ಗುರುವಾರ , ಸೆಪ್ಟೆಂಬರ್ 23, 2021
23 °C

ಉಚಿತವಾಗಿ ಬಿರಿಯಾನಿ ಕೇಳಿದ ಪುಣೆ ಡಿಸಿಪಿ ಆಡಿಯೊ ವೈರಲ್‌: ತನಿಖೆಗೆ ಆದೇಶ

ಪ್ರಜಾವಾಣಿ ವಾರ್ತೆ Updated:

ಅಕ್ಷರ ಗಾತ್ರ : | |

ಮುಂಬೈ: ತಮ್ಮ ಸರಹದ್ದಿನಲ್ಲಿ ಬರುವ ಹೋಟೆಲ್‌ನಿಂದ ಉಚಿತವಾಗಿ ಬಿರಿಯಾನಿ ಕೊಂಡು ತರುವಂತೆ ಪುಣೆಯ ಮಹಿಳಾ ಡಿಸಿಪಿಯೊಬ್ಬರು ತಮ್ಮ ಅಧೀನ ಸಿಬ್ಬಂದಿಗೆ ಹೇಳುವ ಆಡಿಯೊವೊಂದು ಮಹಾರಾಷ್ಟ್ರದಲ್ಲಿ ವೈರಲ್‌ ಆಗಿದ್ದು, ಪೊಲೀಸ್‌ ಇಲಾಖೆ ತೀವ್ರ ಮುಜುಗರಕ್ಕೀಡಾಗಿದೆ. 

ವಿಷಯವನ್ನು ಗಂಭೀರವಾಗಿ ಪರಿಗಣಿಸಿರುವ ಗೃಹ ಸಚಿವ ದಿಲೀಪ್‌ ವಾಲ್ಸೆ ಪಾಟೀಲ್‌, ಪ್ರಕರಣದ ತನಿಖೆಗೆ ಆದೇಶ ಹೊರಡಿಸಿದ್ದಾರೆ. ಅಲ್ಲದೆ, ಹಿರಿಯ ಪೊಲೀಸ್‌ ಅಧಿಕಾರಿಗಳಿಂದ ವರದಿ ಕೇಳಿದ್ದಾರೆ.  

ಈ ಬಗ್ಗೆ ಮಹಾರಾಷ್ಟ್ರ ಗೃಹ ಇಲಾಖೆ ಮತ್ತು ಪುಣೆ ಪೊಲೀಸ್‌ ಅಧಿಕಾರಿಗಳ ಪ್ರತಿಕ್ರಿಯೆ ಪಡೆಯಲು ಮಾಧ್ಯಮ ಸಂಸ್ಥೆಗಳು ನಿರಂತರ ಪ್ರಯತ್ನ ನಡೆಸಿವೆಯಾದರೂ, ಯಾರೊಬ್ಬರೂ ಪ್ರತಿಕ್ರಿಯೆ ನೀಡಿಲ್ಲ. 

ಚಿಕನ್‌ ಬಿರಿಯಾನಿ, ಮಟನ್‌ ಬಿರಿಯಾನಿಯನ್ನು ಪತಿ ಇಷ್ಟಪಡುವುದಾಗಿ ಹೇಳುವ ಮಹಿಳಾ ಐಪಿಎಸ್‌ ಅಧಿಕಾರಿ, ಅದರ ಜೊತೆಗೆ ಪ್ರಾನ್‌ ಮಸಾಲಾ, ಫ್ರೈಯ್ಡ್‌ ಫಿಷ್‌ ತರುವಂತೆಯೂ ತಮ್ಮ ಅಧೀನ ಸಿಬ್ಬಂದಿಗೆ ಸೂಚಿಸುವುದು ಆಡಿಯೊದಲ್ಲಿದೆ. 

ಹಣ ಪಾವತಿಯ ಬಗ್ಗೆ ಸಿಬ್ಬಂದಿಯು ಭಯದಿಂದ ಪ್ರಶ್ನೆ ಮಾಡಿದಾಗ ಏರುಧನಿಯಲ್ಲಿ ಮಾತನಾಡುವ ಐಪಿಎಸ್‌ ಅಧಿಕಾರಿ, "ನಾವು ನಮ್ಮ ಸರಹದ್ದಿನ ಹೋಟೆಲ್‌ಗೆ ದುಡ್ಡು ಪಾವತಿ ಮಾಡಬೇಕೆ? ನೀವೇ ಇದನ್ನು ಮಾಡಬೇಕು, ಇಲ್ಲವೇ ಬೀಟ್‌ ಪೊಲೀಸ್‌ಗೆ ಇದನ್ನು ಮಾಡಲು ಹೇಳಿ. ಅವರೊಂದಿಗೆ ನಾನು ಮಾತಾಡಬೇಕಿಲ್ಲ,‘ ಎಂದು ಜೋರು ಮಾಡುತ್ತಾರೆ. 

ಘಟನೆ ಕುರಿತಂತೆ ವರದಿ ನೀಡುವಂತೆ ಪುಣೆ ಪೊಲೀಸ್ ಆಯುಕ್ತ ಅಮಿತಾಬ್ ಗುಪ್ತಾ ಅವರಿಗೆ ಗೃಹ ಸಚಿವರು ತಿಳಿಸಿದ್ದಾರೆ. ಆಡಿಯೊ ನೈಜತೆಯನ್ನು ಪುಣೆ ಸೈಬರ್ ಪೊಲೀಸರು ಪರಿಶೀಲನೆ ನಡೆಸುವ ಸಾಧ್ಯತೆಗಳಿವೆ. 

ತಾಜಾ ಮಾಹಿತಿ ಪಡೆಯಲು ಪ್ರಜಾವಾಣಿ ಟೆಲಿಗ್ರಾಂ ಚಾನೆಲ್ ಸೇರಿಕೊಳ್ಳಿ

ತಾಜಾ ಸುದ್ದಿಗಳಿಗಾಗಿ ಪ್ರಜಾವಾಣಿ ಆ್ಯಪ್ ಡೌನ್‌ಲೋಡ್ ಮಾಡಿಕೊಳ್ಳಿ: ಆಂಡ್ರಾಯ್ಡ್ ಆ್ಯಪ್ | ಐಒಎಸ್ ಆ್ಯಪ್

ಪ್ರಜಾವಾಣಿ ಫೇಸ್‌ಬುಕ್ ಪುಟವನ್ನುಫಾಲೋ ಮಾಡಿ.

ಈ ವಿಭಾಗದಿಂದ ಇನ್ನಷ್ಟು