ಕಕ್ಕೇರಾ: ಉಪವಿಭಾಗಾಧಿಕಾರಿ ಹಂಪಣ್ಣ ಸಜ್ಜನ ಅವರು ಗುರುವಾರ ಪುರಸಭೆ ಕಚೇರಿ, ಉದ್ಘಾಟನೆಯಾಗದ ನೂತನ ಉಪ ತಹಶೀಲ್ದಾರ್ ಕಚೇರಿ, ಕಸ ವಿಲೇವಾಗಿ ಘಟಕ ಹಾಗೂ ಪ್ರವಾಹ ಪೀಡಿತ ನೀಲಕಂಠರಾಯನಗಡ್ಡಿಗೆ ಭೇಟಿ ನೀಡಿ ಪರಿಶೀಲನೆ ನಡೆಸಿದರು.
ಗುರುವಾರ ಪುರಸಭೆಗೆ ಭೇಟಿ ನೀಡಿ ಕೆಲವೊಂದು ಕಡತಗಳನ್ನು ಪರಿಶೀಲಿಸಿ ಕಚೇರಿಯ ಪ್ರತಿಯೊಬ್ಬ ನೌಕರರು ಸರಿಯಾಗಿ ವೇಳೆಗೆ ಆಗಮಿಸಿ ಸಾರ್ವಜನಿಕರ ಕುಂದುಕೊರತೆಗಳನ್ನು ಆಲಿಸಿ ಸ್ಪಂದಿಸಬೇಕು ಎಂದು ಸೂಚಿಸಿದರು.
ನಂತರ ಹೊಸದಾಗಿ ಸಂತೆ ಮಾರುಕಟ್ಟೆ ಆವರಣದಲ್ಲಿ ನಿರ್ಮಿಸಲಾದ ಹಾಗೂ ಉದ್ಘಾಟನೆಯಾಗದ ನೂತನ ಉಪ ತಹಶೀಲ್ದಾರ ಕಚೇರಿ ಪರಿಶೀಲಿಸಿ ನೂತನ ಕಟ್ಟಡದ ಪಕ್ಕ ಚರಂಡಿಯ ನಿಂತ ನೀರು, ಹೊಲಸು ಇತ್ಯಾದಿಗಳನ್ನು ಪರಿಶೀಲಿಸಿದರು. ನಂತರ ಹೊರವಲಯದಲ್ಲಿ ನಿರ್ಮಿಸಲಾಗುತ್ತಿರುವ ಕಸ ವಿಲೇವಾರಿ ಘಟಕದ ಕಾಮಗಾರಿ ವೀಕ್ಷಿಸಿದರು.
ಆನಂತರ ಪ್ರವಾಹ ಪೀಡಿತ ನೀಲಕಂಠರಾಯನಗಡ್ಡಿ ತೀರಕ್ಕೆ ಆಗಮಿಸಿ ಕೃಷ್ಣಾನದಿಯ ಪ್ರವಾಹವನ್ನು ಗಮನಿಸಿ ನದಿಗೆ ಎಷ್ಟು ಪ್ರಮಾಣದ ನೀರು ಬಂದರೆ ನಡುಗಡ್ಡಿಯ ಕಿರು ಸೇತುವೆ ಮುಳುಗಡೆಯಾಗಲಿದೆ ಎಂದು ಮಾಹಿತಿ ಪಡೆದರು.
’ನಡುಗಡ್ಡಿ ಜನರ ಸುರಕ್ಷತೆ ಹಾಗೂ ಪ್ರವಾಹದ ಕುರಿತು ಜನರಲ್ಲಿ ಜಾಗೃತಿ ಮೂಡಿಸಿ’ ಎಂದು ಸ್ಥಳದಲ್ಲಿದ್ದ ಪುರಸಭೆ ಮುಖ್ಯಧಿಕಾರಿ ಹಾಗೂ ಕಂದಾಯ ಅಧಿಕಾರಿಗಳಿಗೆ ಸೂಚಿಸಿದರು.
