ಅಯೋಧ್ಯೆ, ಉತ್ತರ ಪ್ರದೇಶ : ಶ್ರೀರಾಮನವಮಿ ಪ್ರಯುಕ್ತ, ಶ್ರೀರಾಮ ಜನ್ಮಭೂಮಿ ತೀರ್ಥಕ್ಷೇತ್ರ ಟ್ರಸ್ಟ್‌ ಇದೇ 21ರಿಂದ 30ರವರೆಗೆ ಅಯೋಧ್ಯೆಯಲ್ಲಿ ‘ರಾಮ ಜನ್ಮ ಮಹೋತ್ಸವ’ವನ್ನು ಆಯೋಜಿಸಲಿದೆ.
ಈ ಕುರಿತು ಮಂಗಳವಾರ ಸಂಜೆ ಟ್ರಸ್ಟ್‌ ತನ್ನ ಟ್ವಿಟ್ಟರ್‌ ಖಾತೆಯಲ್ಲಿ ಮಹೋತ್ಸವದ ಅಧಿಕೃತ ಪೋಸ್ಟರ್‌ ಅನ್ನು ಬಿಡುಗಡೆ ಮಾಡಿದೆ.
‘ರನ್‌ ಫಾರ್‌ ರಾಮ’ ಓಟದ ಸ್ಪರ್ಧೆ ಸೇರಿದಂತೆ ಕುಸ್ತಿ, ಕಬಡ್ಡಿ, ದೋಣಿ ಸ್ಪರ್ಧೆ ಮತ್ತು ಸೈಕಲ್‌ ರೇಸ್‌ನಂತಹ ವಿವಿಧ ಕ್ರೀಡಾ ಸ್ಪರ್ಧೆಗಳು ಇರಲಿವೆ ಎಂದು ಟ್ರಸ್ಟ್‌ನ ಅಧಿಕಾರಿಗಳು ತಿಳಿಸಿದ್ದಾರೆ.
ಮಹೋತ್ಸವದಲ್ಲಿ ಸಂಜೆ ವೇಳೆ ಧಾರ್ಮಿಕ ಸಭೆಗಳು ನಡೆಯಲಿದ್ದು, ಇದರಲ್ಲಿ ರಾಮಚರಿತಮಾನಸದ ಕಥೆಗಳನ್ನು ಆಧರಿಸಿದ ನಾಟಕಗಳ ಪ್ರದರ್ಶನಗಳು, ಸಂಗೀತ ಕಾರ್ಯಕ್ರಮಗಳು ಇರಲಿವೆ. ಹಿಂದಿ ಕವಿಗಳ ಸಭೆಯೂ ಇರಲಿದೆ.
