ಸೋಮವಾರ, ಮೇ 17, 2021
21 °C
ಕೋವಿಡ್‌ ನಿಯಮಾವಳಿ ಉಲ್ಲಂಘಿಸಿದ ಆರೋಪ

ಕ್ಲಬ್‌ ಮೇಲೆ ಪೊಲೀಸ್ ದಾಳಿ: ನಿವೃತ್ತ ಕ್ರಿಕೆಟಿಗ ರೈನಾ ಬಂಧನ, ಬಿಡುಗಡೆ

ಏಜೆನ್ಸಿಸ್‌ Updated:

ಅಕ್ಷರ ಗಾತ್ರ : | |

Prajavani

ಮುಂಬೈ: ಇಲ್ಲಿನ ಅಂತರರಾಷ್ಟ್ರೀಯ ವಿಮಾನ ನಿಲ್ದಾಣದ ಸಮೀಪವಿರುವ ಐಷಾರಾಮಿ ಡ್ರ್ಯಾಗನ್‌ಫ್ಲೈ ಎಕ್ಸ್‌ಪೀರಿಯನ್ಸ್‌ ಕ್ಲಬ್‌ ಮೇಲೆ ದಾಳಿ ನಡೆಸಿರುವ ಪೊಲೀಸರು ಮಾಜಿ ಕ್ರಿಕೆಟಿಗ ಸುರೇಶ್‌ ರೈನಾ, ಬಾಲಿವುಡ್‌ ಗಾಯಕ ಗುರು ರಾಂಧವ, ಬಾಲಿವುಡ್‌ ನಟ ಹೃತಿಕ್‌ ರೋಷನ್‌ ಅವರ ವಿಚ್ಛೇದಿತ ಪತ್ನಿ ಸೂಸನ್‌ ಖಾನ್‌ ಸೇರಿದಂತೆ ಒಟ್ಟು 34 ಮಂದಿಯನ್ನು ಬಂಧಿಸಿದ್ದಾರೆ.

‘ಕೋವಿಡ್‌ ನಿಯಮಾವಳಿಗಳನ್ನು ಉಲ್ಲಂಘಿಸಿದ ಹಾಗೂ ಅನುಮತಿ ಪಡೆದಿರುವ ಸಮಯ ಮೀರಿದ ನಂತರವೂ ಬಾಗಿಲು ತೆರೆದಿದ್ದ ಹಿನ್ನೆಲೆಯಲ್ಲಿ ಮುಂಜಾನೆ 3 ಗಂಟೆಗೆ ದಾಳಿ ನಡೆಸಲಾಗಿತ್ತು. ಈ ವೇಳೆ 34 ಜನರನ್ನು ವಶಕ್ಕೆ ಪಡೆಯಲಾಗಿತ್ತು. ಇದರಲ್ಲಿ 13 ಮಹಿಳೆಯರು ಹಾಗೂ ಕ್ಲಬ್‌ನ ಏಳು ಸಿಬ್ಬಂದಿ ಇದ್ದಾರೆ’ ಎಂದು ಪೊಲೀಸರು ಮಂಗಳವಾರ ಹೇಳಿದ್ದಾರೆ.

‘ಮಹಿಳೆಯರಿಗೆ ಸ್ಥಳದಲ್ಲೇ ನೋಟಿಸ್‌ ನೀಡಿ ಮನೆಗೆ ಕಳುಹಿಸಲಾಯಿತು. ಪುರುಷರನ್ನು ಬಂಧಿಸಿ ನಂತರ ಜಾಮೀನಿನ ಮೇಲೆ ಬಿಡುಗಡೆ ಮಾಡಲಾಗಿದೆ. ಐಪಿಸಿ ಸೆಕ್ಷನ್‌ 188, 269 ಹಾಗೂ 34ರ ಅಡಿಯಲ್ಲಿ ಅವರನ್ನು ಬಂಧಿಸಲಾಗಿತ್ತು’ ಎಂದು ಪೊಲೀಸರು ಮಾಹಿತಿ ನೀಡಿದ್ದಾರೆ.

‘ಪಾರ್ಟಿ ನಹೀ ಚಲೇಗಿ ಟಿಲ್‌ ಸಿಕ್ಸ್‌ ಇನ್‌ ದಿ ಮಾರ್ನಿಂಗ್‌! ಅಂಧೇರಿಯ ಐಷಾರಾಮಿ ಕ್ಲಬ್‌ವೊಂದರಲ್ಲಿ ಅಂತರ‌ ನಿಯಮ ಉಲ್ಲಂಘಿಸಲಾಗಿತ್ತು. ಹೀಗಾಗಿ ‌ಮುಂಜಾನೆ 3 ಗಂಟೆಗೆ ಕ್ಲಬ್‌ ಮೇಲೆ ದಾಳಿ ನಡೆಸಿ 34 ಮಂದಿಯನ್ನು ವಶಕ್ಕೆ ಪಡೆಯಲಾಗಿದೆ. ಈ ಪೈಕಿ 19 ಮಂದಿ ನವದೆಹಲಿ ಮತ್ತು ಪಂಜಾಬ್‌ಗೆ ಸೇರಿದವರಾಗಿದ್ದಾರೆ. ಇದರಲ್ಲಿ ಕೆಲ ತಾರೆಗಳೂ ಇದ್ದಾರೆ’ ಎಂದು ಮುಂಬೈ ಪೊಲೀಸ್‌ ಇಲಾಖೆ ಟ್ವೀಟ್‌ ಮಾಡಿದೆ. 

‘ಶೂಟಿಂಗ್‌ವೊಂದರಲ್ಲಿ ಪಾಲ್ಗೊಳ್ಳುವ ಸಲುವಾಗಿ ರೈನಾ ಮುಂಬೈಗೆ ಹೋಗಿದ್ದರು. ಶೂಟಿಂಗ್‌ ಅನ್ನು ತಡರಾತ್ರಿಯವರೆಗೂ ವಿಸ್ತರಿಸಲಾಗಿತ್ತು. ಹೀಗಾಗಿ ಸ್ನೇಹಿತರೊಬ್ಬರ ಆಹ್ವಾನದ ಮೇರೆಗೆ ಅವರು ಊಟಕ್ಕಾಗಿ ಕ್ಲಬ್‌ಗೆ ಹೋಗಿದ್ದರು. ಊಟ ಮುಗಿಸಿಕೊಂಡು ಸೀದಾ ವಿಮಾನ ನಿಲ್ದಾಣಕ್ಕೆ ಬರುವವರಿದ್ದ ಅವರು ಅಲ್ಲಿಂದ ವಿಮಾನ ಹಿಡಿದು ನವದೆಹಲಿಗೆ ಹಿಂದಿರುಗಲಿದ್ದರು’ ಎಂದು ರೈನಾ ‍ಪರವಾಗಿ ಹೊರಡಿಸಿರುವ ಪ್ರಕಟಣೆ ತಿಳಿಸಿದೆ.

‘ಅವಧಿ ಮೀರಿ ಕ್ಲಬ್‌ನ ಬಾಗಿಲು ತೆರೆದಿರುವುದು ರೈನಾ ಅವರಿಗೆ ಗೊತ್ತಿರಲಿಲ್ಲ. ಇದು ಅವರಿಗೆ ಅರಿವಿಲ್ಲದಂತೆ ಆಗಿರುವ ತಪ್ಪು. ರೈನಾ ಅವರು ಸರ್ಕಾರದ ನಿಯಮಾವಳಿಗಳನ್ನು ಚಾಚೂ ತಪ್ಪದೆ ಪಾಲಿಸಿಕೊಂಡು ಬಂದಿದ್ದಾರೆ. ಮುಂದೆಯೂ ಪಾಲಿಸಲಿದ್ದಾರೆ’ ಎಂದೂ ಪ್ರಕಟಣೆ ಹೇಳಿದೆ. 

ಫಲಿತಾಂಶ 2021 ಪೂರ್ಣ ಮಾಹಿತಿ ಇಲ್ಲಿದೆ

ತಾಜಾ ಸುದ್ದಿಗಳಿಗಾಗಿ ಪ್ರಜಾವಾಣಿ ಆ್ಯಪ್ ಡೌನ್‌ಲೋಡ್ ಮಾಡಿಕೊಳ್ಳಿ: ಆಂಡ್ರಾಯ್ಡ್ ಆ್ಯಪ್ | ಐಒಎಸ್ ಆ್ಯಪ್

ಪ್ರಜಾವಾಣಿ ಫೇಸ್‌ಬುಕ್ ಪುಟವನ್ನುಫಾಲೋ ಮಾಡಿ.

ಈ ವಿಭಾಗದಿಂದ ಇನ್ನಷ್ಟು