ಮುಂಬೈ: ಬಾಲಿವುಡ್‌ನ ಹಿಟ್‌ ಸಿನಿಮಾ ‘ಧೂಮ್‌’ ನಿರ್ದೇಶಕ ಸಂಜಯ್‌ ಗಧ್ವಿ (56) ಅವರು ಭಾನುವಾರ ಮುಂಬೈನ ತಮ್ಮ ನಿವಾಸದಲ್ಲಿ ನಿಧನರಾದರು. ಈ ಬಗ್ಗೆ ಸಂಜಯ್‌ ಅವರ ಪುತ್ರಿ ತಿಳಿಸಿದ್ದಾರೆ.
ಬಾಲಿವುಡ್‌ನಲ್ಲಿ 2004ರಲ್ಲಿ ಬಿಡುಗಡೆಯಾದ ಧೂಮ್‌ ಹಾಗೂ 2006ರಲ್ಲಿ ತೆರೆಕಂಡ ಧೂಮ್‌2 ಚಿತ್ರ ಸಖತ್‌ ಹಿಟ್‌ ಕಂಡಿತ್ತು. ಅಭಿಷೇಕ್‌ ಬಚ್ಚನ್‌, ಹೃತಿಕ್‌ ರೋಶನ್‌, ಜಾನ್‌ ಅಬ್ರಾಹಮ್‌ ಸೇರಿದಂತೆ ಹಲವು ತಾರೆಯರು ಈ ಚಿತ್ರದಲ್ಲಿ ಕಾಣಿಸಿಕೊಂಡಿದ್ದರು.
ಸಂಜಯ್‌ ಅವರು ಆರೋಗ್ಯವಾಗಿಯೇ ಇದ್ದರು, ಹೃದಾಯಾಘಾತದಿಂದ ಮೃತಪಟ್ಟಿರುವ ಸಾಧ್ಯತೆಗಳಿವೆ ಎಂದು ಪುತ್ರಿ ಹೇಳಿದ್ದಾರೆ.
ಸಂಜಯ್‌ ಅವರ ನಿಧನಕ್ಕೆ ಬಾಲಿವುಡ್‌ ಚಿತ್ರರಂಗ ಸಂತಾಪ ಸೂಚಿಸಿದೆ.
2000ರಲ್ಲಿ ‘ತೇರೆ ಲಿಯೆ’ ಚಿತ್ರವನ್ನು ನಿರ್ದೇಶಿಸುವ ಮೂಲಕ ನಿರ್ದೇಶಕನಾಗಿ ಚಿತ್ರರಂಗಕ್ಕೆ ಪದಾರ್ಪಣೆ ಮಾಡಿದ್ದರು.
