ಗುರುವಾರ , ಅಕ್ಟೋಬರ್ 29, 2020
21 °C

ಎರಡು ತಿಂಗಳಲ್ಲಿ 2ನೇ ಬಾರಿಗೆ ಸೋಂಕುಗೊಂಡ ವ್ಯಕ್ತಿಯಲ್ಲಿ ಕೊರೊನಾದ ವಿಭಿನ್ನ ತಳಿ

ಏಜೆನ್ಸೀಸ್‌ Updated:

ಅಕ್ಷರ ಗಾತ್ರ : | |

ವಾಷಿಂಗ್ಟನ್‌: ಪಶ್ಚಿಮ ಅಮೆರಿಕದ ನೆವಾಡ ಎಂಬಲ್ಲಿನ 25 ವರ್ಷದ ಯುವಕನಲ್ಲಿ ಎರಡನೇ ಬಾರಿಗೆ ಕಾಣಿಸಿಕೊಂಡಿದ್ದ ಕೊರೊನಾ ವೈರಸ್‌ ಸೋಂಕು ಹಲವು ಮಹತ್ವದ ಅಂಶಗಳ ಮೇಲೆ ಬೆಳಕು ಚೆಲ್ಲಲು ಕಾರಣವಾಗಿದೆ.

ಈ ವಿಷಯವನ್ನು ‘ಲ್ಯಾನ್ಸೆಟ್‌’ ಎಂಬ ವೈದ್ಯಕೀಯ ನಿಯತಕಾಲಿಕೆಯಲ್ಲಿ ಪ್ರಕಟಿಸಲಾಗಿದೆ. ಏಪ್ರಿಲ್‌ ತಿಂಗಳಲ್ಲಿ ಮೊದಲ ಬಾರಿಗೆ ಕೊರೊನಾ ವೈರಸ್‌ನ ಸೋಂಕಿಗೆ ಒಳಗಾಗಿ ಚಿಕಿತ್ಸೆ ಪಡೆದು ಗುಣಮುಖನಾಗಿದ್ದ ಯುವಕ, ಮೇ ತಿಂಗಳಲ್ಲಿ ಮತ್ತೊಮ್ಮೆ ಸೋಂಕಿಗೀಡಾಗಿದ್ದ ಎಂದು ನಿಯತಕಾಲಿಕೆಯಲ್ಲಿ ಉಲ್ಲೇಖಿಸಲಾಗಿದೆ.

ಎರಡನೇ ಬಾರಿಗೆ ಯುವಕನ ಆರೋಗ್ಯ ಸ್ಥಿತಿ ತೀವ್ರವಾಗಿ ಹದಗೆಟ್ಟು ಆತ ಆಸ್ಪತ್ರೆಯಲ್ಲಿ ಉಸಿರಾಟದ ವ್ಯವಸ್ಥೆಯೊಂದಿಗೆ ಚಿಕಿತ್ಸೆ ಪಡೆಯಬೇಕಾಯಿತು. ಈ ಪ್ರಕರಣದ ಆಳ ಸಂಶೋಧನೆ ನಡೆಸಿರುವ ತಜ್ಞರಿಗೆ, ಯುವಕ ಕೊರೊನಾ ವೈರಸ್‌ನ ಮೊತ್ತೊಂದು ತಳಿಯ ಸೋಂಕಿಗೆ ಒಳಗಾಗಿದ್ದ ಎಂಬುದು ಗೊತ್ತಾಗಿದೆ.

ಅದರೆ, ಎರಡನೇ ಬಾರಿಗೆ ಸೋಂಕುಗೊಂಡಾಗ ಯುವಕನ ಪರಿಸ್ಥಿತಿ ಏಕೆ ಚಿಂತಾಜನಕವಾಯಿತು ಎಂಬುದರ ಬಗ್ಗೆ ಸಂಶೋಧಕರಲ್ಲೂ ನಿಖರ ಮಾಹಿತಿ ಇಲ್ಲ. ‘ಬೇರೆಯ ತಳಿಯ ಕೊರೊನಾ ವೈರಸ್‌ ಹೆಚ್ಚಿನ ಪ್ರಮಾಣದಲ್ಲಿ ದೇಹ ಹೊಕ್ಕಿರುವ ಪರಿಣಾಮ ಇದಾಗಿರಬಹುದು. ಅದರ ಶಕ್ತಿ ಗಮನಾರ್ಹವಾಗಿ ಹೆಚ್ಚಾಗಿರಬಹುದು. ಅಲ್ಲದೆ, ಮೊದಲ ಸೋಂಕಿನಿಂದ ದೇಹದಲ್ಲಿ ಉಂಟಾದ ಪ್ರತಿರೋಧ ಶಕ್ತಿಯು ಹೊಸ ತಳಿಯ ವೈರಸ್‌ ಅನ್ನು ತಡೆಯುವಲ್ಲಿ ವಿಫಲವಾಗಿರಬಹುದು,’ ಎಂದು ಸಂಶೋಧಕರು ಹೇಳಿದ್ದಾರೆ.

ಭವಿಷ್ಯದಲ್ಲಿ ಆಗಬಹುದಾದ ಸೋಂಕುಗಳಿಂದ ತಪ್ಪಿಸಿಕೊಳ್ಳಲು ನಮಗೆ ಸಾರ್ಸ್‌ ಕೊರೊನಾ ವೈರಸ್‌–2 (SARS-CoV-2 )ನಿಂದ ಸಹಾಯವಾಗದು ಎಂದು ನಮ್ಮ ಅಧ್ಯಯನದಿಂದ ಗೊತ್ತಾಗುತ್ತಿದೆ. ಕೊರೊನಾ ವೈರಸ್‌ಗೆ ಸದ್ಯ ಲಿಸಿಕೆ ಇಲ್ಲದೇ ಇರುವ ಈ ಹೊತ್ತಿನಲ್ಲಿ, ಕೋವಿಡ್‌–19 ವಿರುದ್ಧದ ಪ್ರತಿರೋಧಕತನವನ್ನು ಅರ್ಥ ಮಾಡಿಕೊಳ್ಳಲು ಮರು ಸೋಂಕು ಪ್ರಕರಣಗಳ ಪರಿಣಾಮಗಳು ಖಚಿತವಾಗಿಯೂ ಅಗತ್ಯ,’ ಎಂದು ನೆವಾಡ ಸಾರ್ವಜನಿಕ ಆರೋಗ್ಯ ಪ್ರಯೋಗಾಲಯದ ಮುಖ್ಯಸ್ಥ ಮಾರ್ಕ್‌ ಪ್ಯಾಂಡೋರಿ ಹೇಳಿದ್ದಾರೆ.

ಪ್ರಜಾವಾಣಿ ಫೇಸ್‌ಬುಕ್ ಪುಟವನ್ನು ಲೈಕ್ ಮಾಡಿ, ಪ್ರಮುಖ ಸುದ್ದಿಗಳ ಅಪ್‌ಡೇಟ್ಸ್ ಪಡೆಯಿರಿ.

ಪ್ರಜಾವಾಣಿಯನ್ನು ಟ್ವಿಟರ್‌ನಲ್ಲಿ ಇಲ್ಲಿ ಫಾಲೋ ಮಾಡಿ.

ಟೆಲಿಗ್ರಾಂ ಮೂಲಕ ನಮ್ಮ ಸುದ್ದಿಗಳ ಅಪ್‌ಡೇಟ್ಸ್ ಪಡೆಯಲು ಇಲ್ಲಿ ಕ್ಲಿಕ್ ಮಾಡಿ.

ಈ ವಿಭಾಗದಿಂದ ಇನ್ನಷ್ಟು