ಬುಧವಾರ, ಅಕ್ಟೋಬರ್ 21, 2020
21 °C
ಜಿಲ್ಲೆಯಾದ್ಯಂತ ವ್ಯಾಪಕ ಮಳೆ: ಡೋಣಿ ನದಿಯಲ್ಲಿ ಪ್ರವಾಹ

ವಿಜಯಪುರ: 135 ಮನೆಗಳಿಗೆ ಹಾನಿ, 3 ಕುರಿ, ಒಂದು ಎತ್ತು ಸಾವು

ಪ್ರಜಾವಾಣಿ ವಾರ್ತೆ Updated:

ಅಕ್ಷರ ಗಾತ್ರ : | |

Prajavani

ವಿಜಯಪುರ: ನಗರ ಸೇರಿದಂತೆ ಜಿಲ್ಲೆಯಾದ್ಯಂತ ಶುಕ್ರವಾರ ರಾತ್ರಿಯಿಂದ ಆರಂಭವಾದ ಮಳೆ ಶನಿವಾರ ದಿನವಿಡೀ ಬಿಟ್ಟು ಬಿಡದೆ ವ್ಯಾಪಕವಾಗಿ ಸುರಿದಿದೆ. ಜಿಲ್ಲೆಯಲ್ಲಿ ಒಟ್ಟು 34.58 ಮಿ.ಮೀ.ಮಳೆ ದಾಖಲಾಗಿದೆ.

ಭಾರೀ ಮಳೆಯ ಪರಿಣಾಮ ಸಿಂದಗಿಯಲ್ಲಿ ಎರಡು ಕುರಿ ಮತ್ತು ಒಂದು ಎತ್ತು ಹಾಗೂ ಮುದ್ದೇಬಿಹಾಳದಲ್ಲಿ ಒಂದು ಆಡು ಸಾವಿಗೀಡಾಗಿದೆ ಹಾಗೂ ಜಿಲ್ಲೆಯಲ್ಲಿ ಒಟ್ಟು 135 ಮನೆಗಳು ಭಾಗಶಃ ಹಾನಿಗೊಳಗಾಗಿವೆ ಎಂದು ಜಿಲ್ಲಾಧಿಕಾರಿ ಪಿ.ಸುನೀಲ್‌ಕುಮಾರ್‌ ತಿಳಿಸಿದ್ದಾರೆ.

ಶನಿವಾರ ಮತ್ತು ಭಾನುವಾರ ಜಿಲ್ಲೆಯಲ್ಲಿ ವ್ಯಾಪಕ ಮಳೆಯಾಗುವ ಸಾಧ್ಯತೆ ಇರುವುದರಿಂದ ಹವಾಮಾನ ಇಲಾಖೆಯು ಜಿಲ್ಲೆಯಲ್ಲಿ ಯೆಲ್ಲೊ ಅಲರ್ಟ್‌ ಘೋಷಿಸಿತ್ತು.

ಶನಿವಾರ ರಾತ್ರಿ 7 ಗಂಟೆಯಿಂದ ಗುಡುಗು, ಮಿಂಚಿನೊಂದಿಗೆ ನಿಧಾನವಾಗಿ ಆರಂಭವಾದ ಮಳೆ ರಾತ್ರಿಯಿಡೀ ಧಾರಾಕಾರವಾಗಿ ಸುರಿತು. ಶನಿವಾರ ದಿನಪೂರ್ತಿ ಆಗಸದಲ್ಲಿ ಮೋಡಗಳು ದಟ್ಟೈಸಿದ್ದವು. ಆಗಾಗ ಬಿರುಸು, ಆಗಾಗ ತುಂತುರು ಮಳೆ ಸುರಿದ ಪರಿಣಾಮ ಜನ ಮನೆಬಿಟ್ಟು ಹೊರಬರದಂತೆ ನಿರ್ಬಂಧ ವಿಧಿಸಿತ್ತು. ಸೂರ್ಯನ ದರ್ಶನವಿಲ್ಲದೇ ದಿನವಿಡೀ ಶೀತಮಯ ವಾತಾವರಣ ನಿರ್ಮಾಣವಾಗಿತ್ತು. 

ಮಳೆಯಿಂದ ಬಹುತೇಕ ಹೊಲಗಳಲ್ಲಿ ಹಾಗೂ ತಗ್ಗು ಪ್ರದೇಶದಲ್ಲಿ ನೀರು ನಿಂತಿರುವುದು ಕಂಡುಬಂದಿತು. ಚರಂಡಿ, ಹಳ್ಳಗಳು ತುಂಬಿ ಹರಿದವು. ತಾಳಿಕೋಟೆ–ಹಡಗಿನಾಳ ನೆಲಮಟ್ಟದ ಸೇತುವೆ ಮೇಲೆ ಡೋಣಿ ನದಿ ಉಕ್ಕಿ ಹರಿದ ಪರಿಣಾಮ ಈ ಮಾರ್ಗದಲ್ಲಿ ಸಂಚಾರ ಸ್ಥಗಿತವಾಗಿತ್ತು.

ಭಾರೀ ಮಳೆಯಿಂದಾಗಿ ಹೊಲಗಳಲ್ಲಿ ನೀರು ನಿಂತಿರುವುದರಿಂದ ಬೆಳೆಗೆ ಅನಾನುಕೂಲವಾಗಿದ್ದು, ರೈತರು ಆತಂಕಕ್ಕೆ ಒಳಗಾಗಿದ್ದಾರೆ.

ಆಲಮೇಲದಲ್ಲಿ ದಾಖಲೆ ಮಳೆ: ಜಿಲ್ಲೆಯ ಆಲಮೇಲದಲ್ಲಿ ಒಂದೇ ದಿನ 79.5 ಮಿ.ಮೀ ಮಳೆ ದಾಖಲಾಗಿದೆ. ಉಳಿದಂತೆ ವಿಜಯಪುರ 53.4, ನಾಗರಾಠ 6.3, ಭೂತನಬಾಳ 28.8, ಹಿಟ್ನಳ್ಳಿ 60.6, ಮಮದಾಪುರ 25.2, ಬಬಲೇಶ್ವರ 26.8, ಕುಮಟಗಿ 31.4, ತಿಕೋಟಾ 25.2, ಕನ್ನೂರು 8.3, ಬಾಗೇವಾಡಿ 44.2, ಮನಗೂಳಿ55, ಹೂವಿನ ಹಿಪ್ಪರಗಿ 64.8, ಆಲಮಟ್ಟಿ 27, ಅರೇಶಂಕರ 36.6,ಮುದ್ದೇಬಿಹಾಳ 43, ನಾಲತವಾಡ 58.4, ತಾಳಿಕೋಟೆ 65.1, ಡವಳಗಿ 48.6, ಇಂಡಿ 16.5, ನಾದಾ ಬಿ.ಕೆ. 28.3, ಅಗರಖೇಡ 24.1, ಹೊರ್ತಿ 11.4, ಹಲಸಂಗಿ 16, ಚಡಚಣ 15, ಝಳಕಿ 9, ಸಿಂದಗಿ 38, ರಾಮನಹಳ್ಳಿ 36, ದೇವರ ಹಿಪ್ಪರಗಿ 60 ಮತ್ತು ಕೊಂಡಗುಳಿ 58 ಮಿ.ಮೀ.ಮಳೆಯಾಗಿದೆ.

ಪ್ರಜಾವಾಣಿ ಫೇಸ್‌ಬುಕ್ ಪುಟವನ್ನು ಲೈಕ್ ಮಾಡಿ, ಪ್ರಮುಖ ಸುದ್ದಿಗಳ ಅಪ್‌ಡೇಟ್ಸ್ ಪಡೆಯಿರಿ.

ಪ್ರಜಾವಾಣಿಯನ್ನು ಟ್ವಿಟರ್‌ನಲ್ಲಿ ಇಲ್ಲಿ ಫಾಲೋ ಮಾಡಿ.

ಟೆಲಿಗ್ರಾಂ ಮೂಲಕ ನಮ್ಮ ಸುದ್ದಿಗಳ ಅಪ್‌ಡೇಟ್ಸ್ ಪಡೆಯಲು ಇಲ್ಲಿ ಕ್ಲಿಕ್ ಮಾಡಿ.

ಈ ವಿಭಾಗದಿಂದ ಇನ್ನಷ್ಟು