ನವದೆಹಲಿ: ದೇಶದ ವಿವಿಧೆಡೆಗಳಲ್ಲಿ ಇರುವ ವಿದ್ಯುತ್ ಘಟಕಗಳಿಗೆ ಕಲ್ಲಿದ್ದಲು ಸಾಗಾಟ ಮಾಡಲು ಭಾರತೀಯ ರೈಲ್ವೆಯು ಶೇ 86ರಷ್ಟು ತೆರೆದ ಬೋಗಿಗಳನ್ನು ಮೀಸಲಿರಿಸಿದೆ ಎಂದು ಮೂಲಗಳು ತಿಳಿಸಿವೆ.
1,31,403 ತೆರೆದ ಬೋಗಿಗಳ ಪೈಕಿ 1,13,880 ಬೋಗಿಗಳನ್ನು ಕಲ್ಲಿದ್ದಲು ಸಾಗಾಟಕ್ಕೆ ಮೀಸಲಿರಿಸಲಾಗಿದೆ. ಕಲ್ಲಿದ್ದಲು ಮತ್ತು ವಿದ್ಯುತ್ ಸಚಿವಾಲಯಗಳ ಜತೆ ಚರ್ಚಿಸಿ ರೂಪಿಸಲಾದ ಯೋಜನೆಯ ಅಡಿಯಲ್ಲಿ ಈ ಕ್ರಮ ಕೈಗೊಳ್ಳಲಾಗಿದೆ ಎಂದು ಮೂಲಗಳು ಹೇಳಿವೆ.
ಸದ್ಯ ರೈಲ್ವೆ ಬಳಿ 3,82,562 ಬೋಗಿಗಳಿದ್ದು ಈ ಪೈಕಿ 1,31,403 ತೆರೆದ ಬೋಗಿಗಳಾಗಿವೆ. ಇವುಗಳಲ್ಲಿ ಮೇ 2ರ ಲೆಕ್ಕಾಚಾರದ ಪ್ರಕಾರ 3,636 ಬೋಗಿಗಳು ದುರಸ್ತಿಯಾಗಬೇಕಿವೆ ಎನ್ನಲಾಗಿದೆ.
ವಿದ್ಯುತ್ ಘಟಕಗಳಿಗೆ ಪೂರೈಕೆಗಾಗಿ ಪ್ರತಿ ದಿನ ಸರಾಸರಿ 28,470 ಬೋಗಿಗಳಲ್ಲಿ ಕಲ್ಲಿದ್ದಲು ಸಾಗಾಟ ಮಾಡಲಾಗುತ್ತಿದೆ. ಕಲ್ಲಿದ್ದಲು ಸಾಗಾಟ ಮಾಡುವ ಒಂದು ರೈಲಿನಲ್ಲಿ ಸಾಮಾನ್ಯವಾಗಿ 84 ಬೋಗಿಗಳು ಇರುತ್ತವೆ ಎಂದು ಮೂಲಗಳು ಮಾಹಿತಿ ನೀಡಿವೆ.