ವಿನಯ್ ರಾಜ್‌ಕುಮಾರ್‌ ಮುಖ್ಯಭೂಮಿಕೆಯಲ್ಲಿ ಇರುವ ಈ ಚಿತ್ರದ ಹಾಡನ್ನು ಗೋಲ್ಡನ್ ಸ್ಟಾರ್ ಗಣೇಶ್ ಬಿಡುಗಡೆ ಮಾಡಿದ್ದು ವಿಶೇಷವಾಗಿತ್ತು. ‘ಇವರು ‘ಸಿಂಪಲ್‌’ ಸುನಿ ಅಲ್ಲ. ಕಾಂಪ್ಲಿಕೇಟೆಡ್‌(ಕ್ಲಿಷ್ಟಕರ) ಸುನಿ’ ಎಂದು ಕಾಲೆಳೆದ ಗಣೇಶ್, ‘ಕಥೆ ಮಾಡುವ ವಿಚಾರದಲ್ಲಿ ಇವರ ಬರವಣಿಗೆಯೇ ಭಿನ್ನ. ಸುನಿ ಜೊತೆ ನನ್ನ ಪಯಣ ಬಹಳ ವರ್ಷದ್ದು. ‘ಚಮಕ್’ ಸಿನಿಮಾ ಆದಮೇಲೆ ಹಲವು ಬಾರಿ ಜೊತೆಯಾಗಿ ಕುಳಿತು ಕಥೆಗಳನ್ನು ಚರ್ಚಿಸಿದ್ದೇವೆ. ಒಂದೊಂದು ಬಾರಿಯೂ ಒಂದೊಂದು ಐಡಿಯಾ ತರುತ್ತಾರೆ. ಅದೇ ರೀತಿ ‘ಒಂದು ಸರಳ’ ಪ್ರೇಮಕಥೆ’ಯೂ ವಿಭಿನ್ನವಾಗಿ ಇರುತ್ತದೆ ಅಂದುಕೊಂಡಿದ್ದೇನೆ. ಸುನಿಯ ಡೈಲಾಗ್ಸ್‌, ಬರವಣಿಗೆ ಶೈಲಿಗೆ ನಾನು ದೊಡ್ಡ ಅಭಿಮಾನಿ. ನಮ್ಮ ಭಾಷೆ, ವ್ಯಾಕರಣದ ಮೇಲೆ ಹಿಡಿತ ಇರುವ ನಿರ್ದೇಶಕರಲ್ಲಿ ಒಬ್ಬರು ಸುನಿ’ ಎಂದರು ಗಣೇಶ್.
