ಜೋಯಾ ಹುಡುಕಿ ತೆಗೆದ ಕೊಳೆಗೇರಿ ಹುಡುಗ
‘ಗಲ್ಲಿ ಬಾಯ್’ ಸಿನಿಮಾ ಈಗ ಆಸ್ಕರ್‌ಗೆ ಭಾರತದಿಂದ ಸ್ಪರ್ಧಿಸಲು ಆಯ್ಕೆಯಾಗಿದೆ. ಆಸ್ಕರ್‌ ಕುರಿತು ಅತಿಶಯ ಎನ್ನುವಂಥ ಅಭಿಪ್ರಾಯಗಳಿದ್ದರೂ, ಸದ್ಯದ ರಾಜಕೀಯಪ್ರೇರಿತ ಧ್ವನಿಗೆ ಭಿನ್ನವಾದ ಅಭಿವ್ಯಕ್ತಿ ಇಂಥ ಸ್ಪರ್ಧೆಗೆ ಆಯ್ಕೆಯಾಗಿರುವುದು ಅನೇಕರಿಗೆ ಸೋಜಿಗ ಮೂಡಿಸಿದೆ.
ಮುಂಬೈನ ಕೊಳೆಗೇರಿಗಳ ನಡುವಿನ ಪ್ರತಿಭಾವಂತನೊಬ್ಬ ದೊಡ್ಡ ‘ರ‍್ಯಾಪ್’ ಗಾಯಕನಾಗಿ ಹೊಮ್ಮುವ ಭಾವಪೂರಿತ ಕಥನದ ಸಿನಿಮಾ ಇದು. ಇದರಲ್ಲಿ ‘ಆಜಾದಿ’ ಎಂಬ ಹಾಡೊಂದು ಇದೆ. ಅದು ಈಗ ರಾಜಕಾರಣಿಯೂ ಆಗಿರುವ ಕನ್ಹಯ್ಯ ಕುಮಾರ್ ಅವರ ಹೋರಾಟಗೀತೆಯದ್ದೇ ಗುಂಗಿನಿಂದ ಕಡಪಡದದ್ದು. ಸಿನಿಮಾದಲ್ಲೂ ಆ ಹಾಡನ್ನು ನೋಡಿ, ಕೇಳಿದವರಿಂದ ಮೆಚ್ಚುಗೆ ವ್ಯಕ್ತವಾಗಿತ್ತು.
ಬರ್ಲಿನ್‌ನ ಅತಿ ದೊಡ್ಡ ತೆರೆಯ ಮೇಲೆ ‘ಗಲ್ಲಿ ಬಾಯ್’ ಪ್ರದರ್ಶನಗೊಂಡಿತ್ತು. ಬಗೆ ಬಗೆಯ ಸಂಸ್ಕೃತಿಗಳ 1,800 ಜನ ಅದನ್ನು ನೋಡಿದ್ದರು. ಭಾಷೆ ಅವರಲ್ಲಿ ಅನೇಕರಿಗೆ ಅಪರಿಚಿತ. ಆದರೆ, ದೃಶ್ಯಭಾಷೆ ಎಲ್ಲರನ್ನೂ ಹಿಡಿದಿಟ್ಟಿತ್ತು. ಪ್ರದರ್ಶನದ ನಂತರ ಕೆಲವರು ತಮ್ಮ ಬದುಕಿನಲ್ಲೂ ಅಂತಹದೇ ಕಥೆಗಳಿವೆ ಎಂದು ಹೇಳಿಕೊಂಡದ್ದು ಆ ಪ್ರದರ್ಶನದ ವಿಶೇಷ.
ಕೊಳೆಗೇರಿಯ ಹೊಸಕಾಲದ ಕವಿಗಳನ್ನು (ಶಿಷ್ಟರು ಹೇಳುವಂತೆ ಅವರು ಬರೆಯುವುದೆಲ್ಲ ಗಪದ್ಯ) ಹಾಗೂ ಶಿಷ್ಟ ಕವಿಯೂ ಆದ ತಮ್ಮ ತಂದೆ ಜಾವೆದ್‌ ಅಖ್ತರ್ ಅವರನ್ನು ಒಂದೇ ಕೋಣೆಯಲ್ಲಿ ಕುಳ್ಳಿರಿಸಿ, ಸಾಲುಗಳನ್ನು ಬರೆಸಿದವರು ಜೋಯಾ. ಅದಕ್ಕೆ ಈಗ ಆಸ್ಕರ್‌ ಮನೆಯ ಪ್ರವೇಶ ಭಾಗ್ಯ ಸಿಕ್ಕಿದೆಯಷ್ಟೆ.
ಜೋಯಾ ಅಖ್ತರ್ ಹೋಂವರ್ಕ್ ಮಾಡುವ ಜಾಯಮಾನದ ನಿರ್ದೇಶಕಿ. ನ್ಯೂಯಾರ್ಕ್ ಯೂನಿವರ್ಸಿಟಿ ಫಿಲ್ಮ್‌ನಲ್ಲಿ ಚಲನಚಿತ್ರ ತಯಾರಿಕೆಯ ಸೂಕ್ಷ್ಮಗಳನ್ನು ಕಲಿತವರು ಅವರು. ಮೀರಾ ನಾಯರ್, ಟೋನಿ ಗರ್ಬರ್, ದೇವ್ ಬೆನೆಗಲ್ ತರಹದ ಭಿನ್ನ ಸಂವೇದನೆಗಳ ನಿರ್ದೇಶಕರಿಗೆ ಸಹಾಯಕಿಯಾಗಿ ಕೆಲಸ ಮಾಡಿದವರು. ಸೃಜನಶೀಲತೆ ಅವರಿಗೆ ಆನುವಂಶಿಕ ಕೊಡುಗೆ.
ಅಪ್ಪ ಜಾವೇದ್ ಅಖ್ತರ್ ಕವಿಯಾಗಿ ಹಲವು ಜನಪ್ರಿಯ ಚಿತ್ರಗೀತೆಗಳನ್ನು ಬರೆದವರು. ಅಮ್ಮ ಹನಿ ಇರಾನಿ ಚಿತ್ರಕಥಾ ಕೌಶಲಗಳಿಗೆ ಹಲವು ಉದಾಹರಣೆಗಳಿವೆ. ಮನೆಯ ದೊಡ್ಡ ಮಗಳು ಜೋಯಾ. ಸಹೋದರ ಫರ್ಹಾನ್ ‘ದಿಲ್ ಚಾಹ್ತಾ ಹೈ’ ಸಿನಿಮಾ ಮಾಡಲು ಮುಂದಾದಾಗ ಅವರಿಗೂ ತಮ್ಮ ಸೂಕ್ಷ್ಮತೆಯನ್ನು ಹಂಚಿದ್ದವರು.
‘ಲಕ್ ಬೈ ಚಾನ್ಸ್’ ಹಿಂದಿ ಸಿನಿಮಾ ಮೂಲಕ ಜೋಯಾ ಚಿತ್ರ ನಿರ್ದೇಶನಕ್ಕೆ ಕಾಲಿಟ್ಟದ್ದು.
2015ರಲ್ಲಿ 'ದಿಲ್ ಧಡಕ್ನೆ ದೋ' ಹಿಂದಿ ಸಿನಿಮಾಗೆ ಸಂಕಲನ ಕಾರ್ಯ ನಡೆಯುತ್ತಿತ್ತು. ಆಗ ‘ಆಫತ್’ ಎಂಬ ದೇಸಿ ಹಾಡು ಜೋಯಾ ಕಿವಿಮೇಲೆ ಬಿತ್ತು. ಸಂಕಲನಕಾರ ಆನಂದ್ ಸುಬ್ಬಯ ಸಂಗೀತಗಾರರೂ ಹೌದು. ಅವರೇ ಆ ಹಾಡನ್ನು ಕೇಳಿಸಿದ್ದು. ಚಿಕ್ಕಂದಿನಿಂದ ವಿದೇಶಿ ರ‍್ಯಾಪ್ ಹಾಡುಗಳ ಕೇಳಿ ಬೆಳೆದಿದ್ದ ಜೋಯಾ ಅವರಿಗೆ ಅದರಲ್ಲಿ ಹೊಸತೇ ಧ್ವನಿ, ಕಾವ್ಯ ಇದೆ ಎನ್ನಿಸಿತು. ಆ ಹಾಡು ಕಟ್ಟಿದ್ದ ದೇಸಿ ರ‍್ಯಾಪರ್ ನೇಜಿ ಯಾರೆಂಬ ಪ್ರಶ್ನೆ ಹುಟ್ಟಿದ್ದೇ ಆಗ. ನೇಜಿ ಅವರನ್ನು ಭೇಟಿ ಮಾಡಿದರು. ಅವರ ಬದುಕಿನ ಹಿನ್ನೆಲೆ, ಹಾಡು ಹುಟ್ಟಿದ ಸಮಯವನ್ನು ಕೇಳಿ ತಿಳಿದುಕೊಂಡರು. ಆಗಲೇ ಅಂಥದೊಂದು ಕಥೆಯ ಸಿನಿಮಾ ಮಾಡಬೇಕೆಂಬ ಬಯಕೆ ಮೊಳೆತದ್ದು.
ರ‍್ಯಾಪರ್‌ಗಳ ಕುರಿತು ಬಂದಿದ್ದ ಹಲವು ಸಿನಿಮಾಗಳನ್ನು ನೋಡಿ, ಒಂದು ಸುತ್ತಿನ ಹೋಂವರ್ಕ್ ಮಾಡಿಕೊಂಡರು. ಮುಂಬೈ ಕೊಳೆಗೇರಿಯ ಹೊಸಕಾಲದ ಹುಡುಗರ ಹಿಪ್-ಹಾಪ್ ಸಂಸ್ಕೃತಿ ಸಮಕಾಲೀನ ವಸ್ತು ಎನಿಸಿತು. ಅದನ್ನೇ ಚಿತ್ರಕಥೆಗೆ ಒಗ್ಗಿಸಿದರು. ಈ ಪ್ರಕ್ರಿಯೆಯಲ್ಲಿ ಅವರಿಗೆ ಜೊತೆಯಾದವರು ಇನ್ನೊಬ್ಬ ನಿರ್ದೇಶಕಿ ರೀಮಾ ಕಾಗ್ಟಿ.
ಐದು ವರ್ಷಗಳ ಶ್ರಮವೊಂದು ಹೇಗೆ ಗಟ್ಟಿ ಸಿನಿಮಾ ಆಗುತ್ತದೆ ಎನ್ನುವುದಕ್ಕೆ ಜೋಯಾ ಅವರ ಹೋಂವರ್ಕೇ ಸಾಕ್ಷಿ. ಅದಕ್ಕೀಗ ಆಸ್ಕರ್‌ ಪ್ರವೇಶದ ಗರಿ.
ತಾಜಾ ಸುದ್ದಿಗಾಗಿ ಪ್ರಜಾವಾಣಿ ಟೆಲಿಗ್ರಾಂ ಚಾನೆಲ್ ಸೇರಿಕೊಳ್ಳಿ | ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ನಮ್ಮ ಫೇಸ್‌ಬುಕ್ ಪುಟ ಫಾಲೋ ಮಾಡಿ.