ಬರಿಗಾಲು ವ್ಯಾಯಾಮ ಎಷ್ಟು ಪ್ರಯೋಜನ?

ಹೌದು, ಮನೆಯಿಂದ ಆಚೆ ಹೋಗಿ ಜಿಮ್‌ನಲ್ಲೋ ಅಥವಾ ಪಾರ್ಕ್‌ನಲ್ಲಿ ಸಾರ್ವಜನಿಕ ಜಿಮ್‌ ಸವಲತ್ತಿರುವ ಕಡೆಯೋ ವ್ಯಾಯಾಮ ಮಾಡುವ ಕುರಿತು ಭಯ ಇದೆ ಎಂದಾದರೆ ಶೂ ಧರಿಸುವುದು ಯಾಕೆ ಅಲ್ಲವೇ? ಮನೆಯಲ್ಲೇ ಬರಿಗಾಲಲ್ಲಿ ವ್ಯಾಯಾಮ ಮಾಡಿದರೆ ಬೇರೆ ಏನಾದರೂ ಪ್ರಯೋಜನಗಳಿವೆಯೇ?

‘ಹೌದು’ ಎನ್ನುತ್ತಾರೆ ಟೈನಿ ಫಿಟ್‌ನೆಸ್‌ನ ತರಬೇತುದಾರ ರೂಪೇಶ್‌ ಯಾದವ್‌. ಬರಿಗಾಲಲ್ಲಿ ವ್ಯಾಯಾಮ ಮಾಡಿದರೆ ಪಾದಗಳಿಗೆ ಹೆಚ್ಚು ಪ್ರಯೋಜನವಾಗುತ್ತದೆ. ಮಣ್ಣು, ಮರಳು, ಹುಲ್ಲು ಅಥವಾ ಕುಶನ್‌ ಇರುವ ಯೋಗಾ ಮ್ಯಾಟ್‌ ಮೇಲೆ ವ್ಯಾಯಾಮ ಮಾಡುವುದರಿಂದ ಪಾದದ ಸ್ನಾಯುಗಳು ಬಲಗೊಳ್ಳುತ್ತವೆ. ಕಣಕಾಲಿನ ಸಂಧಿ ಹೆಚ್ಚು ಗಟ್ಟಿಮುಟ್ಟಾಗುತ್ತದೆ. ಅದನ್ನು ತಿರುಗಿಸುವಾಗ ಯಾವುದೇ ನೋವಿನ ಅನುಭವ ನಿಮಗಾಗುವುದಿಲ್ಲ ಎಂಬುದು ಅವರ ಅಭಿಮತ. ಆದರೆ ಲಘು ವ್ಯಾಯಾಮವನ್ನು ಮಾತ್ರ ಬರಿಗಾಲಲ್ಲಿ ಮಾಡಬಹುದು.

ಶೂ ಧರಿಸುವುದರಿಂದ ಆಗುವ ಪ್ರಯೋಜನವೆಂದರೆ ನಮ್ಮ ಪಾದಗಳಿಗೆ ಚೂಪಾದ ವಸ್ತುಗಳು ಚುಚ್ಚುವುದರಿಂದ ರಕ್ಷಣೆ ಪಡೆಯಬಹುದು. ಹಾಗೆಯೇ ಹೆಚ್ಚು ಬಾರಿ ಜಿಗಿಯುವಂತಹ ಕಠಿಣ ವ್ಯಾಯಾಮಕ್ಕೂ ಮೆತ್ತನೆಯ ಕುಷನ್‌ ಇರುವ ಶೂ ಅಥವಾ ಸ್ನೀಕರ್‌ ಧರಿಸುವುದು ಒಳ್ಳೆಯದು.