಣ ನಿರ್ಮಿಸಲು ಅವಕಾಶವಿದ್ದ ಬಗ್ಗೆ ಗ್ರಾಮಸ್ಥರಿಗೆ ಮನವರಿಕೆ ಮಾಡಲಾಗಿತ್ತು. ವಿದ್ಯಾರ್ಥಿಗಳು, ಶಿಕ್ಷಕರ ಜತೆಯೂ ಚರ್ಚಿಸಲಾಯಿತು. ಅವರ ಬೇಡಿಕೆಯಂತೆ ಕಾನಗೋಡಿನ ಪ್ರೌಢಶಾಲೆ ಆವರಣದಲ್ಲಿ ಅಂಕಣ ನಿರ್ಮಿಸಲಾಗಿದ್ದು ಸದುಪಯೋಗವಾಗುತ್ತಿದೆ’ ಎಂದು ಕಾನಗೋಡ ಗ್ರಾಮ ಪಂಚಾಯ್ತಿ ಪಿಡಿಒ ಪ್ರೀತಿ ಶೆಟ್ಟಿ ತಿಳಿಸಿದರು.