ಹಗರಿಬೊಮ್ಮನಹಳ್ಳಿ: ಅಂಕಸಮುದ್ರಕ್ಕೆ ಪಕ್ಷಿಗಳ ವಲಸೆ ಆರಂಭ; ಪಕ್ಷಿ ಪ್ರಿಯರಿಗೆ ಹಬ್ಬ

ತಾಲ್ಲೂಕಿನ ತುಂಗಭದ್ರಾ ಹಿನ್ನೀರು ಪ್ರದೇಶದಲ್ಲಿರುವ ಅಂಕಸಮುದ್ರ ಪಕ್ಷಿ ಸಂರಕ್ಷಿತ ಮೀಸಲು ಪ್ರದೇಶ. 244 ಎಕರೆ ಪ್ರದೇಶದ ವಿಸ್ತಾರದಲ್ಲಿ ಪ್ರತಿವರ್ಷ ದೇಶ ವಿದೇಶಗಳ ಹಲವಾರು ಪಕ್ಷಿಗಳು ಆಹಾರ ಅರಸಿ ಇಲ್ಲಿಗೆ ವಲಸೆ ಬರುತ್ತವೆ, ಚಳಿಗಾಲ ಆರಂಭವಾಗುತ್ತಲೇ ಪಕ್ಷಿಗಳ ಪೆರೇಡ್ ಆರಂಭವಾಗುತ್ತದೆ. ಆತಿಥ್ಯ ನೀಡಲು ಅಂಕಸಮುದ್ರ ಕೆರೆಯಲ್ಲಿರುವ ಮೀನುಗಳು, ತುಂಗಭದ್ರಾ ಹಿನ್ನೀರು ಪ್ರದೇಶಗಳಲ್ಲಿ ದೊರೆಯುವ ಕೀಟಗಳು ಇವೆ. ಬೆಳಗಿನ ಜಾವ ಆಹಾರಕ್ಕೆ ಹೊರಡುವ ಸಮಯ ಹಾಗೂ ಮತ್ತೆ ತಮ್ಮ ಸ್ಥಳಕ್ಕೆ ಬರುವ ಸೂರ್ಯ ಮುಳುಗುವ ಸಂದರ್ಭದಲ್ಲಿ ಹಕ್ಕಿಗಳ ನಿನಾದ ಕೇಳಲೆಂದೇ ವಿವಿಧ ಕಡೆಗಳಿಂದ ಪಕ್ಷಿ ಪ್ರಿಯರು ಬರುತ್ತಾರೆ.

ನಾರ್ಥನ್ ಶೆವಲರ್ (ಚಿಲಕ ಬಾತು), ಗಾರ್ಗೆನಿ (ಬಿಳಿ ಹುಬ್ಬಿನ ಬಾತು), ವುಡ್ ಶಾಂಡ್ ಪೈಪರ್ (ಚುಕ್ಕೆ ಗದ್ದೆ ಗೊರವ), ಕಾಮನ್ ಸ್ಯಾಂಡ್ ಪೈಪರ್ (ಗದ್ದೆ ಗೊರವ), ಪೇಂಟೆಡ್ ಸ್ಟಾರ್ಕ್ (ಬಣ್ಣದ ಕೊಕ್ಕರೆ) ಸ್ಪಾಟ್ ಬಿಲ್ಡ್ ಡಕ್, ಪೆಲಿಕಾನ್ (ಹೆಜ್ಜಾರ್ಲೆ), ಗ್ರೇ ಹೆರಾನ್ (ಬೂದು ಬಕ), ನೈಟ್ ಹೆರಾನ್ (ಇರುಳು ಬಕ), ಕ್ಯಾಟಲ್ ಈಗ್ರೇಟ್ (ಗೋವಕ್ಕಿ) ಸಹಿತ 150ಕ್ಕೂ ಹೆಚ್ಚು ಪ್ರಭೇದಗಳ ಪಕ್ಷಿಗಳು ಅಂಕಸಮುದ್ರದ ಅತಿಥಿಯಾಗಿವೆ.

ಜತೆಗೆ ಮಿಂಚು ಕೆಂಬರಲು (ಗ್ಲೋಸಿ ಐಬೀಸ್), ಪೇಂಟೆಡ್ ಸಾರ್ಟ್ (ಬಣ್ಣದ ಕೊಕ್ಕರೆ), ಓಬನ್ ಬಿಲ್ ಸ್ಟಾರ್ಕ್ (ಬಾಯ್ಕಳಕ), ಕೋಮ್ ಡಕ್ (ಕೊಂಬಿನ ಬಾತು) ಸೇರಿದಂತೆ 25ಕ್ಕೂ ಹೆಚ್ಚು ಪ್ರಭೇದಗಳ ಪಕ್ಷಿಗಳು ಸಂತಾನೋತ್ಪತ್ತಿಗಾಗಿ ಅಂಕಸಮುದ್ರಕ್ಕೆ ತಂಡೋಪತಂಡವಾಗಿ ಬರುತ್ತಿವೆ. ವಿವಿಧ ರಾಜ್ಯಗಳಲ್ಲಿನ ಕೆಲವು ಪಕ್ಷಿಗಳು ಇಲ್ಲಿಯೇ ವಾಸ್ತವ್ಯ ಹೂಡಿದರೆ, ವಿದೇಶಗಳ ಅತಿಥಿ ಬಾನಾಡಿಗಳು ಚಳಿಗಾಲ ಮುಗಿದ ಬಳಿಕ ಮತ್ತೆ ತಮ್ಮ ಸ್ಥಾನಕ್ಕೆ ಮರಳುತ್ತವೆ.