ಶಿರಸಿ: ಮೂಲಸೌಕರ್ಯ ವಂಚಿತ ಸ್ಮಶಾನಗಳು; ಅಂತ್ಯಸಂಸ್ಕಾರಕ್ಕೂ ಸಾರ್ವಜನಿಕರಿಗೆ ತೊಡಕು

ನಗರಸಭೆ ವ್ಯಾಪ್ತಿಯಲ್ಲಿ 80 ಸಾವಿರಕ್ಕೂ ಹೆಚ್ಚಿನ ಜನಸಂಖ್ಯೆ ಇದೆ. ಮುಸ್ಲಿಂ ಹಾಗೂ ಕ್ರೈಸ್ತ ಸಮುದಾಯದವರಿಗೆ ಪ್ರತ್ಯೇಕ ಸ್ಮಶಾನಗಳಿವೆ. ನಗರದ ಹುಲೇಕಲ್ ರಸ್ತೆಯ ಗಣೇಶನಗರ, ಮರಾಠಿಕೊಪ್ಪ, ವಿದ್ಯಾನಗರ, ನೆಹರೂನಗರ, ಕಲ್ಕುಣಿ ಸಮೀಪ ಇರುವ ಸ್ಮಶಾನಗಳನ್ನು ಹಿಂದೂ ಸಮುದಾಯದವರಿಗೆ ಮೀಸಲಿಡಲಾಗಿದೆ. ಆದರೆ ಈ ಸ್ಮಶಾನಗಳು ಮೂಲ ಸೌಕರ್ಯದಿಂದ ಸಂಪೂರ್ಣ ವಂಚಿತವಾಗಿವೆ. ಇದರಿಂದ ಶವ ಸಂಸ್ಕಾರಕ್ಕೆ ತೊಡಕಾಗುತ್ತಿದೆ ಎಂಬುದು ಆಯಾ ಭಾಗದ ನಾಗರಿಕರ ದೂರಾಗಿದೆ.  

'ಬಹುತೇಕ ಸ್ಮಶಾನದಲ್ಲಿ ವ್ಯವಸ್ಥಿತವಾದ ಚಿತಾಗಾರವಿಲ್ಲ. ನೀರಿನ ಸೌಕರ್ಯವಿಲ್ಲ. ಶವ ದಹಿಸಲು ಕಟ್ಟಿಗೆ ಸಂಗ್ರಹವಿಲ್ಲ. ಶವ ಹೊತ್ತು ಸಾಗುವ ಜಾಗ ಉಬ್ಬು ತಗ್ಗುಗಳಿಂದ ಕೂಡಿದೆ. ಕಸದ ತೊಟ್ಟಿ ವ್ಯವಸ್ಥೆ ಕೂಡ ಇಲ್ಲ. ಬೆಳಕಿನ ವ್ಯವಸ್ಥೆ ಇಲ್ಲ. ಕಾಲಕಾಲಕ್ಕೆ ಸೂಕ್ತ ನಿರ್ವಹಣೆಯಿಲ್ಲದೆ ಸ್ಮಶಾನಗಳ ಆವರಣಗಳು ಕಾಡಿನಂತೆ ಮಾರ್ಪಟ್ಟಿವೆ' ಎನ್ನುತ್ತಾರೆ ಗಣೇಶನಗರದ ಚಂದನ್ ನಾಯ್ಕ.

'ಶವ ಸಂಸ್ಕಾರಕ್ಕೆ ಸ್ಮಶಾನಕ್ಕೆ ಬರುವ ವೃದ್ಧರು, ಅಂಗವಿಕಲರು, ಮಹಿಳೆಯರು ಮುಳ್ಳುಕಂಟಿ, ವಿಷಜಂತುಗಳ ಭಯ ಕಾಡುವ ಕಾರಣ ಕೃತಕ ಬೆಳಕಿನ ವ್ಯವಸ್ಥೆ ಮಾಡಿಕೊಂಡು ಬರುವಂತಾಗಿದೆ. ಆಕಸ್ಮಿಕ ದುರ್ಘಟನೆ, ಅಪಘಾತಗಳಂಥ ಸಂದರ್ಭದಲ್ಲಿ ಶವ ಸಂಸ್ಕಾರ ಹೆಚ್ಚಾಗಿ ರಾತ್ರಿ ವೇಳೆ ನಡೆಯುತ್ತವೆ. ಸ್ಮಶಾನದಲ್ಲಿ ಸಮರ್ಪಕ ಬೆಳಕಿನ ವ್ಯವಸ್ಥೆ ಇಲ್ಲದ ಕಾರಣ ಕತ್ತಲಲ್ಲೇ ಜನರು ಅಂತ್ಯಕ್ರಿಯೆ ನಡೆಸುವಂತಾಗಿದೆ' ಎನ್ನುತ್ತಾರೆ ಅವರು. 

'ಇತ್ತೀಚಿನ ವರ್ಷಗಳಲ್ಲಿ ಸ್ಮಶಾನದ ಅಭಿವೃದ್ಧಿಗೆ ಹಣ ಮೀಸಲಿಡಲಾಗುತ್ತಿದ್ದರೂ, ಅವುಗಳಿಗೆ ಮೂಲ ಸೌಕರ್ಯ ಕಲ್ಪಿಸುವಲ್ಲಿ ನಗರಸಭೆ ಅಧಿಕಾರಿಗಳು ವಿಫಲರಾಗಿದ್ದಾರೆ. ಕನಿಷ್ಠ ಸ್ವಚ್ಛತೆ ಕಾಪಾಡಲೂ ಆಗದ ದುಸ್ಥಿತಿಗೆ ನಗರಾಡಳಿತ ತಲುಪಿದಂತಿದೆ' ಎಂಬುದು ನಗರಸಭೆ ಸದಸ್ಯರೊಬ್ಬರ ಮಾತಾಗಿದೆ.