ರೋಗ ಲಕ್ಷಣಗಳ ಆಧಾರದಲ್ಲಿ ಎಚ್‌ಎಂಪಿವಿ ಸೋಂಕು ತಗುಲಿರುವುದನ್ನು ಪತ್ತೆ ಹಚ್ಚುವುದು ಸವಾಲಿನ ಕೆಲಸ. ಆರ್‌ಟಿ–ಪಿಸಿಆರ್‌ ಪರೀಕ್ಷೆಯ ಮೂಲಕ ಇದನ್ನು ಪತ್ತೆ ಹಚ್ಚಬಹುದು. ಉಳಿದ ಪರೀಕ್ಷೆಗಳಿಗೆ ಹೋಲಿಸಿದರೆ ಇದು ಕೊಂಚ ದುಬಾರಿ. ಆ್ಯಂಟಿಜೆನ್‌ (ಪ್ರತಿಜನಕ) ಪತ್ತೆ ಪರೀಕ್ಷೆಯ ಮೂಲಕ ಕ್ಷಿಪ್ರವಾಗಿ ಸೋಂಕು ಪತ್ತೆ ಸಾಧ್ಯ.

ಸೌಮ್ಯ ರೂಪದ ಸೋಂಕು ತಗುಲಿದವರು ಎರಡು ಮೂರು ದಿನಗಳಿಂದ ಒಂದು ವಾರದ ಒಳಗಾಗಿ ಗುಣಮುಖರಾಗಬಹುದು. ಗಂಭೀರ ಪ್ರಕರಣಗಳಲ್ಲಿ ರೋಗಿಗಳು ಗುಣಮುಖರಾಗಲು ಹೆಚ್ಚು ಸಮಯ ಬೇಕಾಗಬಹುದು. ಹಾಗಿದ್ದರೂ ಕೆಮ್ಮಿನಂತಹ ಸಮಸ್ಯೆ ಪೂರ್ಣವಾಗಿ ಗುಣವಾಗಲು ದೀರ್ಘ ಸಮಯ ಬೇಕಾಗಬಹುದು.

ಕೋವಿಡ್–19ರಂತಹ ಸಾಂಕ್ರಾಮಿಕ ಉಂಟಾಗುವುದು ಅಪರೂಪ. ನಿರ್ದಿಷ್ಟ ಸಂದರ್ಭಗಳಲ್ಲಿ ಮಾತ್ರ ಸಾಂಕ್ರಾಮಿಕಗಳು ಕಾಣಿಸಿಕೊಳ್ಳುತ್ತವೆ; ವೈರಾಣುಗಳು ತೀವ್ರಗತಿಯಲ್ಲಿ ದ್ವಿಗುಣಗೊಳ್ಳುವುದು, ಅತ್ಯಂತ ಕ್ಷಿಪ್ರವಾಗಿ ಮನುಷ್ಯರಿಂದ ಮನುಷ್ಯರಿಗೆ ಹರಡುವುದು, ಪ್ರದೇಶದಿಂದ ಪ್ರದೇಶಕ್ಕೆ ಹರಡುವಷ್ಟು ಸೋಂಕು ಪ್ರಬಲವಾಗಿರುವುದು ಇವೇ ಮುಂತಾದ ಕಾರಣಗಳು ಇರುತ್ತವೆ. ಆದರೆ, ಸದ್ಯ ಕಂಡುಬಂದಿರುವ ಎಚ್‌ಎಂಪಿವಿ ಇಂಥ ಲಕ್ಷಣಗಳನ್ನು ಹೊಂದಿಲ್ಲ. ಹಾಗಾಗಿ ಇದರಿಂದ ಸಾಂಕ್ರಾಮಿಕ ಉಂಟಾಗುವ ಸಾಧ್ಯತೆ ಇಲ್ಲ ಎನ್ನುವುದು ತಜ್ಞರ ಅಭಿಪ್ರಾಯ.