‘ಕನ್ನಡಿಗ’ನ ಪಟ್ಟದರಸಿಯಾದ ಪಾವನಾ!

‘ಕನ್ನಡಿಗ’ದ ಕಥೆ ಮತ್ತು ನಿಮ್ಮ ಪಾತ್ರವೇನು?

ಕನ್ನಡದ ಮೊದಲ ಲಿಪಿಯ ಹಿಂದಿರುವ ಯಶೋಗಾಥೆ ಮತ್ತು ಕಿಟೆಲ್‌ ಡಿಕ್ಷನರಿಯ ಹಿನ್ನೆಲೆಯನ್ನು ತೆರೆದಿಡುವ ಕಥೆ ಇದು. ಇದರಲ್ಲಿ ಒಂದು ಕುಟುಂಬ ನಿರ್ವಹಿಸಿರುವ ಪಾತ್ರ ಮತ್ತು ಹೋರಾಟವನ್ನು ಚಿತ್ರ ಕೇಂದ್ರೀಕರಿಸಿದೆ. ಇದೊಂದು ಐತಿಹಾಸಿಕ ಕಥಾಹಂದರದ ಚಿತ್ರ. ಈ ಚಿತ್ರದಲ್ಲಿ ರವಿಚಂದ್ರನ್‌ ಅವರ ಪತ್ನಿಯ ಪಾತ್ರ ನಿರ್ವಹಿಸುತ್ತಿರುವೆ.

ಸ್ವಲ್ಪ ಹಳೆಗನ್ನಡಕ್ಕೆ ಹತ್ತಿರವಾದ ಡಿಕ್ಷನರಿ ಕನ್ನಡ ಭಾಷಾ ಬಳಕೆ ಸಂಭಾಷಣೆಯಲ್ಲಿದೆ. ಸಂಸ್ಕೃತವೂ ಇದೆ. ಸಂಭಾಷಣೆಯಲ್ಲಿ ಸಾಮಾನ್ಯ ಕನ್ನಡವಿರುವುದಿಲ್ಲ, ಕುಂದ್ರಾಪದ ಭಾಷೆಯಂತಿರಲಿದೆ. ‘ಜಟ್ಟಾ’ ಸಿನಿಮಾದಲ್ಲಿನ ಸಂಭಾಷಣೆಗೆ ತುಸು ಹೋಲಿಕೆ ಇರಲಿದೆ. ನನ್ನ ಪಾತ್ರ ತುಂಬಾ ಟ್ರೆಡಿಷನ್‌ ಆಗಿರುವಂತದ್ದು.

ಪಾತ್ರಕ್ಕೆ ನೀವು ಆಯ್ಕೆಯಾದ ಬಗ್ಗೆ ಹೇಳಿ...

ನಿರ್ದೇಶಕ ಬಿ.ಎಂ. ಗಿರಿರಾಜ್‌ ಅವರ ಜತೆಗೆ ಈ ಹಿಂದೆ ಎರಡು ಸಿನಿಮಾಗಳಲ್ಲಿ ನಟಿಸಿರುವೆ. ಈ ಚಿತ್ರಕ್ಕೆ ನಾಯಕಿಯ ಆಯ್ಕೆ ಮಾಡಲು ಪಾತ್ರ ಬಯಸುವ ಭಾಷೆಯನ್ನು ಬಳಸುವ ಮತ್ತು ಪಾತ್ರ ನಿಭಾಯಿಸುವ ಶಕ್ತಿ ಯಾರಲ್ಲಿದೆ ಎಂದು ನಿರ್ದೇಶಕರು ಹುಡುಕುತ್ತಿದ್ದರಂತೆ, ಆ ಶಕ್ತಿ ನನ್ನಲ್ಲಿ ಜಾಸ್ತಿಯೇ ಇದೆ ಎನಿಸಿ, ಈ ಪಾತ್ರವನ್ನು ಹೆಚ್ಚು ಜವಾಬ್ದಾರಿಯುತವಾಗಿ ನಿಭಾಯಿಸಬಲ್ಲೆ ಎನ್ನುವ ನಂಬಿಕೆಯಲ್ಲಿ ನನ್ನನ್ನು ಆಯ್ಕೆ ಮಾಡಿದ್ದಾರೆ. ಅದೂ ಕೊನೆ ಗಳಿಗೆಯಲ್ಲಿ ಅಂದರೆ ಚಿತ್ರದ ಮುಹೂರ್ತದ ಹಿಂದಿನ ದಿನ ನನ್ನ ಆಯ್ಕೆ ಅಂತಿಮವಾಗಿದೆ.

ಈ ಪಾತ್ರಕ್ಕಾಗಿ ತಯಾರಿ ಹೇಗಿದೆ?

ಈ ಪಾತ್ರಕ್ಕೆ ಎಷ್ಟು ತಯಾರಿ ಮಾಡಿದರೂ ಸಾಲದು. ನನಗೆ ಸ್ಕ್ರಿಪ್ಟ್‌ ಸಿಕ್ಕಿರುವುದೇ ಎರಡು ದಿನಗಳ ಹಿಂದೆ. ಸ್ಕ್ರಿಪ್ಟ್ ಅನ್ನು ರಾತ್ರಿ– ಹಗಲು ಓದಿ, ಒಂದಿಷ್ಟು ರಿಹರ್ಸಲ್‌ ನಡೆಸಿರುವೆ. ಈಗಾಗಲೇ ಶೂಟಿಂಗ್‌ ಶುರುವಾಗಿದೆ. ನನಗೆ ತುಂಬಾ ಕಡಿಮೆ ಕಾಲಾವಧಿ ಇದೆ. ನನ್ನ ಪಾತ್ರದ ಶೂಟಿಂಗ್‌ ಅ.29ರಿಂದಲೇ ಚಿಕ್ಕಮಗಳೂರಿನ ತಾಣಗಳಲ್ಲಿ ಆರಂಭವಾಗಿದೆ. 20 ದಿನಗಳ ಶೂಟಿಂಗ್‌ ಮುಗಿಸಿ, ನಂತರ ಸಾಗರದಲ್ಲಿ ಚಿತ್ರೀಕರಣ ನಡೆಯಲಿದೆ.

ನಟಿಸಿರುವ ಚಿತ್ರಗಳು ಯಾವ ಹಂತದಲ್ಲಿವೆ?

ನನ್ನ ನಟನೆಯ ‘ರುದ್ರಿ’, ‘ಮೈಸೂರ್‌ ಡೈರೀಸ್‌’, ‘ಕಲಿವೀರ’ ಹಾಗೂ ‘ತೂತು ಮಡಿಕೆ’ ಈ ನಾಲ್ಕು ಚಿತ್ರಗಳು ಬಿಡುಗಡೆಯ ಹೊಸ್ತಿಲಿನಲ್ಲಿವೆ. ಇನ್ನು ‘ಮೆಹಬೂಬಾ’ ಮತ್ತು ‘ಫೈಟ್‌’ ಚಿತ್ರಗಳ ಹಾಡುಗಳು ಮಾತ್ರ ಚಿತ್ರೀಕರಣಕ್ಕೆ ಬಾಕಿ ಇವೆ. ಇವೆಲ್ಲವೂ ಲಾಕ್‌ಡೌನ್‌ಗೂ ಮೊದಲೇ ಮಾಡಿರುವಂತಹ ಚಿತ್ರಗಳು.

ಮುಂದಿನ ಯೋಜನೆಗಳು?

ಲಾಕ್‌ಡೌನ್‌ ನಂತರ ನನ್ನ ಪಾಲಿಗೆ ಮೊದಲ ಚಿತ್ರ ‘ಕನ್ನಡಿಗ’. ಇದಲ್ಲದೇ ಇನ್ನೆರಡು ಚಿತ್ರಗಳಿಗೆ ಸಹಿ ಮಾಡಿದ್ದೇನೆ. ಆ ಚಿತ್ರಗಳಿಗೆ ಇನ್ನೂ ಶೀರ್ಷಿಕೆ ಅಂತಿಮವಾಗಿಲ್ಲ. ಇದರಲ್ಲಿ ಒಂದು ಚಿತ್ರವಂತೂ ದೊಡ್ಡ ಬ್ಯಾನರ್‌ನಡಿ ತಯಾರಾಗುತ್ತಿರುವ ಥ್ರಿಲ್ಲರ್‌ ಕ್ರೈಂ ಕಥಾಹಂದರದ ಚಿತ್ರ ಎಂದು ಮಾತಿಗೆ ಅಲ್ಪವಿರಾಮ ಹಾಕಿದರು.