ಮರುಸೋಂಕು ಪ್ರಕರಣಗಳ ಅಧ್ಯಯನ ಆರಂಭಿಸಿದ ಐಸಿಎಂಆರ್

‘ಮರುಸೋಂಕು ಪ್ರಕರಣಗಳನ್ನು ನಾವು ಅಧ್ಯಯನ ಮಾಡುತ್ತಿದ್ದೇವೆ. ಸೋಂಕಿನಿಂದ ಗುಣಮುಖರಾದ 110 ದಿನಗಳವರೆಗೆ ದೇಹದಲ್ಲಿ ಪ್ರತಿಕಾಯಗಳು ಪ್ರಬಲವಾಗಿರುತ್ತವೆ. ಆದರೂ ನಾವು 100 ದಿನಗಳ ಗಡುವು ಇರಿಸಿಕೊಂಡು ಅಧ್ಯಯನಕ್ಕೆ ಮುಂದಾಗಿದ್ದೇವೆ. ಮುಂಬೈನ 2 ಮತ್ತು ಅಹಮದಾಬಾದ್‌ನ ಒಂದು ಪ್ರಕರಣವನ್ನು ಮರುಸೋಂಕು ಎಂದು ದೃಢೀಕರಿಸಲಾಗಿದೆ’ ಎಂದು ಐಸಿಎಂಅರ್ ಪ್ರಧಾನ ನಿರ್ದೇಶಕ ಡಾ.ಬಲರಾಂ ಭಾರ್ಗವ ಹೇಳಿದ್ದಾರೆ.

ಕೋವಿಡ್-19 ರೋಗಿಗಳಲ್ಲಿ ಮರುಸೋಂಕು ಕಾಣಿಸಿಕೊಳ್ಳಬಹುದು ಎಂದು ಸೋಂಕು ರೋಗಗಳಿಗೆ ಸಂಬಂಧಿಸಿದ ಲ್ಯಾನ್ಸೆಟ್ ನಿಯತಕಾಲಿಕೆ ವರದಿ ಮಾಡಿತ್ತು. ಮರು ಸೋಂಕು ಕಾಣಿಸಿಕೊಂಡವರಲ್ಲಿ ರೋಗ ತೀವ್ರತೆಯೂ ಹೆಚ್ಚಾಗಿರುತ್ತದೆ ಎಂದು ವರದಿ ಅಭಿಪ್ರಾಯಪಟ್ಟಿದೆ.

‘ವಿಶ್ವ ಆರೋಗ್ಯ ಸಂಸ್ಥೆಯು ಕೋವಿಡ್-19ರ 24 ಮರುಸೋಂಕು ಪ್ರಕರಣಗಳನ್ನು ದಾಖಲಿಸಿದೆ. ಮೂರು ಮರುಸೋಂಕು ಪ್ರಕರಣಗಳನ್ನು ಗುರುತಿಸಿ, ರೋಗಿಗಳೊಂದಿಗೆ ನಾವು ಫೋನ್‌ನಲ್ಲಿ ಮಾತನಾಡಿದ್ದೇವೆ. ಅವರ ದೇಹಸ್ಥಿತಿಯ ಬಗ್ಗೆ ಇನ್ನಷ್ಟು ಅಧ್ಯಯನ ನಡೆಸುತ್ತೇವೆ’ ಎಂದು ಡಾ.ಬಲರಾಂ ತಿಳಿಸಿದ್ದಾರೆ.

‘ಕೋವಿಡ್-19 ರೋಗ ತರುವ ಸಾರ್ವ್ ಕೊವ್-2 ವೈರಾಣುಗಳು ರೂಪಾಂತರಗೊಂಡಿರುವುದು ಬೆಳಕಿಗೆ ಬಂದಿದೆ. ಆದರೆ ಅದರ ಇಂಥ ವೈರಾಣುಗಳು ಸ್ವಭಾವದಲ್ಲಿ ಹೆಚ್ಚೇನೂ ವ್ಯತ್ಯಾಸ ಗೋಚರಿಸಿಲ್ಲ. ಇದೀಗ ಕೊರೊನಾವೈರಸ್‌ ತಡೆಯಲು ಸಿದ್ಧಪಡಿಸುತ್ತಿರುವ ಲಸಿಕೆಯು ಇಂಥ ರೂಪಾಂತರಿತ ವೈರಾಣುಗಳನ್ನೂ ನಿಗ್ರಹಿಸಬಲ್ಲದು’ ಎಂದು ಅವರು ಸ್ಪಷ್ಟಪಡಿಸಿದ್ದಾರೆ.