ಹೊಸ ಸಿನಿಮಾಕ್ಕೆ ದಳಪತಿ ವಿಜಯ್ ಸಂಭಾವನೆ ಕಡಿತ
ಕಾಲಿವುಡ್‌ನಲ್ಲಿ ನಟ ದಳಪತಿ ವಿಜಯ್ ಯಶಸ್ಸಿನ ಬೆನ್ನೇರಿ ಹೊರಟಿದ್ದಾರೆ. ಅವರು ನಟಿಸಿದ ಸಿನಿಮಾಗಳು ಬಾಕ್ಸ್ಆಫೀಸ್‌ನಲ್ಲಿ ಗೆಲುವಿನ ನಾಗಾಲೋಟ ಮುಂದುವರಿಸಿರುವುದೇ ಇದಕ್ಕೆ ನಿದರ್ಶನ. ‘ಮರ್ಸೆಲ್’, ‘ಬಿಗಿಲ್’ ಚಿತ್ರಗಳ ಗೆಲುವಿನ ಬಳಿಕ ಅವರ ಸಂಭಾವನೆಯ ಗ್ರಾಫ್ ಕೂಡ ಏರುಗತಿಯಲ್ಲಿರುವುದು ಗುಟ್ಟೇನಲ್ಲ.
ಅಂದಹಾಗೆ ಅವರು ಸಿನಿಮಾವೊಂದಕ್ಕೆ ಪಡೆಯುವ ಸಂಭಾವನೆ ಎಷ್ಟು ಎಂಬುದು ಅಭಿಮಾನಿಗಳ ಕುತೂಹಲದ ಪ್ರಶ್ನೆ. ಕಳೆದ ವರ್ಷ ತೆರೆಕಂಡ ‘ಬಿಗಿಲ್’ ಗಲ್ಲಾಪೆಟ್ಟಿಗೆಯಲ್ಲಿ ₹ 300 ಕೋಟಿಗೂ ಹೆಚ್ಚು ಗಳಿಕೆ ಕಂಡಿತ್ತು. ಹಾಗಾಗಿ, ಅವರು ಸಿನಿಮಾವೊಂದಕ್ಕೆ ₹ 70 ಕೋಟಿ ಸಂಭಾವನೆ ಪಡೆಯುತ್ತಾರೆ ಎಂಬುದು ಕಾಲಿವುಡ್‌ ಪಡಸಾಲೆಯಿಂದ ಕೇಳಿಬರುವ ಮಾತು.
ವಿಜಯ್ ನಟನೆಯ ‘ಮಾಸ್ಟರ್‌’ ಚಿತ್ರ ಬಿಡುಗಡೆಗೆ ಸಿದ್ಧವಾಗಿದೆ. ಲೋಕೇಶ್‌ ಕನಕರಾಜ್‌ ನಿರ್ದೇಶಿಸಿರುವ ಇದರಲ್ಲಿ ಅವರದು ಪ್ರಾಧ್ಯಾಪಕನ ಪಾತ್ರ. ಮಾಳವಿಕಾ ಮೋಹನನ್‌ ಇದರ ನಾಯಕಿ. ಒಟಿಟಿ ಮೂಲಕ ಈ ಸಿನಿಮಾವನ್ನು ಬಿಡುಗಡೆ ಮಾಡುವುದಿಲ್ಲ. ಚಿತ್ರಮಂದಿರದಲ್ಲಿಯೇ ಬಿಡುಗಡೆ ಮಾಡುತ್ತೇವೆ ಎಂದು ಈಗಾಗಲೇ ನಿರ್ಮಾಪಕರು ಸ್ಪಷ್ಟಪಡಿಸಿದ್ದಾರೆ.
‘ಮಾಸ್ಟರ್‌’ ಬಳಿಕ ವಿಜಯ್ ನಟನೆಯ 65ನೇ ಚಿತ್ರಕ್ಕೆ ಆ್ಯಕ್ಷನ್‌ ಕಟ್‌ ಹೇಳುತ್ತಿರುವುದು ಎ.ಆರ್‌. ಮುರುಗದಾಸ್‌. ‘ತುಪಾಕಿ’, ‘ಕಥಿ’ ಮತ್ತು ‘ಸರ್ಕಾರ್‌’ ಸಿನಿಮಾಗಳ ಬಳಿಕ ಮತ್ತೆ ಈ ಜೋಡಿ ನಾಲ್ಕನೇ ಬಾರಿಗೆ ಒಂದಾಗುತ್ತಿದೆ.
ಚಿತ್ರೋದ್ಯಮಕ್ಕೆ ಕೋವಿಡ್‌ –19 ಭಾರೀ ಪೆಟ್ಟು ನೀಡಿದೆ. ಹಾಗಾಗಿ, ಸಿನಿಮಾ ನಿರ್ಮಾಣ ಸಂಸ್ಥೆಗಳು, ನಿರ್ದೇಶಕರು, ನಟ, ನಟಿಯರು ಸಂಭಾವನೆಯ ಕಡಿತಕ್ಕೆ ಮುಂದಾಗಿದ್ದಾರೆ. ವಿಜಯ್ ಕೂಡ ಹೊಸ ಚಿತ್ರಕ್ಕೆ ₹ 20 ಕೋಟಿ ಸಂಭಾವನೆಯನ್ನು ಕಡಿತಗೊಳಿಸಿದ್ದಾರಂತೆ. ನಿರ್ಮಾಪಕರ ಮೇಲಿನ ಹೊರೆಯನ್ನು ಕಡಿಮೆ ಮಾಡಲು ಈ ನಿರ್ಧಾರ ತಳೆದಿದ್ದಾರೆ. ನಿರ್ದೇಶಕ ಮುರುಗದಾಸ್‌ ಕೂಡ ತಮಗೆ ನೀಡುವ ಸಂಭಾವನೆಯಲ್ಲಿ ಶೇಕಡ 30ರಷ್ಟನ್ನು ಕಡಿತಗೊಳಿಸಿದ್ದಾರೆ ಎನ್ನುತ್ತವೆ ಕಾಲಿವುಡ್‌ ಮೂಲಗಳು.
ತಾಜಾ ಸುದ್ದಿಗಾಗಿ ಪ್ರಜಾವಾಣಿ ಟೆಲಿಗ್ರಾಂ ಚಾನೆಲ್ ಸೇರಿಕೊಳ್ಳಿ | ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ನಮ್ಮ ಫೇಸ್‌ಬುಕ್ ಪುಟ ಫಾಲೋ ಮಾಡಿ.