ಕಲಿಕಾ ಪ್ರಾವೀಣ್ಯಕ್ಕೆ ಕೃತಕ ಬುದ್ಧಿಮತ್ತೆ

ಈ ನಿಟ್ಟಿನಲ್ಲಿ ಕೃತಕ ಬುದ್ಧಿಮತ್ತೆ (ಎಐ), ವರ್ಚುವಲ್‌ ರಿಯಾಲಿಟಿ (ವಿಆರ್‌) ಮತ್ತು ಎಆರ್‌ನಂತಹ ತಂತ್ರಜ್ಞಾನಗಳು ಇ– ಕಲಿಕೆಯಲ್ಲಿ ಹೆಚ್ಚಿನ ಮಟ್ಟದ ಬದಲಾವಣೆಯನ್ನು ತಂದಿವೆ. ಇದು ವಿದ್ಯಾರ್ಥಿಯು ಕಲಿಕೆಯಲ್ಲಿ ಹೆಚ್ಚು ತಲ್ಲೀನವಾಗುವಂತೆ ಪ್ರೇರೇಪಿಸುತ್ತದೆ. ಉದಾಹರಣೆಗೆ ವಿದೇಶಿ ಭಾಷೆಯನ್ನು ಒಬ್ಬ ವಿದ್ಯಾರ್ಥಿಗೆ ಕಲಿಸಬೇಕಾದರೆ ಕೋರ್ಸ್‌ನಲ್ಲಿರುವ ವಿಷಯಗಳ ಜೊತೆ ಇವೆಲ್ಲ ತಂತ್ರಜ್ಞಾನಗಳನ್ನು ಬಳಸಿ ಬೋಧನೆ ಮಾಡಬೇಕಾಗುತ್ತದೆ. ಹಾಗೆಯೇ ಕಲಿತಿರುವುದನ್ನು ಬಳಸುವಂತಹ ವಾತಾವರಣ ಕಲ್ಪಿಸಬೇಕಾಗುತ್ತದೆ. ನಂತರ ವಿದ್ಯಾರ್ಥಿಯು ಅದನ್ನು ಈ ಜಗತ್ತಿಗೆ ತೆರೆದುಕೊಂಡು ಕೌಶಲಗಳ ಬಳಕೆ ಮಾಡುತ್ತ ಅದರಲ್ಲಿ ಪಾರಂಗತನಾಗಬೇಕಾಗುತ್ತದೆ. ಈ ನಿಟ್ಟಿನಲ್ಲಿ ಬರವಣಿಗೆ, ದೃಶ್ಯ– ಶ್ರಾವ್ಯ, ಆಂಗಿಕ ಭಾಷೆಯ ಬಳಕೆ ಅತ್ಯಗತ್ಯ.

ಚಟುವಟಿಕೆಯನ್ನು ಹೆಚ್ಚಿಸಬೇಕು: ವಿದ್ಯಾರ್ಥಿಗೆ ಹೊಸ ವಿಷಯವನ್ನು ಕಲಿಸಬೇಕಾದರೆ ನಿರಂತರ ಚಟುವಟಿಕೆಗಳಲ್ಲಿ ಪಾಲ್ಗೊಳ್ಳುವಂತಹ ವಾತಾವರಣ ಸೃಷ್ಟಿಸಬೇಕು. ಅಂದರೆ ಬೇರೆಯವರ ಜೊತೆಗೆ ಹೆಚ್ಚು ಸಂವಾದ ನಡೆಸುವಂತಹ, ಸಮಾಜದಲ್ಲಿ ಏನು ನಡೆಯುತ್ತದೆಯೋ ಅಂತಹ ವಾತಾವರಣ ಇರಬೇಕು. ಉದಾಹರಣೆಗೆ ಕಚೇರಿಯಲ್ಲಿ ಇತರ ಉದ್ಯೋಗಿಗಳ ಜೊತೆ ನೇರಾ ನೇರ ಸಂವಹನ ನಡೆಸುವಂತಹ ವಾತಾವರಣಕ್ಕೆ ಹೊಂದಿಕೊಳ್ಳಬೇಕಾದರೆ ಅಂತಹ ಕೌಶಲವನ್ನು ದೃಶ್ಯ– ಶ್ರಾವ್ಯದ ಮೂಲಕ ಕಲಿಸುವ ಪದ್ಧತಿ ನೆರವಾಗುತ್ತದೆ. ವಿದ್ಯಾರ್ಥಿ ಕಂಪ್ಯೂಟರ್‌ ಮೂಲಕ ಕಲಿತಿದ್ದನ್ನು ವಾಸ್ತವತೆಗೆ ತೆರೆದುಕೊಂಡು ಅಭ್ಯಾಸ ಮಾಡಿದರೆ ಇಂತಹ ಕೌಶಲ ಸಿದ್ಧಿಸುತ್ತದೆ.

ಮಾಡಿ ತಿಳಿ: ನೋಡಿ ಕಲಿತಿದ್ದನ್ನು ಮಾಡಿ ತಿಳಿಯಬೇಕು. ಏಕಾಗ್ರತೆ ಅಥವಾ ಕಲಿಕಾ ವಿಷಯದಲ್ಲಿ ತಲ್ಲೀನರಾಗಬೇಕಾದರೆ ಅಧ್ಯಯನದಲ್ಲಿ ಕಲಿತ ವಿಷಯವನ್ನು ಅಥವಾ ನೋಡಿ ಕಲಿತಿದ್ದನ್ನು ಅಭ್ಯಾಸ ಮಾಡಿ ಪ್ರಯೋಗಕ್ಕೆ ಇಳಿಸಬೇಕು. ಉದಾಹರಣೆಗೆ ಸಾಫ್ಟ್‌ವೇರ್‌ ಮೂಲಕ ಸಮಸ್ಯೆ ಬಗೆಹರಿಸುವುದನ್ನು ಕಲಿತಿರಬಹುದು. ಆದರೆ ಅದನ್ನು ನಿಜವಾದ ಕೆಲಸದ ವಾತಾವರಣಕ್ಕೆ ಅನ್ವಯಿಸಬೇಕು. ಪಠ್ಯದಲ್ಲಿ ಅಧ್ಯಯನದ ವಿಷಯದ ಜೊತೆಗೆ ವರ್ಚುವಲ್‌ ತರಗತಿ ಮಾದರಿಯನ್ನು ಅಳವಡಿಸಿದರೆ ಇಂತಹ ಕೌಶಲವನ್ನು ಕಲಿಯಬಹುದು. ಹಾಗೆಯೇ ಪ್ರಯೋಗಾಲಯದಲ್ಲಿ ಕಲಿತಿದ್ದರ ಜೊತೆಗೆ ಇತರ ಕೌಶಲಗಳನ್ನು ಸೇರಿಸಿದರೆ ಹೊಸ ಅನುಭವ ಪಡೆದು ಭವಿಷ್ಯದ ಸವಾಲುಗಳನ್ನು ಎದುರಿಸಲು ಸನ್ನದ್ಧರಾಗಬಹುದು.

ಆಂತರಿಕ ಚಟುವಟಿಕೆ: ತಾಂತ್ರಿಕ ಕೌಶಲದ ಕುರಿತು ಕಲಿಕಾರ್ಥಿಯು ತಕ್ಷಣದ ಪ್ರತಿಕ್ರಿಯೆ ನೀಡಬೇಕಾದರೆ ಪರಸ್ಪರ ಪೂರಕ ಚಟುವಟಿಕೆಗಳಲ್ಲಿ ನುರಿತಿರಬೇಕು. ಅಂದರೆ ಸಾಮಾಜಿಕ ಜಾಲತಾಣವನ್ನು ನಿರ್ವಹಿಸುವ ಕೌಶಲ ಕಲಿತಿದ್ದರೆ ಮಾತ್ರ ಅದರ ಕುರಿತು, ಅದರಲ್ಲಿ ಅಡಗಿರುವ ಟೂಲ್‌ಗಳ ಬಗ್ಗೆ ಮಾತನಾಡಲು ಸಾಧ್ಯ. ಈ ನಿಟ್ಟಿನಲ್ಲಿ ಕೃತಕ ಬುದ್ಧಿಮತ್ತೆ ವಿದ್ಯಾರ್ಥಿಯ ನೆರವಿಗೆ ಬರುತ್ತದೆ. ನಿಜವಾದ ಕಾರ್ಯಕ್ಷೇತ್ರದಲ್ಲಿ ಯಾವೆಲ್ಲ ಸಮಸ್ಯೆಗಳನ್ನು ಎದುರಿಸಬೇಕು ಎಂಬಂತಹ ವಾತಾವರಣವನ್ನು ಕೃತಕ ಬುದ್ಧಿಮತ್ತೆ ಬಳಸಿ ಸೃಷ್ಟಿಸಬಹುದು. ಆಗ ವಿದ್ಯಾರ್ಥಿಗೆ ಅದರ ಒಳಹೊರಗು ಅರ್ಥವಾಗುತ್ತದೆ.

ವಿದ್ಯಾರ್ಥಿ ತಾನು ಕಲಿತಿರುವುದನ್ನು ಪದೇ ಪದೇ ಪುನರಾವರ್ತಿಸಬೇಕಾಗುತ್ತದೆ. ಇದರಿಂದ ಆ ವಿಷಯದಲ್ಲಿ ಪ್ರಾವೀಣ್ಯತೆ ಸಾಧಿಸಬಹುದು; ಅದನ್ನು ಪರಿಣಾಮಕಾರಿಯಾಗಿ ಬಳಸಬಹುದು. ಇದಕ್ಕಾಗಿ ಅಂದರೆ ಹೆಚ್ಚು ಪರಿಣಾಮಕಾರಿ ಕಲಿಕೆಗೆ ಅಲ್ಪಾವಧಿ ಕೋರ್ಸ್‌ಗಳ ಮೊರೆ ಹೋಗಬಹುದು.