ನವದೆಹಲಿ: ಕೋವಿಡ್–19 ಪಿಡುಗಿನ ಅವಧಿಯಲ್ಲಿ ನಡೆಯುವ ಚುನಾವಣೆಯ ಮಾರ್ಗಸೂಚಿಗಳನ್ನು ಚುನಾವಣಾ ಆಯೋಗ ಶುಕ್ರವಾರ ಪ್ರಕಟಿಸಿದೆ. ಪಿಡುಗಿನ ನಡುವೆ ಚುನಾವಣೆ ಎದುರಿಸುತ್ತಿರುವ ರಾಜ್ಯಗಳ ಪೈಕಿ ಬಿಹಾರ ಮೊದಲಿದ್ದು, ಅಕ್ಟೋಬರ್‌ ಅಥವಾ ನವೆಂಬರ್‌ ತಿಂಗಳಲ್ಲಿ ಮತದಾನಕ್ಕೆ ದಿನಾಂಕ ನಿಗದಿಯಾಗುವ ಸಾಧ್ಯತೆ ಇದೆ. ಮಾರ್ಗಸೂಚಿಯ ವಿವರ ಹೀಗಿದೆ...
*ಇವಿಎಂನಲ್ಲಿ ಬಟನ್‌ ಒತ್ತಲು ಪ್ರತಿ ಮತದಾರರಿಗೆ ಕೈಗವಸು ನೀಡಲಾಗುವುದು
*ಮತದಾನ ಕೇಂದ್ರಗಳಲ್ಲಿ ಚುನಾವಣಾ ಸಿಬ್ಬಂದಿ ಅಥವಾ ವೈದ್ಯಕೀಯ ಸಿಬ್ಬಂದಿಯೇ ಮತದಾರರು ಕೊಠಡಿ ಒಳಪ್ರವೇಶಿಸುವ ಮುನ್ನ ಥರ್ಮಲ್‌ ಸ್ಕ್ಯಾನರ್‌ ಮುಖಾಂತರ ಮತದಾರರ ದೇಹದ ಉಷ್ಣಾಂಶ ಪರಿಶೀಲಿಸಲಿದ್ದಾರೆ
*ಕ್ವಾರಂಟೈನ್‌ನಲ್ಲಿ ಇರುವ ಕೋವಿಡ್–19 ರೋಗಿಗಳಿಗೆ ಮತದಾನದ ದಿನ ಕೊನೆಯ ಒಂದು ಗಂಟೆಯಲ್ಲಿ ಮತದಾನಕ್ಕೆ ಅವಕಾಶ
*ಮತದಾನ ಕೇಂದ್ರಗಳನ್ನು ಮತದಾನದ ಮುನ್ನಾ ದಿನ ಕಡ್ಡಾಯವಾಗಿ ಸೋಂಕುನಿವಾರಕಗಳನ್ನು ಬಳಸಿ ಸ್ವಚ್ಛಗೊಳಿಸಬೇಕು
*ಒಂದು ಮತಗಟ್ಟೆಯಲ್ಲಿ 1,500 ಮತದಾರರ ಬದಲಾಗಿ ಗರಿಷ್ಠ 1,000 ಮತದಾರರಿಗೆ ಅವಕಾಶ
*ಮನೆ ಮನೆ ಪ್ರಚಾರಕ್ಕೆ ಭದ್ರತಾ ಸಿಬ್ಬಂದಿ ಹೊರತುಪಡಿಸಿ ಅಭ್ಯರ್ಥಿ ಸೇರಿದಂತೆ ಗರಿಷ್ಠ 5 ಜನರಿಗಷ್ಟೇ ಅವಕಾಶ
*ರೋಡ್‌ಶೋ ಸಂದರ್ಭದಲ್ಲಿ ಭದ್ರತಾ ಸಿಬ್ಬಂದಿ ವಾಹನ ಹೊರತುಪಡಿಸಿ ಒಟ್ಟಾಗಿ ಕೇವಲ ಐದು ವಾಹನಗಳು ಸಂಚರಿಸಲಷ್ಟೇ ಅವಕಾಶ.
*ಕೋವಿಡ್–19 ಮಾರ್ಗಸೂಚಿಗಳನ್ನು(ಪರಸ್ಪರ ಆರು ಅಡಿ ಅಂತರ, ಮುಖಗವಸು ಕಡ್ಡಾಯ ಮುಂತಾದವುಗಳು) ಅನುಸರಿಸಿ ಸಾರ್ವಜನಿಕ ಸಭೆ, ರ್‍ಯಾಲಿ ಆಯೋಜಿಸಬಹುದು
* ಸಾರ್ವಜನಿಕ ಸಭೆಗಳಿಗೆ ಮೈದಾನಗಳನ್ನು ಜಿಲ್ಲಾ ಚುನಾವಣಾಧಿಕಾರಿ ಮೊದಲೇ ಗುರುತಿಸಬೇಕು. ಇವುಗಳಿಗೆ ಸೂಕ್ತವಾದ ಪ್ರವೇಶ ಹಾಗೂ ನಿರ್ಗಮನ ವ್ಯವಸ್ಥೆ ಇರಬೇಕು
*ನಿಗದಿಪಡಿಸಿದ ಮೈದಾನಗಳಲ್ಲಿ ಆಯೋಜಿಸುವ ಸಭೆಯಲ್ಲಿ ಭಾಗವಹಿಸುವ ಜನರು ಪರಸ್ಪರ ಅಂತರ ಕಾಯ್ದುಕೊಂಡು ಕುಳಿತುಕೊಳ್ಳುವಂತೆ ಮೊದಲೇ ಗುರುತು ಹಾಕುವ ಹೊಣೆ ಜಿಲ್ಲಾ ಚುನಾವಣಾಧಿಕಾರಿಗೆ
*ಸಾರ್ವಜನಿಕ ಸಭೆಗಳಿಗೆ ಆಯಾ ರಾಜ್ಯಗಳ ವಿಪತ್ತು ನಿರ್ವಹಣಾ ಪ್ರಾಧಿಕಾರವು ಸೂಚಿಸಿದ ಸಂಖ್ಯೆಗಿಂತ ಅಧಿಕ ಸಂಖ್ಯೆಯ ಜನರು ಭಾಗವಹಿಸದಂತೆ ನಿರ್ವಹಿಸುವ ಹೊಣೆ ಜಿಲ್ಲಾ ಚುನಾವಣಾಧಿಕಾರಿ ಹಾಗೂ ಜಿಲ್ಲಾ ಎಸ್‌ಪಿಗೆ
