ಜುಲೈ 5–11ರ ನಡುವಣ ಅವಧಿಯಲ್ಲಿ ನಿತ್ಯದ ಲಸಿಕೆ ನೀಡಿಕೆ ಸರಾಸರಿ 34.32 ಲಕ್ಷ ಡೋಸ್‌ಗೆ ಇಳಿದಿದೆ. ರಾಜ್ಯಗಳ ಪೈಕಿ ಕರ್ನಾಟಕ, ಹರಿಯಾಣ, ಗುಜರಾತ್‌, ಛತ್ತೀಸಗಡ ರಾಜ್ಯಗಳಲ್ಲಿ ಲಸಿಕೆ ಪ್ರಮಾಣ ಕುಗ್ಗಿದೆ.

ಉಳಿದಂತೆ ಕೇರಳ, ಅಂಡಮಾನ್‌, ನಿಕೋಬಾರ್‌ ದ್ವೀಪ, ದಾದ್ರಾ, ಜಮ್ಮು ಮತ್ತು ಕಾಶ್ಮೀರದಲ್ಲಿ ಲಸಿಕೆ ನೀಡಿಕೆ ಸಾಧನೆಯಲ್ಲಿ ಮಿಶ್ರ ಸ್ಪಂದನೆ ಇದೆ. ತ್ರಿಪುರಾದಲ್ಲಿ ಲಸಿಕೆ ನೀಡುವ ಪ್ರಮಾಣ ಏರುಗತಿಯಲ್ಲಿದೆ.

ರಾಜ್ಯಗಳು, ಕೇಂದ್ರಾಡಳಿತ ಪ್ರದೇಶಗಳಲ್ಲಿ 1.54 ಕೋಟಿ ಡೋಸ್ ಲಸಿಕೆ ಬಾಕಿ ಉಳಿದಿದೆ ಎಂದು ಆರೋಗ್ಯ ಸಚಿವಾಲಯವು ಮಾಹಿತಿಯನ್ನು ನೀಡಿದೆ. ಮಹಾರಾಷ್ಟ್ರ ಸೇರಿದಂತೆ ಕೋವಿಡ್‌ ಪ್ರಕರಣಗಳು ಹೆಚ್ಚು ಪತ್ತೆಯಾಗಿರುವ ರಾಜ್ಯಗಳಿಗೆ ಹೆಚ್ಚಿನ ಪ್ರಮಾಣದಲ್ಲಿ ಲಸಿಕೆ ಅಗತ್ಯವಿದೆ.

ಮಹಾರಾಷ್ಟ್ರದ ಆರೋಗ್ಯ ಸಚಿವ ರಾಜೇಶ್‌ ತೋಪೆ ಅವರು, ಅರ್ಹರಾಗಿರುವ ಎಲ್ಲರಿಗೆ ನೀಡಲು ರಾಜ್ಯಕ್ಕೆ ಮಾಸಿಕ ಕನಿಷ್ಠ 3 ಕೋಟಿ ಲಸಿಕೆ ಅಗತ್ಯವಿದೆ ಎಂದು ಹೇಳಿದ್ದಾರೆ. ಕೇಂದ್ರ ಸರ್ಕಾರ ಅಂದಾಜಿರುವಂತೆ, ಗುಜರಾತ್‌ ರಾಜ್ಯದಲ್ಲಿ ಎಲ್ಲ ಅರ್ಹರಿಗೆ ಲಸಿಕೆ ನೀಡಲು ಒಟ್ಟಾರೆ 9.6 ಕೋಟಿ ಡೋಸ್ ಲಸಿಕೆ ಅಗತ್ಯವಿದೆ.