ಸಾಲಮನ್ನಾ: ₹ 7.85 ಕೋಟಿ ಬಡ್ಡಿ ನಷ್ಟ: ಎಸ್.ಎಲ್.ಘೋಟ್ನೇಕರ್

ಮಂಗಳವಾರ ಇಲ್ಲಿ ಸುದ್ದಿಗೋಷ್ಠಿಯಲ್ಲಿ ಮಾತನಾಡಿದ ಅವರು, ‘ಎರಡು ಕಂತುಗಳಲ್ಲಿ ಹಣ ಬಂದಿದೆ. ಇನ್ನೂ 29112 ರೈತರಿಗೆ ₹ 214.53 ಕೋಟಿ ಮೊತ್ತ ಸರ್ಕಾರದಿಂದ ಬರಬೇಕಾಗಿದೆ. ಕಳೆದ ಏಪ್ರಿಲ್‌ನಿಂದ ಆರ್ಥಿಕ ವರ್ಷದ ಅಂತ್ಯದವರೆಗೆ ಸರ್ಕಾರದಿಂದ ಬರಬೇಕಾಗಿರುವ ಸಾಲಮನ್ನಾ ಹಣದಿಂದ ಬ್ಯಾಂಕಿಗೆ ಬಡ್ಡಿ ಹಣ ನಷ್ಟವಾಗಿದೆ’ ಎಂದರು.

ಆರ್ಥಿಕ ವರ್ಷದ ಅಂತ್ಯದಲ್ಲಿ ಬ್ಯಾಂಕ್ ₹ 8.38 ಕೋಟಿ ನಿಕ್ಕಿ ಲಾಭಗಳಿಸಿದೆ. ಶೇರು ಬಂಡವಾಳ ₹ 58.57 ಕೋಟಿಯಿಂದ ₹ 69.87 ಕೋಟಿಗೆ, ನಿಧಿ ₹ 116.35 ಕೋಟಿಯಿಂದ ₹ 122.06 ಕೋಟಿಗೆ, ಠೇವು ₹ 1826.75 ಕೋಟಿಯಿಂದ ₹ 20201.42 ಕೋಟಿಗೆ ಏರಿಕೆಯಾಗಿದೆ. ಒಟ್ಟು ಆದಾಯ ₹ 194.79 ಕೋಟಿ ತಲುಪಿದೆ. ಸಾಲ ಬಾಕಿ ₹ 1734.95 ಕೋಟಿ, ದುಡಿಯುವ ಬಂಡವಾಳ ₹ 2717.04 ಕೋಟಿಯಷ್ಟಿದೆ ಎಂದು ವಿವರಿಸಿದರು.

ರಾಜ್ಯ ಸರ್ಕಾರದ ಬಡ್ಡಿ ರಿಯಾಯಿತಿ ಯೋಜನೆ ಅನ್ವಯ ಪ್ರಾಥಮಿಕ ಕೃಷಿ ಪತ್ತಿನ ಸಹಕಾರಿ ಸಂಘಗಳ ಮೂಲಕ ಜಿಲ್ಲೆಯ ರೈತರಿಗೆ ಕೃಷಿ ಸಾಲ ವಿತರಿಸಲಾಗಿದೆ. ಹೊರಬಾಕಿ ಇರುವ ಅಲ್ಪಾವಧಿ ಕೃಷಿ ಸಾಲಗಳಿಗೆ ಸಂಬಂಧಿಸಿ ಜಿಲ್ಲೆಯ 86,815 ರೈತರಿಗೆ ₹ 520 ಕೋಟಿ ಸಾಲ ಮನ್ನಾ ಸಿಗುವ ಅವಕಾಶವಿದೆ. ಕೃಷಿ ಚಟುವಟಿಕೆಗಳ ನಿರ್ವಹಣೆಯಲ್ಲಿ ಗಣನೀಯ ಏರಿಕೆಯಾಗಿರುವುದನ್ನು ಮನಗಂಡು ವಿವಿಧ ಬೆಳೆಗಳಿಗೆ ನೀಡುವ ಬೆಳೆಸಾಲದ ಎಕರೆವಾರು ಮಿತಿಯನ್ನು ಹೆಚ್ಚಿಸಲಾಗಿದೆ. ಕೇಂದ್ರ, ರಾಜ್ಯ ಸರ್ಕಾರಗಳ ಬಡ್ಡಿ ರಿಯಾಯಿತಿ ಯೋಜನೆಯಡಿ ₹ 76.14 ಕೋಟಿ ಮೊತ್ತ ಬ್ಯಾಂಕಿಗೆ ಬರಬೇಕಾಗಿದೆ ಎಂದು ಹೇಳಿದರು.

ಮುಂಗಾರು ಹಂಗಾಮಿನ ಫಸಲ್ ಬಿಮಾ ಯೋಜನೆಯಡಿ ಭತ್ತ ಬೆಳೆಗೆ ₹ 19.30 ಕೋಟಿ, ಹವಾಮಾನ ಆಧಾರಿತ ಬೆಳೆವಿಮೆ ಯೋಜನೆಯಡಿ ಅಡಿಕೆಗೆ ₹ 36.31 ಕೋಟಿ ವಿಮಾ ಮೊತ್ತ ರೈತರ ಖಾತೆಗೆ ಜಮಾ ಆಗಿದೆ ಎಂದು ಹೇಳಿದರು. ಬ್ಯಾಂಕಿನ ಉಪಾಧ್ಯಕ್ಷ ಭಾಸ್ಕರ ಹೆಗಡೆ ಕಾಗೇರಿ, ನಿರ್ದೇಶಕರಾದ ಜಿ.ಟಿ.ಹೆಗಡೆ ತಟ್ಟೀಸರ, ಜಿ.ಆರ್.ಹೆಗಡೆ ಸೋಂದಾ, ಮೋಹನದಾಸ ನಾಯಕ, ವ್ಯವಸ್ಥಾಪಕ ನಿರ್ದೇಶಕ ಎಸ್.ಪಿ.ಬಾಂದುರ್ಗಿ ಇದ್ದರು.