ಶಿರಸಿ: ಕಾಳು ಮೆಣಸಿನ ದರ ದಿಢೀರ್ ಏರಿಕೆ

ಶಿರಸಿ ಟಿಎಸ್‌ಎಸ್ ಮಾರುಕಟ್ಟೆಯಲ್ಲಿ ಶುಕ್ರವಾರ ಕ್ವಿಂಟಾಲ್‌ಗೆ ಗರಿಷ್ಠ ₹51,189 ಕ್ಕೆ ಮಾರಾಟವಾಗಿತ್ತು. ಶನಿವಾರ ಏಕಾಏಕಿ ₹5 ಸಾವಿರ ಏರಿ ಕ್ವಿಂಟಾಲ್‌ಗೆ ₹56 ಸಾವಿರ ಬೆಲೆ ದೊರಕಿತ್ತು. ಸೋಮವಾರ ಮಾರಾಟ ಬೆಲೆ ₹61,699 ತಲುಪಿತ್ತು. ಮಂಗಳವಾರ ₹63,508 ಗರಿಷ್ಠ ದರ ದಾಖಲಾಗಿದೆ. ಇದು ಇತ್ತೀಚಿನ ವರ್ಷಗಳ ದಾಖಲೆ ಬೆಲೆಯಾಗಿದೆ. 

2017ರಲ್ಲಿ ಕಾಳು ಮೆಣಸಿನ ಬೆಲೆ ₹60 ಸಾವಿಕ್ಕಿಂತ ಹೆಚ್ಚಿತ್ತು. ಅಂದು ಇಳಿಕೆ ಕಂಡಿದ್ದು, ಮತ್ತೆ ಏರಿರಲಿಲ್ಲ. ಇತ್ತೀಚೆಗೆ ಅಕ್ರಮವಾಗಿ ಭಾರತಕ್ಕೆ ನುಸುಳುತ್ತಿದ್ದ ಕಾಳು ಮೆಣಸಿನ ಪ್ರಮಾಣ ಕಡಿಮೆ ಇದೆ. ಇದರಿಂದ ಮಾರುಕಟ್ಟೆಯಲ್ಲಿ ಬೇಡಿಕೆ ಹೆಚ್ಚಿದೆ. ಹಾಗಾಗಿ ಕಾಳು ಮೆಣಸಿಗೆ ಮತ್ತೆ ಬೇಡಿಕೆ ಬಂದಿದೆ ಎಂಬುದು ಮಾರುಕಟ್ಟೆ ತಜ್ಞರ ಅಭಿಪ್ರಾಯವಾಗಿದೆ.