ಮಧ್ಯಪ್ರದೇಶ | ಭಕ್ತೆಯ ಮೇಲೆ ಅತ್ಯಾಚಾರ: ಸ್ವಯಂಘೋಷಿತ ದೇವಮಾನವ ಬಂಧನ

‘ಭಾರತೀಯ ದಂಡ ಸಂಹಿತೆಯ ಸೆಕ್ಷನ್ 376 (ಅತ್ಯಾಚಾರ) ಅಡಿಯಲ್ಲಿ ಅವರ ವಿರುದ್ಧ ದಾಖಲಾಗಿರುವ ಪ್ರಕರಣಕ್ಕೆ ಸಂಬಂಧಿಸಿದಂತೆ ಸ್ವಾಮಿ ವೈರಾಗ್ಯಾನಂದ ಗಿರಿ ಅವರನ್ನು ಗ್ವಾಲಿಯರ್‌ನಿಂದ ಬಂಧಿಸಲಾಗಿದ್ದು, ಅವರನ್ನು ಭೋಪಾಲ್‌ಗೆ ಕರೆತರಲಾಗುತ್ತಿದೆ’ ಎಂದು ಚೌಬೆ ಹೇಳಿದರು.

‘ಸೋಮವಾರ ಸಂತ್ರಸ್ತ‌ ಭಕ್ತೆ ದೂರು ನೀಡಿದ್ದಾರೆ. ಸಂತ್ರಸ್ತೆಗೆ ಮದುವೆಯಾಗಿ ಹಲವು ವರ್ಷ ಕಳೆದರೂ ಮಕ್ಕಳಾಗಿರಲಿಲ್ಲ. ಈ ವೇಳೆ, ಸ್ವಾಮಿ ವೈರಾಗ್ಯಾನಂದ ಗಿರಿಯನ್ನು ಭಕ್ತೆ ಭೇಟಿ ಮಾಡಿದ್ದಾರೆ. ಕೆಲವು ಪೂಜೆಗಳನ್ನು ಮಾಡಿಸುವುದರಿಂದ ಮಕ್ಕಳಾಗುತ್ತವೆ ಎಂಬ ಭರವಸೆಯನ್ನುಸ್ವಾಮಿ ವೈರಾಗ್ಯಾನಂದ ಭಕ್ತೆಗೆ ನೀಡಿದ್ದಾನೆ. ನಂತರ ಆರೋಪಿಯು ಜುಲೈ 17ರಂದು ಪೂಜೆಯ ವೇಳೆ ಭಕ್ತೆಗೆ ಪ್ರಜ್ಞೆ ತಪ್ಪಿಸುವ ನೈವೇದ್ಯ ನೀಡಿ ಅತ್ಯಾಚಾರ ಎಸಗಿದ್ದಾನೆ’ ಎಂದೂ ಅವರು ಹೇಳಿದರು.‌

‘ಇನ್ನು ಸಂತ್ರಸ್ತೆಯು, ಸಾಮಾಜಿಕ ಕಳಂಕದ ಭಯದಿಂದ ತಕ್ಷಣ ದೂರು ನೀಡಲು ಸಾಧ್ಯವಾಗಲಿಲ್ಲ ಪೊಲೀಸರ ಬಳಿ ಹೇಳಿಕೊಂಡಿದ್ದಾರೆ’ ಎಂದು ಅಧಿಕಾರಿ ತಿಳಿಸಿದ್ದಾರೆ.

ಸ್ವಾಮಿ ವೈರಾಗ್ಯಾನಂದ ಕಳೆದ ರಾಜ್ಯ ವಿಧಾನಸಭೆ ಮತ್ತು ಲೋಕಸಭೆ ಚುನಾವಣೆಯಲ್ಲಿ ಕಾಂಗ್ರೆಸ್‌ಗೆ ಬೆಂಬಲ ನೀಡಿದ್ದ. ಲೋಕಸಭೆ ಚುನಾವಣೆಯಲ್ಲಿ ಕಾಂಗ್ರೆಸ್‌ನ ಹಿರಿಯ ನಾಯಕ ದಿಗ್ವಿಜಯ ಸಿಂಗ್ ಅವರ ಗೆಲುವಿಗಾಗಿ ಯಜ್ಞವನ್ನು ಆಯೋಜಿಸಿದ್ದ. ಆದರೆ ಚುನಾವಣೆಯಲ್ಲಿ ದಿಗ್ವಿಜಯ್‌ ಸಿಂಗ್‌ ಸೋತ ಬಳಿಕ ಸಮಾಧಿ ಸ್ಥಿತಿಗೆ ಹೋಗುವುದಾಗಿಯೂ ಘೋಷಿಸಿದ್ದ.