30 ಟಿಎಂಸಿ ಅಡಿ ನೀರು ಉಳಿಸಿದ ತೃಪ್ತಿ; ಕಾರ್ಯಾಚರಣೆ ಬಳಿಕ ಕನ್ನಯ್ಯ ನಾಯ್ಡು ಸಂತಸ

ಶನಿವಾರ ಇಲ್ಲಿ ಸುದ್ದಿಗೋಷ್ಠಿಯಲ್ಲಿ ಮಾತನಾಡಿದ ಅವರು, ‘ಸರ್ಕಾರದಿಂದ ಗೇಟ್‌ಗಳ ವಿನ್ಯಾಸ ತರಿಸಿಕೊಳ್ಳುತ್ತಿದ್ದರೆ ಕೆಲಸ ಇನ್ನೂ ಆರಂಭವಾಗುತ್ತಿರಲಿಲ್ಲ. ಇಲಾಖೆ ನೀಡುವ ವಿನ್ಯಾಸ ಬರುವುದಕ್ಕೆ ಮೂರು ತಿಂಗಳಾಗುತ್ತಿತ್ತು. ನಮ್ಮ ಬಳಿ ವಿನ್ಯಾಸದ ಬಗ್ಗೆ ನಿಖರ ಮಾಹಿತಿ ಇತ್ತು. ಹೀಗಾಗಿ ಕೆಲವೇ ಗಂಟೆಗಳಲ್ಲಿ ವಿನ್ಯಾಸ ಸಿದ್ಧಗೊಳಿಸಿ ಮೂರು ಕಂಪನಿಗಳಿಂದ ಗೇಟ್ ಸಿದ್ಧಪಡಿಸುವ ಕೆಲಸ ನಡೆಯಿತು’ ಎಂದರು.

‘ಅಣೆಕಟ್ಟೆಯ ಕ್ರಸ್ಟ್ ಗೇಟ್ ಮಟ್ಟ 1,613 ಅಡಿ. ಅಲ್ಲಿಯವರೆಗೆ ನೀರು ನಿಂತಾಗ ಜಲಾಶಯದಲ್ಲಿ ಸಂಗ್ರಹವಾಗುವುದು 40 ಟಿಎಂಸಿ ಅಡಿ ಮಾತ್ರ. ಧುಮ್ಮಿಕ್ಕುತ್ತಿರುವ ನೀರಿನಲ್ಲೇ ಮೊದಲ ಗೇಟ್ ಎಲಿಮೆಂಟ್ ಇಳಿಸಿದ್ದರಿಂದ 70 ಟಿಎಂಸಿ ಅಡಿ ನೀರು ಉಳಿದಿದೆ’ ಎಂದರು.

‘ನನಗೆ ಮೂರೂ ರಾಜ್ಯಗಳ ಜನರ ಬಗ್ಗೆ ಕಾಳಜಿ ಇರುವುದಕ್ಕೆ ಸೇವಾ ಭಾವದಿಂದ ಗೇಟ್ ಅಳವಡಿಕೆ ಮಾಡಿದ್ದೇನೆ. ಮುಂದೆ ಕ್ರಸ್ಟ್‌ ಗೇಟ್ ಸಿದ್ಧವಾಗುವ ತನಕ ಇದು ಸಮರ್ಥವಾಗಿ ನೀರು ತಡೆಹಿಡಿಯುತ್ತದೆ. ಆದರೆ, ಅಣೆಕಟ್ಟೆಯ ನೀರಿನ ನಿರ್ವಹಣೆಗಾಗಿ ಕ್ರಸ್ಟ್‌ಗೇಟ್‌ ಸಜ್ಜುಗೊಳಿಸುವಂತೆ ಶಿಫಾರಸು ಮಾಡಿ ಮೂರೂ ರಾಜ್ಯಗಳ ಮುಖ್ಯಮಂತ್ರಿಗಳಿಗೆ ವರದಿ ನೀಡುತ್ತೇನೆ’ ಎಂದರು.

‘ಎರಡು ವರ್ಷಗಳ ಹಿಂದೆ ಜಲಾಶಯಕ್ಕೆ ಬಂದಿದ್ದೆ. ಈ ಮೊದಲೇ ಸ್ಟಾಪ್ ಲಾಗ್ ಗೇಟ್ ಅಳವಡಿಕೆ ಮಾಡುವುದಕ್ಕೆ ಹೇಳಿದ್ದೆ. ಆಗ ಎಲ್ಲವೂ ಸರಿ ಇದೆ ಅಂತ  ಹೇಳಿದ್ದರು. ತಜ್ಞರು ಈ ಬಾರಿಯೂ ಕ್ರಸ್ಟ್‌ಗೇಟ್‌ಗಳು ಸುಸ್ಥಿತಿಯಲ್ಲಿಯೇ ಇವೆ ಎಂದಿದ್ದರು. ಇನ್ನೂ ಎಂಟು ಗೇಟ್‌ಗಳು ಶಿಥಿಲಗೊಂಡಿವೆ ಎಂಬ ವದಂತಿಗಳಿಗೆ ಕಿವಿಗೊಡುವ ಅಗತ್ಯವಿಲ್ಲ’ ಎಂದು ಹೇಳಿದರು.

‘ಒಂದು ಕಲ್ಲು ಜಾರಿದರೂ ಕಷ್ಟ’

‘ಕಲ್ಲು ಮತ್ತು ಗಾರೆಯಿಂದ ತುಂಗಭದ್ರಾ ಅಣೆಕಟ್ಟೆ ನಿರ್ಮಾಣವಾಗಿದೆ. ಒಂದು ಕಲ್ಲು ಜಾರಿದರೂ ಅಣೆಕಟ್ಟೆಗೆ ಅಪಾಯ ಇದೆ. ಗೇಟ್‌ ಕೂರಿಸುವಾಗ ಸವಾಲು ಎದುರಿಸಬೇಕಾಯಿತು. ಒಂದು  ವಿನ್ಯಾಸದಲ್ಲಿ ಅಧಿಕ ಸಾಮರ್ಥ್ಯಕ್ಕಾಗಿ ಸ್ವಲ್ಪ ಉದ್ದದ ಕೊಂಡಿ ಮಾಡಿದ್ದೆವು. ಆದರೆ ಕಲ್ಲನ್ನು ಮುಟ್ಟುವಂತಿಲ್ಲ ಎಂಬ ಸಂದೇಶ ಕೇಂದ್ರದಿಂದ ಬಂತು’ ಎಂದು ಕನ್ನಯ್ಯ ನಾಯ್ಡು ಹೇಳಿದರು.

‘ಹೆಚ್ಚುವರಿ ಉದ್ದದ ಭಾಗ ತುಂಡರಿಸಬೇಕಾಯಿತು. ಸ್ಕೈವಾಕ್‌ ಇಳಿಸುವುದಕ್ಕೆ ಸಹ ಕೇಂದ್ರ ಮೊದಲು ಒಪ್ಪಿರಲಿಲ್ಲ. ಮುಖ್ಯಮಂತ್ರಿ ಅವರಿಗೆ ತಿಳಿಸಿದಾಗ ಅವರು ಕೇಂದ್ರದ ಮನವೊಲಿಸಿದರು. ಅಣೆಕಟ್ಟೆಗೆ ಆಯಸ್ಸಾಗಿದೆ. ಇನ್ನು ಮುಂದೆ ಇದನ್ನು ಬಹಳ ಜಾಗರೂಕತೆಯಿಂದ ನೋಡಬೇಕಾಗುತ್ತದೆ’ ಎಂದರು.