ಇಂದೋರ್‌: ಫ್ಯಾಶನ್ ಶೋ ಒಂದರಲ್ಲಿ, ತೆರೆದೆದೆಯಲ್ಲಿ ಹಿಂದೂ ದೇವತೆಯಾದ ಲಕ್ಷ್ಮಿ ಚಿತ್ರವಿರುವ ಆಭರಣ ಹಾಕಿಕೊಂಡು ಪ್ರದರ್ಶನ ಮಾಡಿದ್ದಕ್ಕೆ ನಟಿ ತಾಪ್ಸಿ ಪನ್ನು ಇದೀಗ ಸಂಕಷ್ಟಕ್ಕೆ ಸಿಲುಕಿದ್ದಾರೆ.
ಹೌದು, ಈ ವಿಷಯವಾಗಿ ನಟಿಯ ವಿರುದ್ಧ ಮಧ್ಯಪ್ರದೇಶದ ಬಿಜೆಪಿ ಶಾಸಕಿ ಮಾಲಿನಿ ಗೌರ್ ಅವರ ಪುತ್ರ ಏಕಲವ್ಯ ಗೌರ್ ಅವರು ಛತ್ರಿಪುರ್ ಪೊಲೀಸ್ ಠಾಣೆಯಲ್ಲಿ ದೂರು ದಾಖಲಿಸಿದ್ದಾರೆ.
ಹಿಂದೂ ಧಾರ್ಮಿಕ ಭಾವನೆಗಳಿಗೆ ದಕ್ಕೆ ತಂದ ಆರೋಪದಡಿ ಪೊಲೀಸರು ಪ್ರಕರಣ ದಾಖಲಿಸಿಕೊಂಡು ತಾಪ್ಸಿ ಅವರಿಗೆ ನೋಟಿಸ್ ಕಳಿಸಿರುವುದಾಗಿ ಎಎನ್‌ಐ ಸುದ್ದಿಸಂಸ್ಥೆ ತಿಳಿಸಿದೆ.
Indore, MP | We received a complaint from Eklavya Gaur (son of BJP MLA Malini Gaur) against actor Tapsee Pannu for hurting religious sentiments & image of 'Sanatan Dharma' by wearing a locket having 'Goddess Laxmi' with revealing dress during ramp walk at Lakme Fashion Week held… pic.twitter.com/BtoA4PfiY2
ಏಕಲವ್ಯ ಗೌರ್ ಅವರು ‘ಹಿಂದ್ ರಕ್ಷಕ್ ಸಂಘಟನಾ’ದ ಸಂಚಾಲಕರಾಗಿಯೂ ಕೆಲಸ ಮಾಡುತ್ತಿದ್ದಾರೆ.
ಮಾರ್ಚ್ 12 ರಂದು ಮುಂಬೈನಲ್ಲಿ ಆಯೋಜಿಸಿದ್ದ ಫ್ಯಾಶನ್ ಶೋ ಒಂದರಲ್ಲಿ ತಾಪ್ಸಿ, ಲಕ್ಷ್ಮಿದೇವಿಯ ದೊಡ್ಡ ಚಿತ್ರವಿರುವ ನೆಕ್‌ಲೆಸ್‌ ಅನ್ನು ತೆರೆದೆದೆಯಲ್ಲಿ ಪ್ರದರ್ಶನ ಮಾಡಿದ್ದರು. ಇದಕ್ಕೆ ಸಾಮಾಜಿಕ ಜಾಲತಾಣಗಳಲ್ಲಿ ಹಿಂದೂಪರ ಸಂಘಟನೆಗಳಿಂದ ಆಕ್ಷೇಪ ವ್ಯಕ್ತವಾಗಿದ್ದವು. ಆದರೆ, ಈ ಬಗ್ಗೆ ತಾಪ್ಸಿ ಅವರು ಯಾವುದೇ ಪ್ರತಿಕ್ರಿಯೆ ನೀಡಿಲ್ಲ.
ತಾಪ್ಸಿ ಪನ್ನು ಅವರು ಹಿಂದಿ, ತೆಲುಗು ತಮಿಳಿನಲ್ಲಿ ಒಟ್ಟಾರೆ 50ಕ್ಕೂ ಹೆಚ್ಚು ಸಿನಿಮಾಗಳಲ್ಲಿ ಅಭಿನಯಿಸಿದ್ದು, ಫೀಲ್ಮ್‌ಫೇರ್ ಪ್ರಶಸ್ತಿ ಪುರಸ್ಕೃತರಾಗಿದ್ದಾರೆ. ಶಾರುಖ್ ಜೊತೆಗಿನ ಅವರ ಮುಂದಿನ ಚಿತ್ರ ‘ಡುಂಕಿ’ ಇನ್ನಷ್ಟೇ ಬಿಡುಗಡೆಯಾಗಬೇಕಿದೆ.
