ಸೋಲಾಪುರ: ಐದು ಕ್ವಿಂಟಾಲ್‌ ಉಳ್ಳಾಗಡ್ಡಿಗೆ ₹ 2 !

ಫೆ.17 ರಂದು ನಗರದ ಕೃಷಿ ಉತ್ಪನ್ನ ಮಾರುಕಟ್ಟೆಯಲ್ಲಿ ರೈತರೊಬ್ಬರು ಮಾರಾಟ ಮಾಡಿದ ಐದು ಕ್ವಿಂಟಾಲ್‌ ಈರುಳ್ಳಿಗೆ ₹2 ಚೆಕ್ ನೀಡಲಾಗಿದೆ!

ಈ ಪ್ರಕರಣದ ಕೆಲವೇ ದಿನಗಳ ಮೊದಲು ಫೆ. 1ರಂದು ಜಿಲ್ಲೆಯ ದಾವತಪುರದ ರೈತ ಬಂಡು ಭಾಂಗೆ ಎಂಬುವವರು ಈರುಳ್ಳಿ ವ್ಯಾಪಾರಿ ಎಸ್. ಎನ್. ಜಾವಳೆ ಅವರಿಗೆ 825 ಕೆ.ಜಿ ಈರುಳ್ಳಿ ಮಾರಾಟ ಮಾಡಿದ್ದಾರೆ. ವ್ಯಾಪಾರಿ ಪ್ರತಿ ಕ್ವಿಂಟಲ್ ಗೆ ₹100ರಂತೆ ಒಟ್ಟು ₹ 825 ದರ ನೀಡಿ ಕಳುಹಿಸಿದ್ದಾರೆ. ಅದರಲ್ಲಿ ಹಮಾಲಿ ಕೂಲಿ ₹ 65.18, ತೂಕದ ಖರ್ಚು ₹ 38.78, ಇತರ ಹಮಾಲಿ ₹25.50, ವಾಹನದ ಬಾಡಿಗೆ ₹697 ಸೇರಿದಂತೆ ಒಟ್ಟು ₹826 ನೀಡಿದ್ದಾರೆ. ಅಲ್ಲದೇ, ರೈತ ಕೈಯಿಂದ ವ್ಯಾಪಾರಿಗೆ ₹1 ನೀಡಿ ಬರಿಗೈಲಿ ಮನೆಗೆ ಹಿಂದಿರುಗಿದ್ದಾರೆ. ಈ ಬಿಲ್ಲಿನ ಮೊತ್ತದ ಪಾವತಿ ಫೇಸ್‌ಬುಕ್‌, ವಾಟ್ಸ್‌ ಆ್ಯಪ್‌ಗಳಲ್ಲಿ ಜೋರಾಗಿ ಹರಿದಾಡುತ್ತಿದೆ.

ಇದನ್ನರಿತ ಸ್ವಾಭಿಮಾನಿ ಶೇತಕರಿ ಸಂಘಟನೆ ಸರ್ಕಾರ ರೈತರಿಗೆ ಪ್ರತಿ ಕ್ವಿಂಟಲ್ ಗೆ ₹500 ಸಹಾಯಧನ ನೀಡಬೇಕೆಂದು ಅಗ್ರಹಿಸಿದೆ.

ಮಾರುಕಟ್ಟೆಯಲ್ಲಿ ಈರುಳ್ಳಿ ಕೆಜಿಗೆ ₹15ರಂತೆ ಮಾರಾಟವಾಗುತ್ತಿದೆ. ಕೃಷಿ ಉತ್ಪನ್ನ ಮಾರುಕಟ್ಟೆಯಲ್ಲಿರುವ ಮಧ್ಯವರ್ತಿ ವ್ಯಾಪಾರಿಗಳು ರೈತರಿಂದ ಕೆ.ಜಿಗೆ ₹1, ₹2 ರಂತೆ ಮಾರಾಟ ಮಾಡಿ ಖರೀದಿಸಿ, ರೈತರನ್ನು ಮೋಸ ಮಾಡುತ್ತಿದ್ದಾರೆ. ರಾಜ್ಯ ಸರ್ಕಾರ ತ್ವರಿತವಾಗಿ ರೈತರಿಗೆ ಧನ ಸಹಾಯ ಮಾಡುವ ವ್ಯವಸ್ಥೆ ಮಾಡಬೇಕು ಇಲ್ಲದಿದ್ದರೆ ತೀವ್ರ ಆಂದೋಲನ ಮಾಡುವುದಾಗಿ ಸೋಲಾಪುರ ಸ್ವಾಭಿಮಾನಿ ಶೇತಕರಿ ಸಂಘಟನೆಯ ಜಿಲ್ಲಾ ಅಧ್ಯಕ್ಷ ವಿಜಯ ರಣದಿವೆ ಆಗ್ರಹಿಸಿದ್ದಾರೆ.