ಬುದ್ಧನ ಶಿಲ್ಪದ ಮುಂದೆ ಶಿಲ್ಪಾ ಯೋಗ!
ಅಕ್ಷರ ಗಾತ್ರ :ಆ |ಆ |ಆ
40 ಪ್ಲಸ್‌ ನಂತರವೂ ಬಳಕುವ ಬಳ್ಳಿಯಂತೆ ದೇಹಸಿರಿಯನ್ನು ಕಾಪಾಡಿಕೊಂಡಿರುವ ಬಾಲಿವುಡ್‌ ನಟಿ ಶಿಲ್ಪಾ ಶೆಟ್ಟಿ ಈ ಬಾರಿ ಅಪ್ಪಂದಿರ ದಿನ ಮತ್ತು ಅಂತರರಾಷ್ಟ್ರೀಯ ಯೋಗ ದಿನವನ್ನು ಒಟ್ಟಾಗಿ ಆಚರಿಸಿದ್ದಾರೆ. ಫಿಟ್ನೆಸ್‌ ಮೂಲಕ ಎಲ್ಲರ ಗಮನ ಸೆಳೆದಿರುವ ಕರಾವಳಿ ಬೆಡಗಿ ತಮ್ಮ ಕುಟುಂಬದ ಜತೆ ಯೋಗ ಮಾಡುವ ವಿಡಿಯೊ ಮತ್ತು ಫೋಟೊಗಳನ್ನು ಇನ್‌ಸ್ಟಾಗ್ರಾಂನಲ್ಲಿ ಹಂಚಿಕೊಂಡಿದ್ದಾರೆ.
ಮನೆಯ ಗಾರ್ಡನ್‌ನಲ್ಲಿರುವ ಬುದ್ಧನ ಶಿಲ್ಪದ ಪ್ರತಿಮೆಯ ಮುಂದೆ ಪತಿ ರಾಜ್‌ ಕುಂದ್ರಾ ಮತ್ತು ಮಗ ವಿಯಾನ್‌ ಜತೆ ಧ್ಯಾನಸ್ಥ ಸ್ಥಿತಿಯಲ್ಲಿರುವ ಶಿಲ್ಪಾ ಅವರ ಯೋಗ, ಧ್ಯಾನ ಗಮನ ಸೆಳೆಯುತ್ತವೆ. ಇದೇ ಸಮಯದಲ್ಲಿ ಮಗ ವಿಯಾನ್‌ ಮತ್ತು ಮಗಳು ಸಮಿಶಾ ಪರವಾಗಿ ರಾಜ್‌ ಕುಂದ್ರಾ ಅವರಿಗೆ ಅಪ್ಪಂದಿರ ದಿನದ ಶುಭಾಶಯ ತಿಳಿಸಿದ್ದಾರೆ.
‘ಇಂದು ವಿಶೇಷ ದಿನ. ಅಂತರರಾಷ್ಟ್ರೀಯ ಯೋಗ ದಿನ ಮತ್ತು ಅಪ್ಪಂದಿರ ದಿನ ಒಟ್ಟಿಗೆ ಬಂದಿವೆ. ಒಟ್ಟಿಗೆ ಪ್ರಾರ್ಥಿಸುವ, ಒಟ್ಟಾಗಿ ಕುಳಿತು ಊಟ ಮಾಡುವ ಮತ್ತು ಯೋಗ ಮಾಡುವ ಕುಟುಂಬ ಒಟ್ಟಾಗಿ ಇರುತ್ತದೆ. ‘ಕುಟುಂಬ ಸದಸ್ಯರ ಜತೆ ಯೋಗ’ ಕಾರ್ಯಕ್ರಮದಿಂದ ಅಪ್ಪ ಮತ್ತು ಮಕ್ಕಳು ಹೆಚ್ಚಿನ ಸಮಯವನ್ನು ಒಟ್ಟಿಗೆ ಕಳೆಯುವಂತಾಗಿದೆ’ ಎಂದು ಸಂತೋಷ ಹಂಚಿಕೊಂಡಿದ್ದಾರೆ.
‘ಎಲ್ಲ ಅಪ್ಪಂದಿರೂ ನಿಜವಾದ ಹೀರೊಗಳು. ನನ್ನ ಮಕ್ಕಳಿಗೆ ರಾಜ್‌ ಕುಂದ್ರಾ ಅವರಂತಹ ಒಳ್ಳೆಯ ಅಪ್ಪ ಸಿಕ್ಕಿದ್ದಾರೆ’ ಎಂದು ಅಡಿಬರಹ ಬರೆದ ಫೋಟೊ ಹಂಚಿಕೊಂಡಿದ್ದಾರೆ. ಯೋಗ ಮಾಡುವಾಗ ಮತ್ತು ನಂತರ ಪಠಿಸಿದ ಓಂ ಮತ್ತು ಶಾಂತಿ ಮಂತ್ರಗಳ ಮಹತ್ವವನ್ನು ಶಿಲ್ಪಾ ಶೆಟ್ಟಿ ವಿವರಿಸಿದ್ದಾರೆ.
ಪ್ರಜಾವಾಣಿ ಫೇಸ್‌ಬುಕ್ ಪುಟವನ್ನು ಲೈಕ್ ಮಾಡಿ, ಪ್ರಮುಖ ಸುದ್ದಿಗಳ ಅಪ್‌ಡೇಟ್ಸ್ ಪಡೆಯಿರಿ.
ಪ್ರಜಾವಾಣಿಯನ್ನು ಟ್ವಿಟರ್‌ನಲ್ಲಿ ಇಲ್ಲಿ ಫಾಲೋ ಮಾಡಿ.
ಟೆಲಿಗ್ರಾಂ ಮೂಲಕ ನಮ್ಮ ಸುದ್ದಿಗಳ ಅಪ್‌ಡೇಟ್ಸ್ ಪಡೆಯಲು ಇಲ್ಲಿ ಕ್ಲಿಕ್ ಮಾಡಿ.
