ಶಿರಸಿ | ಕಾಳುಮೆಣಸು: ಬಳ್ಳಿಯೇರಿದ ‘ಸೊರಗು ರೋಗ’

ಸೊರಗು ರೋಗ ಬಂದ ಬಳ್ಳಿಯ ಮೃದುಕಾಂಡ ಕುಡಿ ಎಲೆಗಳು ಕಪ್ಪು ವರ್ಣಕ್ಕೆ ತಿರುಗುತ್ತವೆ. ಬಳ್ಳಿಗಳಲ್ಲಿ ರೋಗವು ಪೂರ್ತಿ ವ್ಯಾಪಿಸಿ ಬಳ್ಳಿ ನಾಶವಾಗುತ್ತದೆ. ಮುಖ್ಯಕಾಂಡದ ನೆಲಮಟ್ಟ ಅಥವಾ ಕುತ್ತಿಗೆ ಭಾಗದಲ್ಲಿ ರೋಗ ಬಾಧಿಸಿದಲ್ಲಿ ಪೂರ್ತಿ ಬಳ್ಳಿ ಸೊರಗಿ ಒಣಗುತ್ತದೆ. ಪೋಷಕಾಂಶಗಳನ್ನು ಹೀರಿಕೊಳ್ಳುವ ಬೇರಿನ ಭಾಗಗಳಿಗೆ ರೋಗ ತಗುಲಿದಲ್ಲಿ ಮಳೆಯ ತೇವಾಂಶದಿಂದ ಬಳ್ಳಿಗಳ ಎಲೆಗಳು ಹಳದಿ ವರ್ಣಕ್ಕೆ ತಿರುಗಿ ಬಾಡಿ ಉದುರಿ ಹೋಗುತ್ತವೆ. ಈ ಹಂತದಲ್ಲಿ ಔಷಧಿಯೂ ಪ್ರಯೋಜನ ನೀಡದು. ಪೂರ್ತಿ ಬಳ್ಳಿ ಒಂದು ಇಲ್ಲವೇ ಒಂದೂವರೆ ತಿಂಗಳಲ್ಲಿ ಸಾಯುತ್ತದೆ ಎಂಬುದು ಬೆಳೆಗಾರರ ಆತಂಕದ ಮಾತಾಗಿದೆ.