ಪಣಜಿ: ‘ಗೋವಾದ ಪ್ರಮುಖ ಪ್ರವಾಸಿ ತಾಣಗಳಾದ ಕಲಂಗುಟ್,ಅರ್ಪೊರಾ-ನಾಗೋವಾ ಮತ್ತು ಕ್ಯಾಂಡೋಲಿಮ್‌ ಹೊರತುಪಡಿಸಿ ರಾಜ್ಯದ ಇತರೆ ಭಾಗಗಳಲ್ಲಿ ಲಾಕ್‌ಡೌನ್‌ ತೆರವುಗೊಳಿಸಲಾಗಿದೆ’ ಎಂದು ಗೋವಾದ ಬಂದರು ಸಚಿವ ಮೈಕಲ್‌ ಲೊಬೊ ಸೋಮವಾರ ತಿಳಿಸಿದ್ದಾರೆ.
ಗೋವಾದಲ್ಲಿ ಕಳೆದ ಗುರುವಾರ ಕೋವಿಡ್‌ ಪ್ರಕರಣಗಳು ಹೆಚ್ಚಾಗಿದ್ದವು. ಹೀಗಾಗಿ, ಏಪ್ರಿಲ್‌ 29ರಿಂದ ಲಾಕ್‌ಡೌನ್‌ ಹೇರಲಾಗಿತ್ತು.
ಸೋಮವಾರ ಬೆಳಿಗ್ಗೆ 6 ಗಂಟೆಯಿಂದ ಲಾಕ್‌ಡೌನ್‌ ತೆರವುಗೊಳಿಸಲಾಗಿದೆ.
‘ಉತ್ತರ ಗೋವಾದ ಪ್ರವಾಸಿ ತಾಣಗಳಾದ ಕಲಂಗುಟ್, ಕ್ಯಾಂಡೋಲಿಮ್‌ ಮತ್ತು ಅರ್ಪೊರಾ-ನಾಗೋವಾದಲ್ಲಿ ಲಾಕ್‌ಡೌನ್‌ ಅನ್ನು ಮುಂದುವರಿಸಲು ಅಲ್ಲಿನ ಗ್ರಾಮ ಪಂಚಾಯಿತಿಗಳು ನಿರ್ಧಾರ ಕೈಗೊಂಡಿವೆ’ ಎಂದು ಲೊಬೊ ಮಾಹಿತಿ ನೀಡಿದರು.
‘ಈ ಪ್ರದೇಶದ ಜನರಿಗೆ ಅಗತ್ಯವಿರುವ ವಸ್ತುಗಳನ್ನು ಪೂರೈಸಲಾಗುವುದು. ಈ ಬಗ್ಗೆ ಸ್ಥಳೀಯ ಆಡಳಿತವು ಗಮನವಹಿಸಲಿದೆ’ ಎಂದು ಅವರು ಹೇಳಿದರು.
‘ಈ ಪ್ರದೇಶಗಳಲ್ಲಿ ಪ್ರಸ್ತುತ 1,611 ಸಕ್ರಿಯ ಪ್ರಕರಣಗಳಿವೆ’ ಎಂದು ರಾಜ್ಯದ ಆರೋಗ್ಯ ನಿರ್ದೇಶನಾಲಯವು ತಿಳಿಸಿದೆ.
‘ಗೋವಾದಲ್ಲಿ ಸೋಮವಾರ ಬೆಳಿಗ್ಗೆ 6 ರಿಂದ ಲಾಕ್‌ಡೌನ್‌ ಅನ್ನು ತೆರವುಗೊಳಿಸಲಾಗುವುದು. ಆದರೆ, ಮೇ 10ರ ತನಕ ನಿರ್ಬಂಧಗಳು ಮುಂದುವರಿಯಲಿವೆ. ಸಾಮಾಜಿಕ ಮತ್ತು ರಾಜಕೀಯ ಸಭೆಗಳನ್ನು ನಿರ್ಬಂಧಿಸಲಾಗಿದೆ’ ಎಂದು ಮುಖ್ಯಮಂತ್ರಿ ಪ್ರಮೋದ್ ಸಾವಂತ್‌ ಅವರು ಹೇಳಿದ್ದಾರೆ.
